سعودی ٹورازم اتھارٹی کے ’سعودی سمر 2026‘ پروگرام میں طائف موسمِ گرما کی نمایاں ترین سیاحتی منزل کے طور پر سامنے آیا ہے۔
الہدا، الشفا، طائفی گلاب کے باغات، سوق عکاظ اور تاریخی قصر شبرا سمیت متعدد قدرتی و ثقافتی مقامات خاندانوں اور خلیجی سیاحوں کو اپنی جانب متوجہ کر رہے ہیں، جبکہ ڈیجیٹل پلیٹ فارمز کے ذریعے سفری منصوبہ بندی بھی پہلے سے زیادہ آسان بنا دی گئی ہے۔
سعودی ٹورازم اتھارٹی کے تحت ’سعودی سمر 2026‘ مہم ’ہمارا موسمِ گرما، ہماری پسند‘ کے عنوان کے ساتھ جاری ہے، جس میں طائف کو موسمِ گرما کی سب سے مقبول سیاحتی منزل کے طور پر پیش کیا جا رہا ہے۔
خوشگوار موسم، دلکش قدرتی مناظر، تاریخی ورثہ اور خاندانی تفریحی سرگرمیوں کی بدولت طائف ملک بھر اور خلیجی ممالک سے آنے والے سیاحوں کی توجہ کا مرکز بن گیا ہے۔
اس سال کے پروگرام میں ریاض، جدہ، بحیرۂ احمر، العلا، مکہ مکرمہ، مدینہ منورہ، عسیر، الباحہ اور طائف سمیت مجموعی طور پر نو سیاحتی مقامات شامل ہیں، جہاں خاندانوں، نوجوانوں اور خلیجی ممالک سے آنے والے زائرین کے لیے خصوصی سیاحتی تجربات ترتیب دیے گئے ہیں۔
طائف میں ہر عمر کے افراد کے لیے متعدد پرکشش مقامات موجود ہیں۔
الہدا کی بلند و بالا پہاڑیاں اپنے شاندار مناظر کے باعث سیاحوں کی پسندیدہ منزل ہیں، جبکہ الشفا کا سرسبز علاقہ، اس کے باغات اور قدرتی ماحول سکون اور تازگی کا احساس دلاتے ہیں۔ اس کے علاوہ الردف پارک، کنگ فہد پارک اور مشہور طائفی گلاب کے کھیت بچوں اور خاندانوں کو تفریح کے ساتھ ساتھ تعلیمی اور عملی تجربات بھی فراہم کرتے ہیں۔
ثقافتی اور تاریخی حوالے سے بھی طائف ایک منفرد مقام رکھتا ہے۔
تاریخی سوق عکاظ اور قصر شبرا شہر کے نمایاں ثقافتی ورثے میں شامل ہیں، جبکہ جدید شاپنگ سینٹرز اور انڈور تفریحی مراکز سیاحوں کو ایک مکمل خاندانی تجربہ فراہم کرتے ہیں، جہاں قدرتی حسن اور تاریخی عظمت ایک ساتھ نظر آتی ہے۔
سیاحوں کی سہولت کے لیے ’روح السعودية‘ پلیٹ فارم پر اہم تقریبات، سیاحتی مقامات اور خصوصی آفرز کی معلومات دستیاب ہیں، جبکہ ’عروض السعودية‘ پلیٹ فارم کے ذریعے رہائش، ٹرانسپورٹ اور مختلف سیاحتی سرگرمیوں کی یکجا پیشکش کی جاتی ہے۔
خاندانوں اور بچوں کے لیے خصوصی پیکجز بھی فراہم کیے گئے ہیں، تاکہ سفر کی منصوبہ بندی سے لے کر تعطیلات کے اختتام تک ہر مرحلہ آسان، آرام دہ اور یادگار بن سکے۔