ورلڈ کپ 2026 میں شرکت کے لیے امریکا پہنچنے والی عراقی قومی ٹیم کو غیرمتوقع مشکلات کا سامنا کرنا پڑا، جب امریکی حکام نے ٹیم کے سرکاری فوٹوگرافر طلال صلاح کو 12 گھنٹے حراست میں رکھنے کے بعد ملک میں داخل ہونے کی اجازت دینے سے انکار کر دیا۔
اس سے قبل قومی ٹیم کے اسٹار فارورڈ ایمن حسین کو بھی کئی گھنٹے ایئرپورٹ پر روکے رکھا گیا تھا۔
عراقی فٹبال ٹیم کو فیفا ورلڈ کپ 2026 سے قبل امریکا پہنچتے ہی غیر متوقع مشکلات کا سامنا کرنا پڑا، جب امریکی حکام نے قومی ٹیم کے سرکاری فوٹوگرافر طلال صلاح کو ملک میں داخل ہونے کی اجازت دینے سے انکار کر دیا۔
العربیہ ڈاٹ نیٹ سے گفتگو کرتے ہوئے عراقی فٹبال فیڈریشن کے ایک ذریعے نے بتایا کہ طلال صلاح کو شکاگو کے بین الاقوامی ہوائی اڈے پر پہنچنے کے فوراً بعد امیگریشن حکام نے روک لیا۔
انہیں تقریباً 12 گھنٹے تک حراست میں رکھا گیا، مختلف مراحل پر پوچھ گچھ کی گئی، تاہم بالآخر امریکی حکام نے انہیں امریکا میں داخل ہونے کی اجازت نہیں دی۔
مزید پڑھیں
ذرائع کے مطابق فوٹوگرافر اب عراق واپس روانہ ہوں گے اور وہ ورلڈ کپ کے دوران قومی ٹیم کے میڈیا وفد کا حصہ نہیں رہ سکیں گے۔
یہ واقعہ ایسے وقت پیش آیا جب عراقی ٹیم پہلے ہی سفری پیچیدگیوں کا سامنا کر رہی تھی۔
ٹیم کے معروف اسٹرائیکر ايمن حسين کو بھی شکاگو ایئرپورٹ پر تقریباً 7 گھنٹے تک روکے رکھا گیا تھا۔
بعد ازاں انہیں داخلے کی اجازت مل گئی اور وہ ٹیم کے تربیتی کیمپ میں شامل ہو گئے۔
عراقی فٹبال فیڈریشن نے ابھی تک امریکی حکام کی جانب سے داخلے سے انکار کی وجوہ کے بارے میں کوئی باضابطہ تفصیل جاری نہیں کی، جبکہ امریکی حکام کی جانب سے بھی اس حوالے سے کوئی سرکاری بیان سامنے نہیں آیا۔
کھیلوں کے مبصرین کے مطابق ورلڈ کپ جیسے بڑے عالمی ایونٹ سے قبل کسی ٹیم کے میڈیا اور انتظامی وفد کے رکن کو داخلے سے روکنا غیرمعمولی واقعہ سمجھا جاتا ہے، کیونکہ فوٹوگرافرز اور میڈیا اہلکار ٹیم کی سرگرمیوں، تربیتی سیشنز، پریس کانفرنسوں اور سرکاری دستاویزات کی کوریج میں اہم کردار ادا کرتے ہیں۔
واضح رہے کہ عراق کی قومی ٹیم فیفا ورلڈ کپ 2026 میں گروپ I کا حصہ ہے، جہاں اسے مضبوط حریفوں ناروے، فرانس اور سینیگال کا سامنا کرنا ہوگا۔
عراقی شائقین کو امید ہے کہ ٹیم میدان کے اندر ان مشکلات کو پسِ پشت ڈال کر بہتر کارکردگی کا مظاہرہ کرے گی، تاہم امریکا میں داخلے کے دوران پیش آنے والے حالیہ واقعات نے ٹیم کی تیاریوں پر سوالات ضرور کھڑے کر دیے ہیں۔