ورلڈ کپ 2026 سے قبل ایرانی فٹبال ٹیم ویزا تنازعے میں گھر گئی ہے۔
متعدد اہلکاروں کو امریکی ویزے نہ ملنے پر ایران نے فیفا سے شکایت کی ہے، جبکہ ٹیم انتظامی رکاوٹوں کے باوجود ٹورنامنٹ میں بھرپور شرکت کے لیے پُرعزم ہے۔
فیفا ورلڈ کپ 2026 کے آغاز سے چند روز قبل ایرانی فٹبال ٹیم کو بڑے انتظامی بحران کا سامنا کرنا پڑ گیا۔
ایرانی وفد بالآخر میکسیکو کے شہر تیخوانا پہنچ گیا، جو ٹورنامنٹ کے دوران ٹیم کا عارضی مرکز ہوگا، تاہم امریکا کے ویزوں کے اجرا میں تاخیر اور بعض اہلکاروں کو مکمل طور پر ویزا نہ ملنے پر تہران نے شدید احتجاج کیا ہے۔
ایرانی قومی ٹیم کے کوچ امیر قلعہ نویی نے ٹیم کی تاخیر سے آمد پر ناراضی کا اظہار کرتے ہوئے کہا کہ کھلاڑیوں کو شمالی امریکا کے وقت اور ماحول سے ہم آہنگ ہونے کے لیے زیادہ وقت درکار تھا، لیکن ویزا مسائل کے باعث تیاریوں کا شیڈول متاثر ہوا۔
مزید پڑھیں
ترکیہ میں ایرانی سفارت خانے کے مطابق کوچنگ اور انتظامی عملے کے متعدد ارکان کو امریکی ویزے جاری نہیں کیے گئے۔
ایرانی حکام نے اسے امتیازی اور جان بوجھ کر اختیار کیا گیا رویہ قرار دیتے ہوئے فیفا سے امریکا کے خلاف کارروائی اور قواعد کی مبینہ خلاف ورزیوں کا نوٹس لینے کا مطالبہ کیا ہے۔
کشیدگی اس وقت مزید بڑھ گئی جب میکسیکو میں ایران کے سفیر نے
انکشاف کیا کہ ٹیم کو بتایا گیا ہے کہ ویزا شرائط کے مطابق کھلاڑیوں اور وفد کو میچ کے روز ہی امریکا میں داخل ہونا اور اسی روز واپس نکلنا ہوگا، جس نے نئی تشویش پیدا کر دی۔
ایرانی ٹیم کے کپتان احسان حاج صفی نے ویزوں کے اجرا میں طویل تاخیر پر تنقید کرتے ہوئے کہا کہ ان مسائل نے ٹیم کو مشکلات سے دوچار کیا، تاہم کھلاڑی مکمل طور پر تیار ہیں اور ان کا تمام تر فوکس میدان میں بہترین کارکردگی دکھانے پر ہے۔
امریکا میں میچز
- 15 جون: نیوزی لینڈ کے خلاف، لاس اینجلس
- 21 جون: بیلجیم کے خلاف، لاس اینجلس
- 26 جون: مصر کے خلاف، سیئٹل
یہ پہلا موقع ہوگا کہ ورلڈ کپ کی میزبانی کرنے والا ملک ایسی ٹیم کی میزبانی کرے گا جس کے ملک کے ساتھ اس کی براہِ راست جنگ جاری ہے۔