تنزانیہ سے تعلق رکھنے والے سیامی بچوں ’نینسی اور نائس‘ کی علیحدگی کا پیچیدہ اور حساس آپریشن سعودی عرب کے پروگرام برائے سیامی بچوں کے تحت کامیابی سے انجام دے دیا گیا ہے جسے طبی اور انسانی میدان میں ایک بڑی کامیابی قرار دیا جا رہا ہے۔
سبق ویب سائٹ کے مطابق کئی گھنٹوں پر مشتمل اس نازک آپریشن میں ماہر سرجنز، اینستھیزیا اسپیشلسٹس، نرسنگ اسٹاف اور مختلف طبی شعبوں کے درجنوں ماہرین نے انتہائی مہارت اور باریک بینی سے حصہ لیا۔
مزید پڑھیں
سعودی طبی ٹیم نے اعلان کیا کہ آپریشن کے بنیادی مراحل کامیابی سے مکمل کر لیے گئے ہیں، جبکہ بعد از آپریشن دیکھ بھال اور آخری طبی مراحل جاری ہیں تاکہ دونوں بچوں کی صحت کو مکمل طور پر مستحکم بنایا جا سکے۔
آپریشن کے دوران اور کامیاب علیحدگی کے اعلان کے بعد اسپتال میں انتہائی جذباتی مناظر دیکھنے میں آئے۔
یہ سعودی پروگرام کے تحت ہونے والا 71 واں کامیاب آپریشن ہے
یہ پروگرام صرف طبی خدمات تک محدود نہیں بلکہ انسانی ہمدردی، عالمی تعاون اور جدید طبی مہارت کا عملی نمونہ بھی سمجھا جاتا ہے۔
سعودی عرب نے اس پروگرام کے ذریعے افریقہ، ایشیا اور دیگر خطوں سے تعلق رکھنے والے درجنوں خاندانوں کو نئی زندگی کی امید دی ہے۔
طبی ماہرین کے مطابق جڑے ہوئے بچوں کی علیحدگی دنیا کے مشکل ترین آپریشنز میں شمار ہوتی ہے، کیونکہ اس میں جسم کے مشترکہ اعضا، خون کی شریانوں اور اعصابی نظام کو انتہائی احتیاط کے ساتھ الگ کرنا پڑتا ہے۔
اسی لیے ایسے آپریشنز میں جدید طبی ٹیکنالوجی، وسیع تجربے اور مربوط ٹیم ورک کی ضرورت ہوتی ہے۔
’نینسی اور نائس‘ کی کامیاب علیحدگی کو سعودی عرب کے طبی شعبے کے لیے ایک اور تاریخی سنگِ میل قرار دیا جا رہا ہے، جس نے ایک بار پھر مملکت کی عالمی انسانی خدمات اور جدید طبی صلاحیتوں کو نمایاں کر دیا ہے۔