مولانا محمد عابد ندوی
جدہ
کیا خشوع کے بغیر نماز ادا ہوجاتی ہے یا اسے دوبارہ پڑھنا ضروری ہے؟
قرآن و حدیث نماز میں دل کی حاضری اور اللہ تعالیٰ کے سامنے عاجزی کی اہمیت واضح کرتے ہیں۔
اس مضمون میں خشوع کی فضیلت، نماز کے اجر پر اس کے اثرات اور فقہائے کرام کی مختلف آرا کا جائزہ پیش کیا گیا ہے۔
ایک حدیث میں رسول اللہﷺ نے خبر دی کہ لوگوں سے سب سے پہلے جو چیز اٹھالی جائے گی وہ خشوع ہے، یہاں تک کہ ایک وقت ایسا آئے گا جب پوری مسجد میں کوئی ایک شخص بھی خشوع سے نماز پڑھنے والا نہیں ہوگا۔
خشوع کا اصل مقام دل ہے اور اللہ تعالیٰ ہی اس کی حقیقت جانتا ہے، تاہم ظاہری علامات سے بھی ہماری نمازوں میں اس کی کمی کا اندازہ ہوتا ہے۔
بہت سے لوگ نماز پڑھتے ہیں، لیکن اس کی روح یعنی خشوع و خضوع پر توجہ نہیں دیتے۔ حالانکہ نماز کی تاثیر اور اجر کے لیے خشوع نہایت اہم ہے۔
قرآن مجید میں سورۃ المومنون کی ابتدائی آیات میں کامیاب اہل ایمان کی صفات بیان ہوئی ہیں۔ ان میں ایک نمایاں صفت یہ ہے کہ وہ اپنی نمازوں میں خشوع اختیار کرتے ہیں۔
پھر انہی اہل ایمان کو جنت الفردوس کی وراثت کی خوشخبری دی گئی ہے۔ خشوع نماز کی بنیادی صفات میں شامل ہے۔ بعض اہل علم نے اسی بنیاد پر اسے واجب قرار دیا ہے۔
مزید پڑھیں
سورۃ البقرہ، آیت 45 میں فرمایا گیا کہ نماز بہت بھاری ہے، سوائے ان لوگوں کے جو خشوع اختیار کرتے ہیں۔
اس سے مراد نماز میں اللہ تعالیٰ کے سامنے عاجزی ہے۔
جو شخص دل کی توجہ کے ساتھ کھڑا ہو، اس کے لیے نماز بوجھ نہیں رہتی۔
اس کے برعکس غفلت اور بے توجہی نماز کی کیفیت کو متاثر کرتی ہے۔
قرآن کے اس اندازِ بیان میں غیر خاشعین کے لیے تنبیہ بھی پائی جاتی ہے۔
مشہور مفسر علامہ قرطبیؒ نے اپنی تفسیر ’الجامع لاحکام القرآن‘ میں نماز کے خشوع پر اہل علم کے اختلاف کا ذکر کیا ہے: آیا خشوع نماز کے فرائض میں سے ہے یا فضائل میں سے؟
ان کے نزدیک صحیح قول یہ ہے کہ خشوع فرائض میں سے ہے اور اس کا محل دل ہے۔
ان کے نزدیک یہ مسئلہ ظاہری آداب نہیں بلکہ قلبی عبادت سے متعلق ہے۔
قرآن و حدیث میں نماز سے غفلت پر سخت تنبیہات بھی آئی ہیں۔
سورۃ الماعون میں ان نمازیوں کے لیے وعید بیان ہوئی ہے جو اپنی نماز سے غافل رہتے ہیں۔
اسی طرح نماز میں بلا ضرورت ادھر اُدھر دیکھنے اور آسمان کی طرف نگاہ اٹھانے سے منع کیا گیا ہے۔
حضرت انس بن مالکؓ سے روایت ہے کہ رسول اللہﷺ نے نماز میں آسمان کی طرف دیکھنے والوں کو سختی سے متنبہ فرمایا کہ وہ اس حرکت سے باز آجائیں، ورنہ ان کی بینائی چھین لی جاسکتی ہے۔ (متفق علیہ)
یہ تنبیہات خشوع کی اہمیت واضح کرتی ہیں۔
اللہ تعالیٰ نے حضرت موسیٰ علیہ السلام سے فرمایا:
اور میری یاد کے لیے نماز قائم کرو۔ (طٰہٰ: 14)
نماز کا بنیادی مقصد اللہ کی یاد ہے، نہ کہ غفلت۔
سورۃ الاعراف، آیت 205 میں بھی اللہ تعالیٰ کو یاد کرنے اور غافلوں میں شامل نہ ہونے کی ہدایت دی گئی ہے۔
رسول اللہﷺ نے نمازی کی کیفیت بیان کرتے ہوئے فرمایا کہ وہ اپنے رب سے مناجات کرتا ہے۔ مناجات کا تقاضا یہ ہے کہ آدمی جانتا اور محسوس کرتا ہو کہ وہ کس کے سامنے کھڑا ہے اور کیا عرض کررہا ہے۔
احادیث میں یہ مضمون بھی ملتا ہے کہ نمازی کو اپنی نماز کا اجر اسی قدر ملتا ہے جس قدر اس نے توجہ اور سمجھ بوجھ کے ساتھ نماز ادا کی۔
ایک روایت میں نماز کے اجر کے مختلف حصوں، مثلاً نصف، تہائی، چوتھائی، یہاں تک کہ دسویں حصے، کا ذکر ہے۔
اس کا مفہوم یہ ہے کہ ظاہری طور پر ایک جیسی نماز پڑھنے والے افراد اجر و ثواب میں برابر نہیں ہوتے۔
جس قدر دل حاضر اور توجہ زیادہ ہوگی، اسی قدر نماز کے حقیقی فائدے کی امید زیادہ ہوگی۔
یہاں ایک اہم سوال پیدا ہوتا ہے:
اگر کسی شخص نے خشوع کے بغیر نماز پڑھی تو کیا اس کی نماز درست ہوگی یا اسے دوبارہ پڑھنا لازم ہوگا؟
اس بارے میں اہل علم کی آرا مختلف ہیں۔
بعض اہل علم نے کہا ہے کہ جب نماز کا بیشتر حصہ غفلت اور بے توجہی میں گزر جائے تو ایسی نماز کا اعادہ ہونا چاہئے۔ سفیان ثوریؒ سے خشوع کے بغیر نماز کے فاسد ہونے کا قول منقول ہے۔ امام غزالیؒ اور حنبلی فقیہ ابو عبداللہ حسن بن حامدؒ سے بھی اس نوعیت کی رائے نقل کی گئی ہے۔
ان اقوال میں خشوع پر زور دیا گیا ہے۔
جمہور اہل علم
کے مطابق
محض توجہ
کی کمی نماز کو
باطل نہیں کرتی
تاہم اس سے اجر
و ثواب متاثر
ہوسکتا ہے
دوسری طرف جمہور اہل علم کے نزدیک نماز کی ظاہری صحت اور اس کے باطنی اجر میں فرق ہے۔
اگر کسی شخص نے نماز کے شرعی ارکان اور ضروری شرائط پوری کرلی ہوں، لیکن اس کا دل غفلت کا شکار رہا ہو، تو صرف اس وجہ سے وہ نماز چھوڑنے والا نہیں سمجھا جائے گا اور نہ ہی محض توجہ کی کمی پر نماز کا اعادہ لازم ہوگا۔
البتہ خشوع کی کمی سے نماز کے اجر اور اس کے روحانی اثرات میں نقصان ہوسکتا ہے۔
جمہور کی اس رائے کی تائید میں وہ حدیث بھی پیش کی جاتی ہے جس میں بتایا گیا ہے کہ شیطان دورانِ نماز انسان کو مختلف باتیں یاد دلاتا ہے، یہاں تک کہ نمازی بھول جاتا ہے کہ اس نے کتنی رکعتیں پڑھی ہیں۔
ایسی صورت میں رسول اللہﷺ نے نماز کو نئے سرے سے پڑھنے کے بجائے سجدۂ سہو کی تعلیم دی۔
اس سے معلوم ہوتا ہے کہ ہر قسم کی غفلت یا ذہنی انتشار نماز کو خودبخود باطل نہیں کرتا۔ البتہ نماز کے کسی رکن یا واجب کے چھوٹنے کی صورت میں اس کے الگ شرعی احکام ہیں۔اصل ضرورت یہ ہے کہ مسلمان نماز کو محض جسمانی حرکات کا مجموعہ نہ سمجھے۔
نماز اللہ تعالیٰ سے تعلق مضبوط کرنے، دل کو زندہ رکھنے، برائی سے بچنے اور ایمان میں قوت پیدا کرنے کا ذریعہ ہے۔
یہ فوائد اسی وقت بھرپور طور پر حاصل ہوتے ہیں جب نماز میں عاجزی، توجہ اور خشوع پیدا کرنے کی کوشش کی جائے۔
لہٰذا نماز کے باطنی معیار کی بھی فکر کی جائے۔
خشوع میں کمی ہوجائے تو مایوس ہونے کے بجائے آئندہ نمازوں میں دل جمعی کی مشق اور اللہ تعالیٰ سے مدد طلب کی جائے۔
یہی اس عبادت کی روح اور اس کے مقصد کو سمجھنے کا راستہ ہے۔