فلپائن کے دارالحکومت منیلا کے نینوئے اکینو انٹرنیشنل ایئرپورٹ پر سعودی ایئرلائنز کے بوئنگ 787-9 اور فلپائن ایئرلائنز کے ایئربس A320 کے درمیان گراؤنڈ پر معمولی تصادم پیش آیا۔
حادثے میں کوئی زخمی نہیں ہوا، تاہم جدہ جانے والی سعودی ایئرلائنز کی پرواز SV871 منسوخ کر دی گئی جبکہ دونوں طیاروں کا تکنیکی معائنہ اور سرکاری تحقیقات جاری ہیں۔
فلپائن کے دارالحکومت منیلا کے نینوئے اکینو انٹرنیشنل ایئرپورٹ پر سعودی ایئرلائنز اور فلپائن ایئرلائنز کے دو طیارے گراؤنڈ پر نقل و حرکت کے دوران معمولی تصادم کا شکار ہوگئے، تاہم اس واقعے میں کوئی جانی نقصان یا زخمی ہونے کی اطلاع نہیں ملی۔
حکام نے فوری طور پر تحقیقات کا آغاز کر دیا ہے جبکہ سعودی ایئرلائنز نے مسافروں کی سفری سہولت کے لیے متبادل انتظامات شروع کر دیے ہیں۔
العربیہ سے گفتگو کرتے ہوئے سعودی گروپ کے جنرل منیجر برائے کارپوریٹ کمیونیکیشن انجینئر عبداللہ الشہرانی نے بتایا کہ سعودی ایئرلائنز کا طیارہ رن وے کی طرف ٹیکسی کرتے ہوئے ایک دوسرے طیارے کے قریب سے گزرا، جہاں اس کے بازو کا سرا دوسرے طیارے سے معمولی طور پر ٹکرا گیا۔
Philippine Airlines Airbus A320-214 damaged after being hit by a Saudia Boeing 787-9 Dreamliner at Manila Ninoy Aquino International Airport, Philippines.
— Breaking Aviation News & Videos (@aviationbrk) July 8, 2026
Flight SV871 was scheduled to fly to Jeddah when it struck the tail of the parked A320 during taxi, damaging PAL plane's… pic.twitter.com/MSwnK7I9MO
مزید پڑھیں
انہوں نے کہا کہ تمام مسافروں اور عملے کو بحفاظت طیارے سے اتار لیا گیا اور کسی کے زخمی ہونے کی اطلاع نہیں ملی۔
انہوں نے مزید کہا کہ سعودی ایئرلائنز متعلقہ حکام کے ساتھ مکمل تعاون کر رہی ہے اور متاثرہ مسافروں کو ان کی منزل تک پہنچانے کے لیے ہر ممکن مدد فراہم کی جا رہی ہے۔
دوسری جانب فلپائن ایئرلائنز نے بھی اپنے بیان میں تصدیق کی کہ حادثے
میں کوئی زخمی نہیں ہوا، تاہم احتیاطی تدابیر کے تحت متعلقہ طیارے کو سروس سے نکال کر تکنیکی معائنے کے لیے بھیج دیا گیا ہے۔
اس حادثے کے بعد سعودی ایئرلائنز کی جدہ جانے والی پرواز SV871 منسوخ کر دی گئی۔ فلائٹ ٹریکنگ ڈیٹا کے مطابق رجسٹریشن HZ-AR12 رکھنے والا سعودی طیارہ تاحال منیلا ایئرپورٹ پر موجود ہے، جہاں اس کا تکنیکی معائنہ اور سرکاری تحقیقات جاری ہیں۔
اس واقعے کو فلپائن کے بڑے ذرائع ابلاغ نے نمایاں انداز میں رپورٹ کیا۔
مقامی میڈیا کے مطابق فلپائن کی سول ایوی ایشن اتھارٹی نے دونوں ایئرلائنز کے تعاون سے تحقیقات شروع کر دی ہیں تاکہ حادثے کی اصل وجوہات اور ذمہ داریوں کا تعین کیا جا سکے۔
ہوابازی کی اصطلاح میں اس نوعیت کے واقعے کو ’گراؤنڈ کولیشن‘ Ground Collision کہا جاتا ہے، جو اس وقت پیش آتا ہے جب طیارے رن وے، ٹیکسی وے یا ایئرپورٹ کی پارکنگ ایریا میں حرکت کر رہے ہوں۔
یہ حادثہ ٹیک آف یا لینڈنگ کے دوران پیش آنے والے فضائی حادثات سے مختلف ہوتا ہے۔
ماہرین کے مطابق نینوئے اکینو انٹرنیشنل ایئرپورٹ کئی برسوں سے شدید فضائی ٹریفک اور محدود گراؤنڈ اسپیس کے باعث دباؤ کا شکار ہے، جس کے باعث مصروف اوقات میں اس نوعیت کے زمینی حادثات کے امکانات بڑھ جاتے ہیں۔
تاحال سعودی ایئرلائنز اور فلپائن ایئرلائنز کی جانب سے حادثے کی حتمی وجہ یا طیاروں کو پہنچنے والے نقصان کی تفصیلات جاری نہیں کی گئیں، جبکہ سرکاری تحقیقاتی رپورٹ کا انتظار کیا جا رہا ہے، جس میں واقعے کی مکمل وجوہات اور آئندہ اقدامات کی وضاحت کی جائے گی۔