خالد نواز چیمہ
جدہ
اوورسیز ایمپلائمنٹ کارپوریشن OEC حکومتِ پاکستان اور مڈل ایسٹ ہیلتھ کیئر کمپنی، مملکتِ سعودی عرب کے درمیان 15 جون 2026ء کو جدہ کے علاقے الزہراء میں واقع کمپنی کے ہیڈکوارٹر میں ایک مفاہمتی یادداشت MoU پر دستخط کیے گئے۔
حکومتِ پاکستان کی جانب سے اس معاہدے پر پاکستان کے قونصل جنرل برائے جدہ، سید مصطفیٰ ربانی نے دستخط کیے۔
مفاہمتی یادداشت کا مقصد سعودی عرب میں پاکستانی صحت کے شعبے سے تعلق رکھنے والے اہل اور پیشہ ور افراد کی بھرتی اور تعیناتی کے حوالے سے باہمی تعاون کو فروغ دینا ہے۔
مزید پڑھیں
یہ معاہدہ حکومتِ پاکستان کے اس عزم کا عکاس ہے کہ ہنر مند اور تربیت یافتہ طبی ماہرین کے لیے بیرونِ ملک روزگار کے مواقع میں اضافہ کیا جائے اور صحت کے شعبے میں پاکستان اور سعودی عرب کے درمیان دوطرفہ تعاون کو مزید مضبوط بنایا جائے۔
مڈل ایسٹ ہیلتھ کیئر کمپنی خطے کی ایک نمایاں طبی خدمات فراہم کرنے والی کمپنی ہے، جو متعدد اسپتالوں اور طبی مراکز کا
وسیع نیٹ ورک چلا رہی ہے اور اعلیٰ معیار کی طبی سہولیات کی فراہمی کے لیے معروف ہے۔
معاہدے کے تحت کمپنی اپنے بڑھتے ہوئے افرادی قوت کے تقاضوں کو پورا کرنے کے لیے پاکستانی ڈاکٹروں، نرسوں اور دیگر طبی معاون عملے کی بھرتی کے امکانات کا جائزہ لے گی۔
اس موقع پر خطاب کرتے ہوئے قونصل جنرل سید مصطفیٰ ربانی نے پاکستان کے اعلیٰ مہارت یافتہ طبی افرادی قوت کو اجاگر کیا اور کہا کہ یہ شراکت داری پاکستانی پیشہ ور افراد کے لیے روزگار کے قیمتی مواقع پیدا کرے گی، جبکہ دونوں برادر ممالک کے درمیان اقتصادی تعلقات اور عوامی روابط کو مزید مستحکم بنانے میں بھی معاون ثابت ہوگی۔
یہ مفاہمتی یادداشت پاکستان سے ہنر مند طبی افرادی قوت کی برآمد کے فروغ، بیرونِ ملک روزگار کے مواقع میں اضافے اور زرمبادلہ کی آمد بڑھانے کی حکومتی کوششوں میں ایک اہم سنگِ میل کی حیثیت رکھتی ہے۔