سعودی وزارتِ ہیومن ریسورسز نے نجی اور غیر منافع بخش شعبوں کے لئے عیدالاضحیٰ کی 4 روزہ تعطیلات کا اعلان کیا ہے۔
چھٹیاں 26 مئی 2026ء سے شروع ہوں گی اور ان کا اطلاق لیبر قانون کے ضوابط کے مطابق کیا جائے گا۔
وزارت ہیومن ریسورسز نے عیدالاضحیٰ 1447ھ کے موقع پر نجی اور غیر منافع بخش شعبوں کے ملازمین کے لیے سرکاری تعطیلات کا اعلان کر دیا ہے۔
وزارت کے مطابق عید کی چھٹیاں 4 دن پر مشتمل ہوں گی، جن کا آغاز یومِ عرفہ بروز منگل 9 ذوالحجہ 1447ھ، بمطابق 26 مئی 2026ء سے ہوگا۔
مزید پڑھیں
وزارت نے اپنے بیان میں کہا کہ تعطیلات کا اطلاق لیبر قانون کی ایگزیکٹو ریگولیشنز کے مطابق کیا جائے گا جبکہ ان تمام صورتوں کو بھی مدِنظر رکھا جائے گا جن کا ذکر ضابطے کی دفعہ 24 میں کیا گیا ہے۔
یہ شق ان حالات سے متعلق ہے جہاں عید کی تعطیلات ہفتہ وار چھٹی یا دیگر سرکاری تعطیلات کے ساتھ ہو جائیں۔
یہ اعلان ایسے وقت میں سامنے آیا ہے جب مملکت بھر میں عیدالاضحیٰ
اور حج سیزن کی تیاریاں عروج پر ہیں، جبکہ لاکھوں ملازمین اور کارکنان عید کی تعطیلات کے شیڈول کے منتظر تھے۔
توقع کی جا رہی ہے کہ مختلف نجی کمپنیاں اور ادارے اپنے داخلی نظام کے مطابق اضافی تعطیلات یا لچکدار اوقاتِ کار کا بھی اعلان کر سکتے ہیں۔
سعودی عرب میں عیدالاضحیٰ کی تعطیلات کے دوران سرکاری و نجی سطح پر سفری سرگرمیوں، خاندانی اجتماعات اور سیاحتی مقامات پر رش میں نمایاں اضافہ دیکھنے میں آتا ہے، جبکہ حج آپریشنز بھی اپنے عروج پر پہنچ جاتے ہیں۔