سعودی وزارتِ حج و عمرہ نے نئے عمرہ سیزن کا کیلنڈر جاری کر دیا ہے، جس کے مطابق عمرہ ویزوں کا اجرا 31 مئی 2026 سے شروع ہوگا جبکہ نسک ایپ کے ذریعے عمرہ پرمٹس یکم جون سے جاری کیے جائیں گے۔
وزارت نے معتمرین کے داخلے اور روانگی کی آخری تاریخیں بھی مقرر کر دی ہیں۔
سعودی وزارت حج و عمرہ نے آج اتوار کو 1448 ہجری کے نئے عمرہ سیزن کا باضابطہ کیلنڈر جاری کر دیا، جس میں عمرہ ویزوں کے اجرا، معتمرین کی آمد، الیکٹرانک خدمات، معاہدوں اور اجازت ناموں کے اہم اوقات شامل ہیں۔
یہ اقدام زائرین کے تجربے کو بہتر بنانے اور آپریشنل نظام کی کارکردگی بڑھانے کی کوششوں کا حصہ ہے۔
سعودی پریس ایجنسی کے مطابق وزارت نے کہا ہے کہ عمرہ ویزوں کا اجرا اور معتمرین کا مملکت میں داخلہ 14 ذی الحجہ 1447ھ، بمطابق 31 مئی 2026 سے شروع ہوگا۔
جبکہ مکہ مکرمہ میں معتمرین کے داخلے اور نسک ایپ کے ذریعے عمرہ پرمٹ جاری کرنے کا آغاز 15 ذی الحجہ، یکم جون 2026 سے کیا جائے گا۔
مزید پڑھیں
وزارت حج و عمرہ نے واضح کیا ہے کہ یکم شوال 1448ھ، بمطابق 9 مارچ 2027 عمرہ ویزے جاری کرنے کی آخری تاریخ ہوگی جبکہ 15 شوال 1448ھ، بمطابق 23 مارچ 2027 مملکت میں معتمرین کے داخلے کی آخری تاریخ مقرر کی گئی ہے۔
وزارت نے واضح کیا کہ 7 اپریل 2027 معتمرین کی مملکت سے روانگی کی آخری تاریخ ہوگی۔
وزارت نے عمرہ کمپنیوں اور بیرونی ایجنٹس کو ہدایت کی ہے کہ وہ مقررہ شیڈول اور ضوابط کی مکمل پابندی کریں تاکہ معتمرین کو اعلیٰ معیار کی خدمات فراہم کی جا سکیں۔
عمرہ سیزن 1448ھ کی تیاریوں کا آغاز کافی پہلے کر دیا گیا تھا۔
4 مارچ 2026 کو ابتدائی معاہدوں کے لیے عمرہ کمپنیوں اور بیرونی ایجنٹس کے درمیان ملاقاتوں کی بکنگ سروس شروع کی گئی تھی۔
اس کے بعد عمرہ و زیارہ فورم 2026 کا انعقاد 30 مارچ اور یکم اپریل 2026 کو کیا گیا، جہاں گزشتہ عمرہ سیزن سے حاصل ہونے والے تجربات اور نئے سیزن کے لیے مجوزہ حل و تجاویز پر تفصیلی تبادلہ خیال کیا گیا۔
وزارت نے 11 مئی 2026 کو بیرونی ایجنٹس کی اہلیت جانچنے اور عمرہ کمپنیوں کے حتمی معاہدوں کی منظوری کے لیے الیکٹرانک خدمات بھی متعارف کروائیں۔
اس کے علاوہ نسک ایپ کے ذریعے پیکجز، رہائش اور ٹرانسپورٹ خدمات کی ڈیزائننگ اور بکنگ کی سہولت بھی فراہم کی گئی ہے۔