اللہ تعالیٰ سے بڑھ کر بہترین جزا دینے والا کوئی نہیں، اسی سے اجر کی امید رکھنی چاہئے
عابدہ رحمانی
امریکہ
’جزاک اللہ خیر‘ محض شکریہ نہیں بلکہ اللہ تعالیٰ سے بہترین اجر کی دعا ہے۔
عابدہ رحمانی اپنی تحریر میں بتاتی ہیں کہ دوسروں کے ساتھ نیکی کرکے بدلے کی توقع رکھنا اکثر مایوسی اور تعلقات میں تلخی پیدا کرتا ہے۔
حقیقی سکون اسی میں ہے کہ انسان ہر بھلائی اللہ کی رضا کے لیے کرے، شکرگزاری اپنائے اور اپنے اعمال کا بہترین اجر اسی سے طلب کرے۔
میں اپنے گھر کا سامان اونے پونے داموں فروخت کرتے ہوئے دل گرفتہ تھی۔
خریدار سستا خرید کر خوش ہوتا ہے، لیکن بیچنے والے کے دل میں کبھی کبھی کسک رہ جاتی ہے۔
ترکی اور سعودی عرب سے آئے ایک خاندان نے بھی میرے گھر کی بہت سی چیزیں کم قیمت پر خرید لی تھیں۔
میں نے خاندان کے سربراہ کو فون کرکے کہا کہ یہ چیزیں میں نے خاصی مہنگی خریدی تھیں، اگر آپ کچھ دام بڑھا دیں تو اچھا ہوگا۔
اس نے فوراً جواب دیا: معاملہ طے ہوچکا ہے، ڈیل ہوچکی ہے، جزاک اللہ سسٹر۔
مزید پڑھیں
اس کا ’جزاک اللہ‘ میرے ذہن میں دیر تک گونجتا رہا۔
ہم روزمرہ زندگی میں کئی الفاظ محض عادتاً بول دیتے ہیں، ان کے معنی پر غور نہیں کرتے۔
لیکن اس لمحے مجھے احساس ہوا کہ اللہ تعالیٰ سے بہتر جزا دینے والا کوئی نہیں۔
دنیا کا نفع اور نقصان عارضی ہے، اصل کامیابی آخرت کی ہے۔
مسلمان کا ایمان اسے یہی سکھاتا ہے کہ ہر بھلائی کا بہترین اجر اپنے رب سے مانگے۔
ہماری گفتگو میں سبحان اللہ، الحمدللہ، ماشاء اللہ، بارک اللہ اور جزاک اللہ جیسے دعائیہ کلمات کتنی خوب صورتی سے شامل ہیں۔
بچپن میں ہم ’اللہ تمہارا بھلا کرے‘ یا ’خدا تمہارے ساتھ اچھا کرے‘ کہتے تھے۔
پھر شکریہ اور بہت بہت شکریہ کا رواج ہوا، اور انگریزی کے بڑھتے استعمال کے ساتھ ’تھینک یو‘ زبان پر چڑھ گیا۔
ہماری ایک منہ بولی امی تھیں۔
انہیں شکریہ کہنا گویا ناراض کرنے کے مترادف تھا۔
کہتیں: ’تم ہمیں اپنا نہیں سمجھتیں، اپنوں کو کون شکریہ کہتا ہے؟
مگر میں سوچتی تھی کہ شکریہ تو محبت اور قدر دانی کا اظہار ہے۔
اللہ تعالیٰ بھی قرآن میں بار بار شکر کی تلقین فرماتا ہے اور شکر گزار بندوں کو مزید نعمتوں کی خوش خبری دیتا ہے۔
جب ’جزاک اللہ‘ کہنا شروع کیا تو ایک عالمہ نے توجہ دلائی کہ ’جزاک اللہ خیر‘ کہا کرو، یعنی اللہ تمہیں بہترین بدلہ دے۔
یوں یہ دعا میری گفتگو کا حصہ بن گئی۔
اس کے جواب میں ’وایاکم‘، یعنی تمہیں بھی، کہنا سیکھا۔
محض شکریہ
نہیں بلکہ
اللہ سے
بہترین اجر
کی دعا ہے
ہم کسی کے ساتھ بھلائی کریں، تحفہ دیں یا مشکل وقت میں ساتھ کھڑے ہوں تو بدلے میں اس سے کچھ پانے کی توقع نہ رکھیں۔
ایک نیک دل بہن نے مجھے سمجھایا تھا:
ہر اچھا کام کرتے وقت دل میں کہو کہ یا اللہ، یہ تیری رضا کے لیے ہے اور اجر بھی تجھی سے چاہتی ہوں۔
اس نصیحت پر عمل آسان نہیں، مگر دل کو بہت سکون دیتا ہے۔
ہماری نانی کہا کرتی تھیں:
جو اچھا کرے اس کا بھی بھلا، جو نہ کرے اس کا بھی بھلا۔
اردو کا محاورہ ’نیکی کر، دریا میں ڈال‘ بھی یہی سبق دیتا ہے۔
دین اس سوچ کو مزید بلند کرتا ہے:
نیکی کسی دریا میں گم نہیں ہوتی، اللہ کے ہاں اس کا اجر محفوظ رہتا ہے۔
زندگی کی بہت سی تلخیاں توقعات سے جنم لیتی ہیں۔
ہم سوچتے ہیں کہ فلاں کی عیادت کی تھی، اس نے ہماری خیریت تک نہ پوچھی، کسی کو مہنگا تحفہ دیا، مگر جواب میں معمولی چیز ملی۔
ایسے حساب کتاب میں وقت بھی ضائع ہوتا ہے اور تعلقات میں تلخی بھی بڑھتی ہے۔
میں نے ایک دوست کو دیکھا جو شادی بیاہ کے تحفوں پر اپنا نام تک نہیں لکھتی تھیں۔
زندگی میں مختلف مزاج کے لوگوں سے واسطہ پڑا۔
کچھ بے لوث، مخلص اور مہربان تھے، کچھ خود غرض اور دوسروں کو تکلیف دینے والے۔
کچھ سے مل کر سکون ملتا تھا، کچھ کی باتیں دل پر بوجھ بن جاتی تھیں۔
جس نے مشکل میں ساتھ دیا، اسے بھی ’جزاک اللہ خیر‘ اور جس نے دکھ پہنچایا، اس کے معاملے میں بھی دل کو انتقام اور حساب کتاب سے آزاد رکھنے کی کوشش کرنی چاہئے۔
کینیڈا اور پھر امریکہ آکر مجھے دوبارہ ان بہنوں کی صحبت نصیب ہوئی جو دین کی خدمت اور علم کی اشاعت میں مصروف تھیں۔
مختلف ممالک سے تعلق رکھنے والے علما اور داعیات نئے ذرائع سے لوگوں تک دینی تعلیم پہنچا رہے ہیں۔
آن لائن کلاسوں اور نشستوں نے دور بیٹھے افراد کو بھی ایک دوسرے سے جوڑ دیا ہے۔
اس ماحول میں مجھے پھر یاد آیا کہ حقیقی اطمینان اللہ کی یاد اور صالح صحبت سے حاصل ہوتا ہے۔
قرآن مجید میں ارشاد ہے:
اور تم سب مل کر اللہ کی رسی کو مضبوطی سے تھام لو اور تفرقے میں نہ پڑو۔ (آل عمران: 103)
ان تمام بہنوں اور بھائیوں کے لیے، جو کسی صلے یا ستائش کی پروا کئے بغیر دوسروں کی بھلائی اور دین کی خدمت میں لگے ہیں، میرے دل سے یہی دعا نکلتی ہے:
جزاک اللہ خیر، جزاک اللہ خیراً کثیراً۔