1994 کے ورلڈ کپ میں ارجنٹائن کو ٹائٹل کا مضبوط امیدوار سمجھا جا رہا تھا، مگر ڈیاگو میراڈونا کی اچانک معطلی نے پوری ٹیم کی قسمت بدل دی۔
فٹبال کے اس عظیم ستارے کی غیر موجودگی نے ارجنٹائن کو کمزور کر دیا اور بالآخر ٹیم ٹورنامنٹ سے باہر ہوگئی، جبکہ دنیا بھر میں مارادونا کے مداحوں نے اس فیصلے کے خلاف احتجاج کیا۔
دیگو مارادونا کو اس بات کا اندازہ بھی نہیں تھا کہ یونان کے خلاف گول کرنے کے بعد کیمرے کے سامنے ان کی مشہور چیخ دراصل قومی ٹیم کی جرسی میں ان کی آخری خوشی ثابت ہوگی۔
چند ہی دن بعد فٹبال کی اس عظیم ترین شخصیت کو ڈوپنگ کے الزام میں معطل کر دیا گیا اور وہ دوبارہ کبھی ارجنٹائن کے لیے میدان میں نہ اتر سکے۔
اس فیصلے نے دنیا بھر میں ان کے مداحوں کو غم و غصے میں مبتلا کر دیا۔
کہیں ٹورنامنٹ حکام کے پتلے جلائے گئے تو کہیں فیفا صدر کے خلاف احتجاجی مظاہرے ہوئے۔
امریکا میں منعقد ہونے والے 1994 کے ورلڈ کپ میں ارجنٹائن مضبوط ترین امیدواروں میں شمار ہوتا تھا۔
ٹیم 1986 کی عالمی چیمپئن تھی اور 1990 کے فائنل تک بھی پہنچی تھی، جہاں اسے مغربی جرمنی کے ہاتھوں شکست کا سامنا کرنا پڑا تھا۔
تاہم میراڈونا کی معطلی نے ارجنٹائن کی امیدوں کو شدید دھچکا پہنچایا۔
ٹیم گروپ مرحلے کے آخری میچ میں بلغاریہ سے ہار گئی اور پھر راؤنڈ آف 16 میں جورجی ہیگی کی قیادت میں رومانیہ کے ہاتھوں ٹورنامنٹ سے باہر ہوگئی۔
دوسری جانب پڑوسی ملک برازیل نے اٹلی کو پنالٹی شوٹ آؤٹ میں شکست دے کر تاریخ میں چوتھی مرتبہ ورلڈ کپ اپنے نام کر لیا۔
مزید پڑھیں
العربیہ کے مطابق 1986 کے ورلڈ کپ میں میراڈونا نے فٹبال کی تاریخ کی عظیم ترین انفرادی کارکردگیوں میں سے ایک پیش کرتے ہوئے نسبتاً عام سمجھی جانے والی ارجنٹائنی ٹیم کو عالمی چیمپئن بنایا تھا۔
اسی لیے 1994 کے عالمی کپ میں ان کی غیر موجودگی کے اثرات کا اندازہ بہت کم لوگوں کو تھا۔
1990 کے ورلڈ کپ فائنل میں شکست کے بعد میراڈونا کی زندگی
مشکلات کا شکار ہوگئی۔
نیپلز کے مداحوں کے ساتھ ان کا تعلق کمزور پڑ گیا اور وہ یورپ چھوڑ کر بیونس آئرس واپس آگئے۔
1991 میں کوکین استعمال کرنے پر انہیں 14 ماہ کی پابندی کا سامنا کرنا پڑا۔
اس دوران ان کا نام منشیات کی اسمگلنگ، ٹیکس معاملات اور اطالوی مافیا گروہ ’کامورا‘ سے تعلقات کی افواہوں سے بھی جوڑا جاتا رہا۔
1994 کے ورلڈ کپ سے قبل بیشتر مبصرین میراڈونا کو نظرانداز کر چکے تھے، مگر انہوں نے حیران کن انداز میں واپسی کی اور صرف ایک ماہ میں تقریباً 12 کلوگرام وزن کم کر لیا۔
امریکا 1994 ورلڈ کپ میں ارجنٹائن کے دفاعی کھلاڑی روبرٹو سینسینی نے معروف جریدے فور فور ٹو کو بتایا:
مارادونا عام انسانوں جیسے نہیں تھے۔
وہ ہر وہ کام کر سکتے تھے جس کا ہم تصور بھی نہیں کر سکتے تھے۔
ان کے بائیں پاؤں میں غیرمعمولی جادو تھا اور وہ ہمیشہ فٹبال کی تاریخ کا حصہ رہیں گے۔ مجھے یقین ہے کہ اگر انہیں معطل نہ کیا جاتا تو ہم 1994 کا ورلڈ کپ جیت لیتے۔
ہمارے پاس ایک غیرمعمولی ٹیم موجود تھی۔
سینسینی نے مزید کہا:
میں نے پہلے پارما کے ساتھ اطالوی لیگ نہ جیتنے کے افسوس کا ذکر کیا تھا، لیکن 1994 کے ورلڈ کپ کا دکھ شاید اس سے بھی بڑا ہے۔
ہمارے پاس فرناندو ریڈونڈو، دیگو سیمیونے اور گیبریل باتیستوتا جیسے عالمی معیار کے ستارے موجود تھے۔
لیکن دیاگو کے اخراج کے بعد ہم نے اپنا رہنما اور قائد کھو دیا۔
ہم اپنی ذہنیت تبدیل نہ کر سکے اور نہ ہی ان کے بغیر ایک متحد ٹیم کی طرح کھیل سکے۔ مجھے یقین ہے کہ اگر میراڈونا ہمارے ساتھ رہتے تو ہم ورلڈ کپ جیت جاتے۔
مارادونا کی معطلی نے دنیا بھر میں ان کے مداحوں کو غم و غصے میں مبتلا کر دیا۔
بنگلہ دیش میں شائقین نے ٹورنامنٹ حکام کے پتلے نذرِ آتش کیے اور فائنل میچ کے خلاف علامتی احتجاج کا اعلان کیا۔
دارالحکومت ڈھاکا میں ’بنگلہ دیش یوتھ میراڈونا سپورٹرز کلب‘ نامی گروپ نے فیصلہ کیا کہ وہ ورلڈ کپ فائنل شروع ہونے کے بعد ایک منٹ تک اپنے ٹیلی ویژن سیٹ بند رکھ کر احتجاج ریکارڈ کرائیں گے۔
دوسری جانب جیسور شہر میں فٹبال شائقین نے فیفا کے اُس وقت کے صدر کا پتلا نذرِ آتش کیا اور میراڈونا کی معطلی کے خلاف مظاہرہ کیا۔
مظاہرین نے میراڈونا کو ٹورنامنٹ سے باہر کرنے کے فیصلے کو ’غیر قانونی‘ اور ’سازش‘ قرار دیتے ہوئے مطالبہ کیا کہ انہیں فوری طور پر ورلڈ کپ میں واپس شامل کیا جائے۔
یوں یونان کے خلاف کیا گیا ایک گول، کیمرے کے سامنے لگائی گئی ایک چیخ اور پھر اچانک آنے والی پابندی، فٹبال کی تاریخ کے سب سے المناک ابواب میں سے ایک بن گئی۔
دیاگو میراڈونا کا ورلڈ کپ 1994 صرف چند میچوں پر مشتمل تھا، مگر اس کی گونج آج بھی فٹبال کے شائقین کے دلوں میں سنائی دیتی ہے۔