ورلڈ کپ 2026 فٹبال کی تاریخ کا سب سے جدید ٹورنامنٹ ثابت ہونے جا رہا ہے، جہاں مصنوعی ذہانت سے چلنے والی گیند، تھری ڈی پلیئر ماڈلز، اسمارٹ آف سائیڈ سسٹم، ریفری کیمرے، روبوٹک کتے اور اینٹی ڈرون ٹیکنالوجی کھیل اور سکیورٹی دونوں شعبوں میں نئی مثال قائم کریں گے۔
فٹبال کی دنیا ایک نئی ٹیکنالوجیکل انقلاب کے دہانے پر کھڑی ہے۔
امریکا، کینیڈا اور میکسیکو کی مشترکہ میزبانی میں منعقد ہونے والا فیفا ورلڈ کپ 2026 نہ صرف 48 ٹیموں اور 104 میچوں کے باعث تاریخ کا سب سے بڑا عالمی ٹورنامنٹ ہوگا بلکہ مصنوعی ذہانت، ڈیجیٹل نگرانی اور اسمارٹ ریفری سسٹمز کے استعمال کے حوالے سے بھی ایک نئی مثال قائم کرے گا۔
فیفا نے اعلان کیا ہے کہ ورلڈ کپ میں استعمال ہونے والی نئی سرکاری گیند ’ٹریونڈا‘ Trionda جدید سینسرز سے لیس ہوگی۔
اس گیند میں نصب آئی ایم یو IMU چپ ہر سیکنڈ میں 500 مرتبہ ڈیٹا ریکارڈ کرے گی، جس کے ذریعے گیند کی رفتار، سمت اور حرکت کو انتہائی باریکی سے مانیٹر کیا جائے گا۔
مزید پڑھیں
یہ معلومات براہِ راست ویڈیو اسسٹنٹ ریفری VAR سسٹم تک پہنچیں گی، جس سے آف سائیڈ اور دیگر متنازع فیصلوں میں زیادہ درستگی ممکن ہوگی۔
ورلڈ کپ 2026 میں پہلی بار کھلاڑیوں کے تھری ڈی ڈیجیٹل اوتار بھی تیار کیے جائیں گے۔
فیفا اور Lenovo کے اشتراک سے ہر کھلاڑی کا ایک سیکنڈ کے اندر مکمل
ڈیجیٹل اسکین کیا جائے گا، جس کے بعد اس کا 3 جہتی ماڈل تیار ہوگا۔
یہ ماڈلز ٹی وی نشریات اور اسٹیڈیم اسکرینوں پر استعمال کیے جائیں گے تاکہ آف سائیڈ سمیت دیگر فیصلوں کو زیادہ واضح انداز میں دکھایا جا سکے۔
شائقین کو میچ کا نیا زاویہ فراہم کرنے کے لیے ریفریوں کی وردی میں خصوصی کیمرے بھی نصب کیے جائیں گے۔
اس سے ناظرین میدان میں ہونے والے واقعات کو عین ریفری کی نظر سے دیکھ سکیں گے، جو نشریاتی دنیا میں ایک منفرد تجربہ ہوگا۔
فیفا آف سائیڈ کے فیصلوں کو مزید تیز اور درست بنانے کے لیے سیمی آٹومیٹڈ آف سائیڈ ٹیکنالوجی کا جدید ورژن بھی متعارف کرا رہا ہے۔
نئی ٹیکنالوجی صرف 10 سینٹی میٹر تک کی معمولی آف سائیڈ پوزیشن کا بھی فوری پتہ لگا سکے گی، جبکہ ریفری کو براہ راست ہیڈسیٹ کے ذریعے آڈیو الرٹ موصول ہوگا۔
اس سے کھیل میں غیر ضروری تاخیر کم ہوگی اور کھلاڑیوں کو ممکنہ چوٹوں سے بھی بچایا جا سکے گا۔
دوسری جانب سکیورٹی کے میدان میں بھی غیرمعمولی اقدامات کیے جا رہے ہیں۔
میکسیکو نے اعلان کیا ہے کہ ورلڈ کپ کے دوران اسٹیڈیموں کے اطراف روبوٹک کتوں کو تعینات کیا جائے گا۔
4 ٹانگوں والے یہ جدید روبوٹس حساس علاقوں میں گشت کریں گے اور لائیو ویڈیو فیڈ سکیورٹی اہلکاروں تک پہنچائیں گے، تاکہ کسی بھی ہنگامی صورتحال کا فوری جائزہ لیا جا سکے۔
علاوہ ازیں میزبان ممالک نے ڈرونز سے ممکنہ خطرات کے پیش نظر خصوصی اینٹی ڈرون سسٹمز نصب کرنے کا فیصلہ کیا ہے۔
فوجی نگرانی کے جدید نظام اسٹیڈیموں کے اطراف فضائی حدود کی مسلسل نگرانی کریں گے اور مشکوک ڈرون سرگرمیوں کا فوری پتہ لگا کر انہیں ناکارہ بنانے کی صلاحیت رکھتے ہوں گے۔
ماہرین کے مطابق ورلڈ کپ 2026 صرف فٹبال کا میلہ نہیں بلکہ مصنوعی ذہانت، ڈیجیٹل تجزیات، خودکار نگرانی اور جدید سکیورٹی ٹیکنالوجیز کا عملی امتحان بھی ہوگا، جو مستقبل میں عالمی کھیلوں کے تمام بڑے ایونٹس کے لیے ایک نیا معیار قائم کر سکتا ہے۔