سعودی عرب کی معیشت نے 2026 کی پہلی سہ ماہی میں 3 فیصد حقیقی نمو ریکارڈ کیا ہے، جس میں غیر تیل شعبے نے سب سے بڑا کردار ادا کیا۔
تیل اور غیر تیل دونوں سرگرمیوں میں 2.9 فیصد اضافہ ہوا جبکہ سرکاری سرگرمیاں 1.5 فیصد بڑھیں۔
مالیاتی، انشورنس اور کاروباری خدمات سب سے تیزی سے ترقی کرنے والے شعبے رہے۔
سعودی محکمہ شماریات کے مطابق 2026 کی پہلی سہ ماہی میں حقیقی مجموعی قومی پیداوار GDP میں سالانہ بنیادوں پر 3 فیصد اضافہ ریکارڈ کیا گیا ہے۔
ادارے کے مطابق یہ نمو معیشت کے تمام بڑے شعبوں میں مثبت کارکردگی کے باعث ممکن ہوئی، جہاں تیل اور غیر تیل دونوں شعبوں نے 2.9 فیصد ترقی کی جبکہ سرکاری سرگرمیوں میں 1.5 فیصد اضافہ ہوا۔
مزید پڑھیں
اعداد و شمار کے مطابق غیر تیل شعبہ معیشت کی ترقی کا سب سے بڑا محرک ثابت ہوا اور اس نے مجموعی نمو میں 1.7 فیصد پوائنٹس کا حصہ ڈالا، جبکہ تیل کے شعبے کا حصہ 0.8 فیصد رہا۔
سرکاری سرگرمیوں اور مصنوعات پر خالص ٹیکسز نے بالترتیب 0.3 اور 0.2 فیصد کا مثبت کردار ادا کیا۔
شعبہ جاتی کارکردگی میں مالیاتی، انشورنس اور کاروباری خدمات نے
سب سے زیادہ 5.4 فیصد ترقی ریکارڈ کی، جبکہ صنعتی و مینوفیکچرنگ سرگرمیوں ’تیل ریفائننگ کے علاوہ‘ میں 4 فیصد اضافہ ہوا۔
خام تیل اور قدرتی گیس کی سرگرمیوں میں بھی 3.6 فیصد سالانہ نمو دیکھی گئی۔
سرکاری اخراجات میں نمایاں اضافہ دیکھنے میں آیا، جہاں سرکاری حتمی مصرفی اخراجات 11.3 فیصد بڑھ گئے، جبکہ نجی شعبے کے اخراجات میں 5.3 فیصد اضافہ ہوا۔
اسی طرح مستقل سرمایہ کاری میں 3.9 فیصد نمو ریکارڈ کی گئی۔
بیرونی تجارت کے شعبے میں سعودی برآمدات 1.4 فیصد بڑھیں، جبکہ درآمدات میں 5.5 فیصد کمی ریکارڈ کی گئی، جو تجارتی توازن کے لیے مثبت اشارہ تصور کی جا رہی ہے۔
تاہم موسمی اثرات کو مدنظر رکھتے ہوئے سہ ماہی بنیاد پر حقیقی جی ڈی پی میں 1.2 فیصد کمی ریکارڈ کی گئی، جس کی بنیادی وجہ تیل کی سرگرمیوں میں 6.8 فیصد کمی رہی، جبکہ غیر تیل شعبہ 0.3 فیصد اور سرکاری سرگرمیاں 1.4 فیصد بڑھنے میں کامیاب رہیں۔