امریکا، کینیڈا اور میکسیکو میں منعقد ہونے والے فیفا ورلڈ کپ 2026 کے آغاز میں چند ہی دن باقی ہیں اور سعودی شائقین کی نظریں قومی ٹیم پر مرکوز ہیں۔
یونانی کوچ جورجوس دونیس کی قیادت میں سعودی ٹیم گروپ ایچ میں اسپین، یوراگوئے اور کیپ ورڈے کے خلاف میدان میں اترے گی، جبکہ ہدف ناک آؤٹ مرحلے تک رسائی حاصل کرنا ہے۔
امریکا، کینیڈا اور میکسیکو کی مشترکہ میزبانی میں ہونے والے فیفا ورلڈ کپ 2026 کا آغاز قریب آتے ہی دنیا بھر میں فٹبال کا جوش و خروش عروج پر پہنچ گیا ہے۔
سعودی عرب میں بھی شائقین اپنی قومی ٹیم کی کارکردگی کے منتظر ہیں، جو اس بار ایک مشکل مگر دلچسپ گروپ میں شامل ہے۔
فیفا ورلڈ کپ: تازہ ترین خبروں اور رپورٹس کے لیے کلک کریں
سعودی ٹیم کو گروپ ایچ میں اسپین، یوراگوئے اور کیپ ورڈے کا سامنا ہوگا۔
شائقین کو امید ہے کہ ٹیم کم از کم بہترین تیسرے نمبر پر آنے والی ٹیموں میں جگہ بنا کر اگلے مرحلے تک رسائی حاصل کر سکتی ہے، کیونکہ نئے فارمیٹ کے تحت تیسرے نمبر پر آنے والی بعض ٹیموں کو بھی ناک آؤٹ مرحلے میں کھیلنے کا موقع ملے گا۔
مزید پڑھیں
سعودی عرب اس ٹورنامنٹ میں یونانی کوچ جورجوس دونیس کی قیادت میں حصہ لے رہا ہے، جو سعودی فٹبال سے اچھی طرح واقف ہیں۔
انہوں نے ماضی میں سعودی پرو لیگ کے متعدد کلبوں کی کوچنگ کی ہے، جن میں آخری ٹیم الخلیج تھی۔
سعودی شائقین کو امید ہے کہ دونیس ٹیم کو 1994 کے بعد پہلی بار ورلڈ کپ کے ناک آؤٹ مرحلے تک پہنچانے میں کامیاب ہوں گے۔
گروپ کا مضبوط ترین حریف اسپین کو قرار دیا جا رہا ہے، جو عالمی فٹبال کی بڑی طاقتوں میں شمار ہوتا ہے۔
اگرچہ ہسپانوی ٹیم کو چند کھلاڑیوں کی فٹنس سے متعلق خدشات کا سامنا ہے، تاہم نوجوان اسٹار لامین یامال اور مڈفیلڈ کے ستون روڈری کی موجودگی اسپین کو ٹائٹل کے مضبوط امیدواروں میں شامل کرتی ہے۔
سعودی عرب اپنا پہلا میچ یوراگوئے کے خلاف کھیلے گا، جسے گروپ کا ایک اور سخت حریف سمجھا جا رہا ہے۔
جنوبی امریکی ٹیم تجربہ کار کوچ مارسیلو بیلسا کی نگرانی میں میدان میں اترے گی اور اس کے شائقین ایک اور یادگار ورلڈ کپ مہم کے لیے پُرامید ہیں۔
دوسری جانب کیپ ورڈے کو گروپ کی نسبتاً کمزور ٹیم تصور کیا جا رہا ہے، لیکن افریقی ٹیم اپ سیٹ کرنے کی صلاحیت رکھتی ہے۔
ورلڈ کپ کوالیفائنگ مرحلے میں اس کی شاندار کارکردگی، خصوصاً کیمرون جیسی مضبوط ٹیم کو باہر کرنے کے بعد، اسے ایک خطرناک حریف بنا چکی ہے۔
کوچ پیڈرو لیتاؤ بریٹو اپنی ٹیم سے ٹورنامنٹ میں مثبت نتائج کی توقع رکھتے ہیں۔