امریکا اور ایران کے درمیان بڑھتی ہوئی کشیدگی، اسٹریٹیجی کمپنی کی جانب سے بٹ کوائن کی فروخت اور ETF فنڈز سے مسلسل سرمایہ نکالے جانے کے باعث بٹ کوائن دو ماہ کی کم ترین سطح پر آ گئی۔
قیمت 70 ہزار ڈالر سے نیچے گرنے کے بعد ماہرین مارکیٹ میں ممکنہ ساختی تبدیلی کے خدشات ظاہر کر رہے ہیں۔
امریکی اور ایرانی کشیدگی میں اضافے اور کرپٹو کرنسی ذخیرہ کرنے والی کمپنی اسٹریٹیجی Strategy Inc کی جانب سے بٹ کوائن کی غیر معمولی فروخت کے باعث سرمایہ کاروں میں بے یقینی بڑھ گئی، جس کے نتیجے میں بٹ کوائن تقریباً دو ماہ بعد پہلی بار 70 ہزار ڈالر سے نیچے آ گئی۔
یورپی منڈیوں کے ابتدائی کاروبار میں بٹ کوائن کی قیمت 2.4 فیصد کمی کے ساتھ 69,660 ڈالر تک گر گئی، جو 8 اپریل کے بعد اس کی کم ترین سطح ہے۔
اس کے ساتھ دیگر ڈیجیٹل کرنسیاں بھی دباؤ کا شکار رہیں، جن میں ایتھیریم، سولانا اور کئی دیگر کرپٹو ٹوکن شامل ہیں۔
مزید پڑھیں
الشرق کے مطابق کرپٹو مارکیٹ کی ماہر کیرولین مورون نے کہا ہے جغرافیائی سیاسی غیر یقینی صورتحال اور اسٹریٹیجی کمپنی کے کرپٹو ذخائر سے متعلق خدشات بٹ کوائن پر شدید دباؤ ڈال رہے ہیں۔
مایکل سیلر کی قیادت میں کام کرنے والی اسٹریٹیجی نے پیر کے روز 2022 کے آخر کے بعد پہلی مرتبہ بٹ کوائن فروخت کرنے کا اعلان کیا۔
کمپنی نے تقریباً 25 لاکھ ڈالر مالیت کی بٹ کوائن فروخت کی، جو اس
کی طویل عرصے سے جاری خریداری کی پالیسی سے ہٹ کر ایک علامتی اقدام سمجھا جا رہا ہے۔
دوسری جانب امریکی اسپاٹ بٹ کوائن ETF فنڈز بھی مارکیٹ پر منفی اثر ڈال رہے ہیں۔ بلومبرگ کے مطابق ان فنڈز سے مسلسل گیارہویں روز سرمایہ نکالا گیا، جو اب تک کا طویل ترین انخلا سلسلہ ہے۔
اس دوران سرمایہ کار تقریباً 3.5 ارب ڈالر مارکیٹ سے نکال چکے ہیں۔
فالکن ایکس FalconX کے ایشیا پیسیفک خطے کے ڈیریویٹو ٹریڈنگ سربراہ شان میک نلٹی نے خبردار کیا کہ اگر بٹ کوائن روزانہ یا ہفتہ وار بنیاد پر 70 ہزار ڈالر سے نیچے مستحکم ہو جاتی ہے تو یہ محض خبروں کا وقتی ردِعمل نہیں بلکہ مارکیٹ کے ڈھانچے میں ایک بڑی تبدیلی تصور کی جائے گی۔