خالد نواز چیمہ
جدہ
جدہ میں کبابش آرٹس کونسل کے زیرِ اہتمام یومِ دفاعِ پاکستان اور قائداعظم محمد علی جناحؒ کی برسی کی مناسبت سے ادبی تقریب منعقد ہوئی، جس میں شعرا، اہلِ قلم اور کمیونٹی شخصیات نے قائداعظمؒ اور شہدائے وطن کو خراجِ عقیدت پیش کیا۔
کبابش آرٹس کونسل کے زیرِ اہتمام جدہ کے ایک مقامی ہوٹل میں یومِ دفاعِ پاکستان اور قائداعظم محمد علی جناحؒ کی برسی کی مناسبت سے ایک پروقار اور یادگار ادبی تقریب کا انعقاد کیا گیا، جس میں اہلِ قلم، شعرا اور پاکستانی کمیونٹی کی نمایاں شخصیات نے شرکت کی۔
تقریب کے شرکاء نے قائداعظم محمد علی جناحؒ کی عظیم قیادت، قیامِ پاکستان کے لیے ان کی تاریخی جدوجہد اور وطنِ عزیز کے دفاع میں اپنی جانوں کا نذرانہ پیش کرنے والے شہدائے وطن کو نثر و نظم کے ذریعے بھرپور خراجِ عقیدت پیش کیا۔
◆ OVERSEAS POST | HIGHLIGHTS تقریب کے اہم نکات ⌄
- جدہ میں کبابش آرٹس کونسل کے زیرِ اہتمام پروقار ادبی تقریب منعقد ہوئی۔
- تقریب یومِ دفاعِ پاکستان اور قائداعظم محمد علی جناحؒ کی برسی کی مناسبت سے منعقد کی گئی۔
- اہلِ قلم، شعرا اور پاکستانی کمیونٹی کی اہم شخصیات نے شرکت کی۔
- قائداعظمؒ اور شہدائے وطن کو نثر و نظم کے ذریعے خراجِ عقیدت پیش کیا گیا۔
- تقریب میں ملی نغمے، کلامِ اقبال اور شعری نشست بھی شامل تھی۔
- نمایاں خدمات کے اعتراف میں مہمانوں کو یادگاری شیلڈز پیش کی گئیں۔
تقریب کی صدارت بزرگ شاعر نعیم حامد الحامد نے کی، جبکہ پریس قونصلر چوہدری عرفان مہمانِ خصوصی اور پاکستان انٹرنیشنل اسکول جدہ کے سابق پرنسپل عتیق الرحمن مہمانِ اعزاز تھے۔
تقریب کا آغاز قاری محمد آصف کی تلاوتِ کلامِ پاک سے ہوا، جبکہ احمد بن زبیر نے بارگاہِ رسالتﷺ میں نعتِ رسولِ مقبولﷺ پیش کرنے کی سعادت حاصل کی۔
مزید پڑھیں
بعد ازاں خوش الحان محمد نواز جنجوعہ نے کلامِ اقبال پیش کرکے حاضرین کے دلوں کو گرمایا۔
احمد بن زبیر نے معروف ملی نغمہ ’اے وطن کے سجیلے جوانو، میرے نغمے تمہارے لیے ہیں‘ پیش کیا، جس سے محفل حب الوطنی کے جذبات سے سرشار ہوگئی۔
تقریب سے خطاب کرتے ہوئے آر جے فواد، ڈاکٹر آصف علی خان اور
انجینئر افضل غازی نے قائداعظم محمد علی جناحؒ کی اصول پسندی، بے مثال قیادت اور قیامِ پاکستان کے لیے ان کی تاریخی جدوجہد کو خراجِ تحسین پیش کیا۔
مقررین نے کہا کہ پاکستان ایک عظیم مقصد اور بے شمار قربانیوں کے نتیجے میں معرضِ وجود میں آیا۔
وطن کی آزادی، سلامتی اور خودمختاری کے تحفظ کے لیے پاک فوج کے جوانوں اور شہدائے وطن کی قربانیاں قومی تاریخ کا روشن اور ناقابلِ فراموش باب ہیں۔
انہوں نے کہا کہ نئی نسل کو تحریکِ پاکستان، قائداعظم کے افکار اور ملک کے دفاع کے لیے دی جانے والی قربانیوں سے آگاہ کرنا وقت کی اہم ضرورت ہے تاکہ قومی یکجہتی اور حب الوطنی کا جذبہ مزید مضبوط ہو۔
تقریب کی شعری نشست میں فیصل طفیل، عمران اعوان، آفتاب ترابی، بنت الحسن، اطہر نفیس عباسی اور صدرِ محفل نعیم حامد الحامد نے اپنا منظوم کلام پیش کیا۔
شعرا کے ولولہ انگیز اشعار میں قائداعظمؒ سے عقیدت، وطن سے محبت، قومی یکجہتی اور شہدائے پاکستان کو خراجِ عقیدت کے جذبات نمایاں تھے۔ حاضرین نے شعرا کے کلام کو بھرپور داد دی۔
◎ OVERSEAS POST | COMMUNITY تقریب کی نمایاں شخصیات ⌄
تقریب کی نظامت کبابش آرٹس کونسل کے صدر اور معروف شاعر آفتاب ترابی نے انتہائی شائستہ، خوبصورت اور ادبی انداز میں کی۔ ان کی برجستہ نظامت اور موقع کی مناسبت سے پیش کیے گئے اشعار نے تقریب کے ماحول کو مزید دلنشیں اور یادگار بنا دیا۔
تقریب کا ایک اہم پہلو مختلف شخصیات کی خدمات کا اعتراف بھی تھا۔ اس موقع پر کبابش آرٹس کونسل کے چیئرمین ملک علی خورشید سلطان نے پریس قونصلر چوہدری عرفان اور عتیق الرحمن کو ان کی خدمات کے اعتراف میں یادگاری شیلڈز پیش کیں۔
شرکاء نے اس اقدام کو سراہتے ہوئے کہا کہ معاشرے اور پاکستانی کمیونٹی کے لیے مثبت اور نمایاں خدمات انجام دینے والی شخصیات کی حوصلہ افزائی ایک قابلِ تحسین روایت ہے، جسے جاری رہنا چاہئے۔
تقریب کے اختتام پر وطنِ عزیز پاکستان کی سلامتی، استحکام، ترقی و خوشحالی اور شہدائے وطن کے درجات کی بلندی کے لیے خصوصی دعا کی گئی۔
شرکاء نے اس عزم کا اظہار کیا کہ پاکستان سے محبت، قومی یکجہتی اور نئی نسل تک تحریکِ پاکستان، قائداعظمؒ کے افکار اور شہدائے وطن کی قربانیوں کا پیغام پہنچانے کا سلسلہ جاری رکھا جائے گا۔