سعودی عرب کی حج سیکیورٹی فورسز نے بغیر حج اجازت نامے کے مکہ مکرمہ میں داخل ہونے کی کوشش کرنے والے 5 افغان مقیم افراد کو گرفتار کر لیا ہے۔
حکام کے مطابق مذکورہ افراد سیکیورٹی چیک پوائنٹس سے بچنے کے لیے صحرائی راستے سے پیدل چل کر مکہ مکرمہ داخل ہونے کی کوشش کر رہے تھے۔
مزید پڑھیں
سبق ویب سائٹ کے مطابق سیکیورٹی اداروں نے بروقت کارروائی کرتے ہوئے انہیں حراست میں لے لیا اور ان کے خلاف قانونی اقدامات شروع کر دیے گئے ہیں۔
سعودی حکام ہر سال حج سیزن میں بغیر اجازت حج کی کوششوں کے خلاف سیکیورٹی پلان نافذ کرتے ہیں تاکہ عازمینِ حج کی سلامتی، ہجوم پر قابو اور مقدس مقامات میں نظم و ضبط برقرار رکھا جا سکے۔
سعودی وزارتِ داخلہ اور پبلک سکیورٹی کے مطابق رواں سال بھی مکہ مکرمہ کے داخلی راستوں، صحرائی علاقوں اور اہم شاہراہوں پر سخت نگرانی جاری ہے۔
جدید ڈیجیٹل سسٹمز، اسمارٹ اسکیننگ، موبائل گشت اور ڈرون نگرانی کے ذریعے بغیر پرمٹ افراد کی نقل و حرکت پر نظر رکھی جا رہی ہے۔
بغیر اجازت
حج پر
بھاری جرمانے
ملک بدری
اور قید کی
سزائیں مقرر
حکام نے واضح کیا ہے کہ صرف سرکاری حج اجازت نامہ رکھنے والے افراد کو ہی مکہ مکرمہ اور مشاعر مقدسہ میں داخلے کی اجازت دی جا رہی ہے، جبکہ خلاف ورزی کرنے والوں کے خلاف سخت قانونی کارروائی عمل میں لائی جائے گی۔
سعودی حکام کے مطابق بغیر حج پرمٹ حج کی کوشش کرنے والوں پر بھاری جرمانے عائد کیے جا سکتے ہیں، جبکہ غیر ملکی مقیم افراد کو ملک بدر کرنے اور ایک مخصوص مدت تک دوبارہ سعودی عرب میں داخلے پر پابندی بھی لگائی جا سکتی ہے۔
اس کے علاوہ غیر قانونی طور پر حاجیوں کو منتقل کرنے یا سہولت فراہم کرنے والوں کے خلاف قید، بھاری جرمانے اور گاڑیوں کی ضبطی جیسی سزائیں بھی دی جا سکتی ہیں۔
پبلک سکیورٹی نے شہریوں اور مقیم غیر ملکیوں سے اپیل کی ہے کہ وہ حج قوانین اور ہدایات پر مکمل عمل کریں اور کسی بھی خلاف ورزی کی فوری اطلاع دیں۔
حکام کے مطابق مکہ مکرمہ، مدینہ منورہ، ریاض اور مشرقی علاقوں میں شکایات کے لیے 911 جبکہ دیگر علاقوں میں 999 نمبر پر رابطہ کیا جا سکتا ہے۔