اخلاص وہ بنیادی خوبی ہے جو معمولی نیکی کو بھی اللہ تعالیٰ کے ہاں عظیم بنا دیتی ہے، جبکہ ریاکاری بڑے سے بڑے عمل کو اجر سے محروم کر سکتی ہے۔
اس مضمون میں احادیثِ نبویﷺ کی روشنی میں نیت کی پاکیزگی، اعمال کی قبولیت اور آخرت میں اخلاص کی اہمیت بیان کی گئی ہے۔
اخلاص کا فقدان یعنی ریاکاری کا انجام بڑا بھیانک اور خوفناک ہے۔
نبی کریمﷺ ارشاد فرماتے ہیں:
’کسی شخص نے ایسا علم حاصل کیا جس سے اللہ تعالیٰ کی خوشنودی مطمع نظر ہونا چاہئے مگر اس شخص نے اس کو دنیا کے معمولی منافع کے حصول کے پیش نظر حاصل کیا تو ایسے شخص کو قیامت کے دن جنت کی خوشبو بھی ملنا محال ہے‘۔
اس کے علاوہ ایک جگہ نبی کریمﷺ نے ارشاد فرمایا ہے:
’جس کسی شخص نے بھی اس لئے علم حاصل کیا ہو کہ وہ اس کے ذریعہ کج فہموں سے کٹ حجتی کرے اور علمائے کرام کا بطور فخر ومباہات سامنا کرے یا لوگوں کی اپنی طرف توجہ مرکوز کرے تو ایسا شخص دوزخ کا ایندھن ہے، وہ جہنم میں جائے گا‘۔
مزید پڑھیں
اخلاص ہی انسان کو قیامت کے دن کے موقف کی ہولناکی اور حد سے زیادہ پریشانی سے نجات کا ذریعہ ثابت ہوگا۔ مخلص لوگ اخلاص کے سایۂ عاطفت میں چین وسکون اطمینان وراحت کے ساتھ ہوں گے، جس دن کہ اللہ تعالیٰ ریاکاروں کو مخاطب کرکے کہے گا، جاؤ ان لوگوں کے پاس جاکر دیکھو جن کو دکھانے کے لئے دنیا میں تم لوگ اعمال کیا کرتے تھے۔
اسی طرح اخلاص کا کمال یہ ہے کہ وہ انسان کو اجر و ثواب سے محرومیت کا شکار ہونے نہیں دیتا۔
نبی کریمﷺ کے پاس ایک شخص آیا، اس نے کہا کہ آپﷺ کا اس شخص کے بارے میں کیا خیال ہے جو کسی غزوہ میں اجر وثواب اور نیک نامی وشہرت کی غرض سے شریک ہو، اس کے لئے اس کے صلہ میں کیا ہے؟
نبی کریمﷺ نے ارشاد فرمایا کہ اس کے لئے کچھ بھی نہیں (3 مرتبہ اس جملہ کو دہرایا) پھر فرمایا:
’اللہ اسی عمل کو قبول کرتا ہے جو خالص اللہ ہی کے لئے کیا گیا ہو اور اس سے اللہ ہی کی رضا وخوشنودی مقصود ہو‘ (رواہ النسائی)
راویٔ حدیث حضرت مکرز نے حضرت ابوہریرہؓ سے نقل کیا ہے کہ ایک شخص نے نبی کریمﷺ سے دریافت کیا:
’یا رسول اللہﷺ کوئی شخص اللہ کے راستہ میں جہاد کرنا چاہتا ہے اور حصول دنیا کی بھی دل میں تمنا لئے ہوئے ہے‘۔
تو نبی کریم ﷺ نے ارشاد فرمایا کہ ’اس کے لئے کوئی اجر و ثواب نہیں‘۔
نبی کریمﷺ نے فرمایا ہے:
’اللہ تعالیٰ نے صاف صاف دوٹوک الفاظ میں ارشاد فرما دیا ہے کہ میں شرک کرنے والوں کے شرک سے پورے طور پر مستغنی ہونے کا اعلان کرتا ہوں، جس شخص نے میرے ساتھ کسی اور کو شریک کیا، میں نے اس سے اور اس کے شرک سے دست برداری کا اعلان کر دیا، وہ جانے اور اس کا کام جانے، میرا اس سے کوئی تعلق نہیں‘۔
ہم کہہ سکتے ہیں کہ اعمال قلوب میں اخلاص بنیادی حیثیت کا حامل ہے اور اعضا وجوارح سے سرزد ہونے والے اعمال کا تتمہ اور تکملہ گردانا جائے گا۔
ان کی حیثیت جزوی گردانی جاتی ہے۔
اعضائے انسانی سے انجام پذیر ہونے والے اعمال، اعمال قلوب کے تابع شمار ہوا کرتے ہیں۔
اخلاص کے اہم ترین فوائد میں سے یہ بھی ہے کہ اخلاص معمولی سے معمولی کام کو بڑھاتا چلا جاتا ہے حتیٰ کہ وہ پہاڑ کے مانند دیوہیکل بن کر مخلصین کے لئے نمودار ہوگا۔
ریا کاری عظیم الشان عمل کو بیکار اور ناکارہ بنا دیتی ہے حتیٰ کہ عنداللہ اس کارخیر کی کوئی قدروقیمت باقی نہیں رہتی بلکہ اللہ تعالیٰ اس کو خس وخاشاک کی طرح ضائع کر دیتا ہے۔