امریکی کم لاگت فضائی کمپنی Spirit Airlines نے آج ہفتے کے روز اپنی تمام پروازیں منسوخ کرنے اور آپریشن بند کرنے کا اعلان کیا ہے، کیونکہ وائٹ ہاؤس کا ممکنہ امدادی منصوبہ ناکام ہو گیا۔
یوں یہ ایران جنگ کے دوران ایندھن کی بڑھتی قیمتوں کے باعث بند ہونے والی پہلی ایئرلائن بن گئی۔
خبر رساں ادارے رائٹرز کے مطابق ذرائع نے بتایا کہ دیوالیہ قرار دی جانے والی اسپرٹ ایئرلائنز ہفتہ کی صبح تقریباً 3 بجے ’07:00 گرینچ وقت‘ آپریشن معطل کرنے کی تیاری کر رہی تھی۔ کمپنی کے بورڈ اجلاس میں بھی اسے بچانے کے لیے کوئی حتمی معاہدہ نہ ہو سکا۔
مزید پڑھیں
دوسری جانب ایسوسی ایٹڈ پریس نے رپورٹ کیا کہ کمپنی 34 سالہ خدمات کے بعد بند ہو رہی ہے اور اس نے اعلان کیا کہ ہم نے اب باقاعدہ طور پر اپنے آپریشنز کی مرحلہ وار بندش شروع کر دی ہے۔
ایئرلائن نے تمام پروازیں منسوخ کر دیں، کسٹمر سروس بھی بند کر دی گئی اور یقین دہانی کرائی کہ پہلے سے خریدی گئی ٹکٹوں کی رقم واپس کی جائے گی۔
اسپرٹ کے انہدام سے ہزاروں ملازمتیں ختم ہونے کا خدشہ ہے۔
کمپنی روزانہ سینکڑوں پروازیں چلاتی تھی اور تقریباً 17 ہزار افراد کو روزگار فراہم کرتی تھی۔
رائٹرز کے مطابق یہ صورتحال امریکی صدر ڈونلڈ ٹرمپ کے لیے بھی دھچکا ہے، جنہوں نے کمپنی کو بچانے کے لیے 500 ملین ڈالر کی تجویز دی تھی تاہم کانگریس میں کئی ریپبلکن اراکین اور ان کے قریبی مشیروں نے اس کی مخالفت کی۔
دیگر ایئرلائنز مسافروں کو متبادل سہولت دینے
کے لیے تیار
گزشتہ دو دہائیوں میں اس حجم کی کوئی امریکی ایئرلائن بند نہیں ہوئی، جبکہ ایک وقت میں اسپرٹ امریکا کی 5 فیصد فضائی پروازوں پر قابض تھی۔
اسپرٹ ایئرلائنز نے اپنی کم قیمت پالیسی کے ذریعے بڑی کمپنیوں کے مقابلے میں ٹکٹوں کی قیمتیں کم رکھنے میں اہم کردار ادا کیا۔
امریکی وزیر ٹرانسپورٹ شان ڈفی نے کہا کہ انہوں نے دیگر ایئرلائنز کو اسپرٹ خریدنے پر آمادہ کرنے کی کوشش کی لیکن کوئی خریدار سامنے نہیں آیا۔
ان کا کہنا تھا ’اگر کوئی اور خریدنے کو تیار نہیں تو ہم کیوں خریدیں؟‘۔
وائٹ ہاؤس نے دیگر ایئرلائنز سے بھی رابطہ کیا تاکہ اسپرٹ کے مسافروں کو متبادل سہولت فراہم کی جا سکے، جبکہ متعدد امریکی ایئرلائنز نے اس سلسلے میں تعاون کی تیاری ظاہر کی۔
یہ پیش رفت ظاہر کرتی ہے کہ ایران جنگ اور بڑھتی ہوئی ایندھن کی قیمتوں نے عالمی فضائی صنعت پر گہرے اثرات ڈالے ہیں۔