پاکستان نے امریکا اور ایران کے درمیان ممکنہ معاہدے میں چین کو ضامن بنانے پر زور دیا ہے۔
وزیراعظم شہباز شریف اور چینی صدر شی جن پنگ کی بیجنگ میں اہم ملاقات کے دوران خطے کی صورتحال، سفارتی کوششوں اور مشرق وسطیٰ میں امن کے امکانات پر تبادلہ خیال کیا گیا، جبکہ چین نے بھی خطے میں استحکام کے لیے تعاون کی خواہش ظاہر کی۔
ایران جنگ کے خاتمے کے لیے جاری سفارتی کوششوں کے دوران چین اور پاکستان کے درمیان اعلیٰ سطحی رابطوں میں تیزی آگئی ہے، جہاں چینی صدر شی جن پنگ سے آج پیر کے روز بیجنگ میں پاکستانی وزیراعظم شہباز شریف نے ملاقات کی ہے۔
چینی سرکاری خبر رساں ایجنسی شِنہوا کے مطابق شہباز شریف نے اسی روز چین کے وزیراعظم لی چیانگ سے بھی ملاقات کی، جو ملکی قیادت میں دوسرے اہم ترین عہدیدار سمجھے جاتے ہیں۔
دوسری جانب ذرائع نے انکشاف کیا ہے کہ پاک فوج کے سربراہ جنرل عاصم منیر بھی چینی وزیراعظم کے ساتھ ہونے والی ملاقات میں وزیراعظم شہباز شریف کے ہمراہ شریک ہوئے۔
مزید پڑھیں
العربیہ کے ذرائع کے مطابق اسلام آباد اس بات پر زور دے رہا ہے کہ امریکا اور ایران کے درمیان کسی بھی ممکنہ معاہدے میں بیجنگ ضامن کا کردار ادا کرے۔
پاکستانی سرکاری ٹیلی ویژن کے مطابق امریکا اور ایران مذاکرات میں اہم کردار ادا کرنے والے جنرل عاصم منیر وزیراعظم شہباز شریف کے ہمراہ چین پہنچے، جہاں انہوں نے چینی سفارتکاروں سے ملاقاتیں کیں۔
چین نے بھی مشرق وسطیٰ میں جلد از جلد امن اور استحکام کی بحالی کے لیے پاکستان کے ساتھ تعاون کی خواہش کا اظہار کیا ہے۔
واضح رہے کہ وزیراعظم شہباز شریف ہفتے کے روز چین کے شہر ہانگژو کے چار روزہ سرکاری دورے پر روانہ ہوئے تھے، جس کا مقصد دونوں ممالک کے درمیان اسٹریٹجک شراکت داری کو مزید مضبوط بنانا ہے۔
یہ دورہ ایسے وقت میں ہورہا ہے جب پاکستان اور چین اپنے سفارتی تعلقات کے قیام کی 75ویں سالگرہ بھی منا رہے ہیں۔
پاکستانی دفتر خارجہ کے مطابق یہ دورہ دونوں ممالک کے درمیان اسٹریٹجک تعاون کو مزید وسعت دینے، باہمی اعتماد کو مضبوط بنانے اور مشترکہ مستقبل کے وژن کو آگے بڑھانے کا اہم موقع ہے۔