حج سیزن کے دوران مسجد نبویؐ میں ہجوم کے نظم و نسق کا ایک جدید اور منظم نظام نمایاں طور پر دکھائی دیتا ہے، جو نمازیوں اور زائرین کی آمد و رفت کو خاص طور پر نماز کے اوقات میں اس انداز سے منظم کرتا ہے کہ عبادات پرسکون، منظم اور سہولت کے ماحول میں ادا کی جا سکیں۔
سبق ویب سائٹ کے مطابق مسجد نبویؐ انتظامیہ اور متعلقہ ادارے انتہائی منظم آپریشنل منصوبوں پر عمل کرتے ہیں، جنہیں نماز کے وقت سے کافی پہلے فعال کر دیا جاتا ہے۔
مزید پڑھیں
ان منصوبوں میں مسجد کے اندرونی حصوں اور صحنوں میں نمازیوں کی مناسب تقسیم، کم رش والے مقامات کی جانب رہنمائی، اور مختلف حصوں میں توازن برقرار رکھنا شامل ہے تاکہ اہم راستوں اور داخلی مقامات پر ازدحام سے بچا جا سکے۔
گراؤنڈ میں تربیت یافتہ ٹیمیں مختلف مقامات پر تعینات رہتی ہیں، جو نمازیوں کی براہِ راست رہنمائی، داخلی و خارجی راستوں کی تنظیم اور
ضرورت پڑنے پر متبادل راستے کھولنے کا کام انجام دیتی ہیں۔
اس سے ہجوم پر قابو رکھنے اور فوری ردعمل کو یقینی بنانے میں مدد ملتی ہے، خصوصاً فرض نمازوں کے اوقات میں جب رش میں اضافہ ہو جاتا ہے۔
جدید ٹیکنالوجی بھی ان کوششوں میں اہم کردار ادا کر رہی ہے۔
جدید نگرانی کے نظام انسانی ہجوم کی لمحہ بہ لمحہ نگرانی اور تجزیہ کرتے ہیں، جس کی بنیاد پر فوری آپریشنل فیصلے کیے جاتے ہیں، جیسے نمازیوں کو کم رش والے مقامات کی طرف منتقل کرنا یا راستوں میں تبدیلی کرنا، تاکہ مسجد اور اس کے صحنوں میں نقل و حرکت روانی سے جاری رہے۔
بزرگوں اور
خصوصی افراد
کے لیے
الگ نماز گاہیں
اور مخصوص راستے
مقرر کئے
گئے ہیں
زائرین کی رہنمائی کے لیے مختلف زبانوں میں ہدایتی بورڈز اور انٹرایکٹو اسکرینیں نصب کی گئی ہیں، جو مناسب داخلی و خارجی راستوں اور نماز کے مقامات تک پہنچنے کی معلومات فراہم کرتی ہیں۔
اس کا مقصد مختلف قومیتوں سے تعلق رکھنے والے زائرین کو آسانی فراہم کرنا اور انہیں تنظیمی ہدایات سے آگاہ رکھنا ہے۔
نماز کے اوقات میں نمازیوں کی مرحلہ وار آمد و رفت کے لیے خصوصی منصوبے نافذ کیے جاتے ہیں جبکہ بزرگ افراد اور خصوصی ضروریات رکھنے والوں کے لیے الگ نماز گاہیں اور مخصوص راستے مختص کیے گئے ہیں تاکہ ان کی حفاظت اور آسان نقل و حرکت یقینی بنائی جا سکے۔ اس کے ساتھ معاون خدمات بھی فراہم کی جا رہی ہیں تاکہ ان کے تجربے کو مزید بہتر بنایا جا سکے۔
یہ تمام اقدامات فیلڈ آپریشنز اور جدید ٹیکنالوجی کے باہمی اشتراک کی عکاسی کرتے ہیں، جو ایک ایسے لچکدار نظام کا حصہ ہیں جو نمازیوں کی تعداد میں تبدیلی کے مطابق خود کو ڈھالنے کی صلاحیت رکھتا ہے اور مسجد نبویؐ میں ہجوم کے مؤثر انتظام اور زائرین کو اعلیٰ معیار کی خدمات فراہم کرنے کو یقینی بناتا ہے۔