حج 1447 ہجری کے دوران ضیوفِ رحمن کی منیٰ آمد کامیابی سے مکمل ہوگئی، جبکہ سکیورٹی، صحت اور ٹرانسپورٹ اداروں نے مربوط منصوبوں کے تحت حجاج کی سلامتی، علاج اور آمدورفت کے لیے وسیع انتظامات کیے۔
جعلی حج مہمات اور خلاف ورزیوں میں کمی بھی ریکارڈ کی گئی۔
حج 1447 ہجری کے انتظامات کے تحت حجاج کرام کی مشعرِ منیٰ میں آمد مکمل ہوگئی ہے۔ حجاج کرام یومِ ترویہ گزارنے اور منیٰ میں قیام کے لیے انتہائی منظم انداز میں پہنچے، جہاں سے انہیں صبح مشعرِ عرفات روانہ کیا جائے گا۔
متعلقہ اداروں کے مطابق اس سال سکیورٹی، صحت اور ٹرانسپورٹ کے تمام منصوبے مکمل ہم آہنگی کے ساتھ نافذ کیے جا رہے ہیں تاکہ حجاج کو محفوظ، منظم اور آرام دہ ماحول فراہم کیا جا سکے۔
وزارتِ داخلہ کے ترجمان بریگیڈیئر طلال الشلہوب نے حج 1447 ہجری کی دوسری پریس بریفنگ میں بتایا کہ حجاج کی منیٰ آمد کے دوران ٹریفک کی روانی اطمینان بخش رہی اور ہجوم کے انتظام کے لیے تیار کردہ منصوبے کامیابی سے آگے بڑھ رہے ہیں۔
مزید پڑھیں
انہوں نے کہا کہ مقدس مقامات تک بغیر اجازت حجاج کو پہنچانے کے الزام میں 231 افراد کو گرفتار کیا گیا، جبکہ 246 جعلی حج مہمات بھی پکڑی گئیں۔ ان کے مطابق یہ اعداد و شمار اس بات کی نشاندہی کرتے ہیں کہ اس سال خلاف ورزیوں میں کمی آئی ہے۔
بریگیڈیئر الشلہوب نے واضح کیا کہ تمام سکیورٹی ادارے مختلف سرکاری محکموں کے ساتھ مکمل رابطے میں کام کر رہے ہیں تاکہ حجاج کو
مناسک کی ادائیگی کے دوران امن و امان اور تحفظ فراہم کیا جا سکے۔
انہوں نے ’بغیر اجازت حج نہیں‘ مہم پر عمل درآمد کی اہمیت پر زور دیتے ہوئے کہا کہ حج قوانین کی خلاف ورزی کرنے والوں کے خلاف سخت کارروائی کی جائے گی۔
جدید ٹیکنالوجی اور مصنوعی ذہانت کی مدد سے خلاف ورزیوں کی نگرانی کی جا رہی ہے، جبکہ آپریشن رومز ميدانی اور ابلاغی سطح پر تمام متعلقہ اداروں سے منسلک ہیں۔
انہوں نے بتایا کہ مشاعرِ مقدسہ میں بغیر اجازت داخلے اور غیر قانونی قیام کی خلاف ورزیوں میں بھی کمی ریکارڈ کی گئی ہے، جس کی بڑی وجہ سکیورٹی اداروں کی مشترکہ کوششیں اور جدید تکنیکی نظام ہے۔
انہوں نے حجاج سے اپیل کی کہ وہ حج سے متعلق تمام ہدایات اور قوانین کی پابندی کریں تاکہ ان کی سلامتی یقینی بنائی جا سکے۔
وزارتِ صحت نے
19 لاکھ 50 ہزار
سے زائد طبی
خدمات فراہم کیں
دوسری جانب وزارتِ صحت کے ترجمان عبدالعزیز عبدالباقی نے حجاج کی مجموعی صحت کی صورتحال کو مستحکم قرار دیتے ہوئے کہا کہ اب تک کسی وبائی بیماری یا ایسے صحت خطرے کا اندراج نہیں ہوا جو ضیوفِ رحمن کی سلامتی کو متاثر کرے۔
انہوں نے بتایا کہ مکہ مکرمہ اور مشاعرِ مقدسہ میں قائم اسپتالوں اور طبی مراکز کے ذریعے مربوط منصوبوں کے تحت طبی خدمات فراہم کی جا رہی ہیں۔
عبدالعزیز عبدالباقی کے مطابق وزارتِ صحت نے اس سال ’صحت کی استطاعت‘ کے تصور کو فروغ دینے پر خصوصی توجہ دی ہے، جس کے تحت صحت سے متعلق شرائط، احتیاطی پروگرام اور آگاہی مہمات نافذ کی گئی ہیں۔
ان اقدامات کا مقصد حجاج کو ممکنہ صحت خطرات سے محفوظ رکھنا اور مناسک کی ادائیگی کے دوران انہیں بہتر طبی سہولت فراہم کرنا ہے۔
انہوں نے بتایا کہ اب تک 19 لاکھ 50 ہزار سے زائد طبی خدمات فراہم کی جا چکی ہیں، جن میں 2 لاکھ 92 ہزار سے زیادہ احتیاطی خدمات شامل ہیں۔
ایمرجنسی وارڈز میں 28 ہزار سے زائد مریضوں کا علاج کیا گیا، جبکہ 41 ہزار سے زیادہ حجاج نے صحت مراکز اور فوری طبی سہولیات سے استفادہ کیا۔
بیرونی مریضوں کے کلینکس میں بھی 4 ہزار سے زائد افراد کو طبی خدمات فراہم کی گئیں۔
وزارتِ صحت کے ترجمان نے مزید کہا کہ طبی امدادی ٹیموں نے 76 ہزار سے زائد ہنگامی کیسز سے نمٹا، 4 ہزار سے زیادہ مریضوں کو اسپتالوں میں داخل کیا گیا، جبکہ کال سینٹر “937” کو ایک لاکھ 20 ہزار سے زائد کالز اور استفسارات موصول ہوئے۔
اسی طرح 222 دل کی شریانوں کے آپریشن، 13 اوپن ہارٹ سرجریز اور 318 سے زائد دیگر جراحی آپریشن کیے گئے۔ گرمی سے متاثر ہونے والے 28 حجاج مکمل صحت یاب ہوچکے ہیں اور اپنے مناسک جاری رکھے ہوئے ہیں۔
ٹرانسپورٹ اور لاجسٹک نظام کے ترجمان عبدالعزیز العتیبی نے بتایا کہ حجاج کی نقل و حرکت کے لیے آپریشنل تیاریاں مکمل ہیں۔
اس سال 5 ہزار سے زائد ٹیکسیاں، 46 ہزار سے زیادہ ملازمین، 100 سے زائد آپریشنل منصوبے، 33 ہزار بسیں اور 100 فضائی کمپنیوں کے ذریعے 30 لاکھ سے زائد نشستیں فراہم کی گئی ہیں۔