تاریخ کے اوراق پلٹیں تو دریائے فرات کا نام سب سے پہلے تہذیبوں کے گہوارے یعنی ’میزوپوٹیمیا‘ (بین النہرین) ، جس کا موجودہ نام عراق ہے، کے ساتھ جڑتا ہے۔
مزید پڑھیں
لیکن کیا آپ جانتے ہیں کہ وہ دریا جسے ہم آج اپنی آنکھوں سے دیکھتے ہیں، لاکھوں سال پہلے ایسا نہیں تھا؟
نئی سائنسی تحقیق نے اس قدیم دریا کے بارے میں ایسے انکشافات کیے ہیں جو اس کے وجود کی بنیادوں ہی کو ہلا کر رکھ دیتے ہیں۔
ایک نہیں، 2دریا: فرات کا قدیم ماضی
جریدے نیچر جیو سائنس میں شائع ہونے والی ایک تحقیق کے مطابق
دریائے فرات کا موجودہ نظام لاکھوں سال پہلے وجود ہی نہیں رکھتا تھا۔ اس وقت یہ ایک نہیں، بلکہ 2 الگ الگ دریا تھے۔
- پالیو-کاراسو (Paleo-Karasu) اور پالیو-مرات (Paleo-Murat): یہ دونوں دریا اناطولیہ (ترکی) سے نکل کر خلیج عرب کے بجائے بحیرہ روم کی طرف بہتے تھے۔
جب بحیرہ روم سوکھ گیا تھا
آج سے تقریباً 60 لاکھ سال قبل، بحیرہ روم ایک ہولناک جغرافیائی بحران سے گزرا جسے ’مسینی سالینٹی کرائسز‘(Messinian Salinity Crisis) کہا جاتا ہے۔ اس دوران:
- بحیرہ روم کا رابطہ بحر اوقیانوس سے کٹ گیا، جس سے اس کا پانی بری طرح خشک اور نمکین ہو گیا۔
- یہ دریا انہی خشک اور گہرے گڑھوں (بیسن) میں گرتے تھے جو آج بحیرہ روم کا فرش ہیں۔
- تحقیق بتاتی ہے کہ اس وقت ان دریاؤں کا بہاؤ آج کے دریائے نیل، فرات اور دجلہ کے مشترکہ بہاؤ سے بھی زیادہ طاقتور تھا۔
زمین کی حرکت اور فرات کا نیا جنم
جیولوجیکل تبدیلیوں اور پلیٹ ٹیکٹونکس کی وجہ سے اناطولیہ کی زمین آہستہ آہستہ اوپر اٹھنے لگی۔
اس طرح لاکھوں سال تک جاری رہنے والی زلزلے کی سرگرمیوں اور زمین کے کٹاؤ (Faulting) نے ان دریاؤں کا راستہ بدل دیا۔
- پہلے ایک دریا نے مشرق کی طرف مڑنا شروع ہوا، پھر کروڑوں سال بعد دوسرا دریا اس کے ساتھ شامل ہو گیا اور یوں لاکھوں سال کی کشمکش کے بعد دریائے فرات اپنے موجودہ راستے پر استوار ہوا۔
- سائنسی اندازوں کے مطابق فرات نے اپنی موجودہ شکل محض 16 لاکھ سال قبل اختیار کی، جو جیولوجی کے پیمانے پر بہت قلیل عرصہ ہے۔
’ہلالِ زرخیز‘ کی تعمیر: ایک اتفاق یا قدرت کا کرشمہ؟
یہ جغرافیائی تبدیلی محض ایک قدرتی عمل نہیں تھی، بلکہ اسی نے انسانی تاریخ کو بدل کر رکھ دیا۔
- جب دریاؤں نے اپنے راستے بدل کر مشرق کی طرف رخ کیا، تو انہوں نے وسیع اور زرخیز میدانی علاقے تخلیق کیے، جنہیں ہم آج ’ہلالِ زرخیز‘(Fertile Crescent) کے نام سے جانتے ہیں۔
- اگر یہ دریا بحیرہ روم ہی میں گرتے رہتے تو شاید آج میزوپوٹیمیا میں وہ تہذیبیں اور شہر آباد نہ ہوتے جنہوں نے دنیا کو زراعت، قانون اور لکھائی کا فن سکھایا۔
نیل اور فرات کا قرب
تحقیق کا ایک اور دلچسپ پہلو یہ ہے کہ ایک دور ایسا بھی آیا تھا جب فرات اور نیل کے قدیم نظام ایک دوسرے کے انتہائی قریب آ گئے تھے اور ان کے درمیان فاصلہ صرف 25 کلومیٹر رہ گیا تھا۔
یہ دونوں دنیا کے عظیم ترین دریا کسی ایک دور میں جغرافیائی طور پر ایک دوسرے کو چھونے کے قریب تھے۔
اگرچہ یہ تحقیق جیولوجی کی دنیا میں ایک زبردست انقلاب ہے، لیکن محققین کا کہنا ہے کہ یہ اب بھی ایک مضبوط مفروضہ (Hypothesis) ہے۔
قدیم دریاؤں کے راستوں کا تعین کرنا ایک مشکل کام ہے کیونکہ اس کا انحصار زیادہ تر زلزلے کے اعداد و شمار اور ٹیکنالوجی ماڈلز پر ہے۔
مزید حتمی ثبوتوں کے لیے زمینی سطح پر معدنیات اور مٹی کے نمونوں کا تجزیہ کرنا ابھی باقی ہے۔
یہ تحقیق ہمیں بتاتی ہے کہ زمین ساکت نہیں، بلکہ ایک زندہ وجود کی طرح مسلسل کروٹیں بدل رہی ہے۔ دریائے فرات کا آج بہنا اس بات کا ثبوت ہے کہ لاکھوں سال کی جغرافیائی جنگوں نے کیسے تہذیبوں کی بنیاد رکھی۔