سمندری راستے سے آنے والا پہلا حج قافلہ جدہ پہنچ گیا ہے۔
محکمہ سرحدی محافظ نے آج جمعہ کو سوڈان سے آنے والے حجاج کا جدہ اسلامی بندرگاہ پر استقبال کیا ہے جہاں انہیں مربوط سیکیورٹی اور فیلڈ سروسز کے تحت خوش آمدید کہا گیا۔
سعودی پریس ایجنسی کے مطابق یہ اقدامات سرحدی محافظ ادارے کی زمینی اور بحری داخلی راستوں پر ذمہ داریوں کے تحت کئے جا رہے ہیں تاکہ داخلے کے عمل کو ہموار بنایا جا سکے، رہنمائی اور رہبری فراہم کی جائے اور حجاج کی آمد کے مراحل کو آسان بنایا جائے، جس سے ان کی سلامتی اور اطمینان کے ساتھ رسائی یقینی بنائی جا سکے۔
مزید پڑھیں
اسی تناظر میں بندرگاہوں کے محکمے کے صدر انجینئر سلیمان بن خالد المزروع نے بیت اللہ کے پہلے قافلے کا استقبال کیا ہے۔
اس قافلے میں سوڈان سے آنے والے 735 حجاج شامل تھے، جو ’الجودی‘ نامی بحری جہاز پر سوار تھے۔
یہ اقدام حج 1447ھ کے سیزن کے لیے بندرگاہ کی مکمل آپریشنل تیاری کا عکاس ہے۔
صدر محکمہ نے واضح کیا کہ ادارے نے مربوط آپریشنل نظام متحرک کیا ہے تاکہ حجاج کی آمد سے لے کر ان کی روانگی تک تمام مراحل کو انتہائی آسان اور منظم بنایا جا سکے۔
اس مقصد کے لیے 420 سے زائد اہلکار بندرگاہ کے مختلف مقامات پر تعینات کیے گئے ہیں، جن میں مسافر ہالز، جہاز رانی کے گھاٹ، اور زمینی ٹرمینل شامل ہیں جہاں 39 اہلکار خدمات انجام دے رہے ہیں۔
اسی طرح بحری آپریشنز میں 24 بحری رہنما، 30 ٹگ بوٹ کپتان، 14 بحری ٹریفک کوآرڈینیٹرز اور 5 ڈیٹا انٹری آپریٹرز شامل ہیں تاکہ کارروائیاں تیز اور مؤثر انداز میں مکمل ہوں۔
1300 مسافروں کی گنجائش کے ساتھ جدید ٹرمینلز تیار
مزید برآں ادارے نے اپنی سیکیورٹی اور آپریشنل موجودگی کو بھی مضبوط بنایا ہے، جس میں 49 سیکیورٹی اہلکار، 48 سیفٹی اسٹاف، 66 فائر فائٹرز، 22 ڈرائیورز اور پیرا میڈکس، اور 66 انجینئرنگ و انفراسٹرکچر کے عملے شامل ہیں۔
اس کے علاوہ حجاج اور ان کے سامان کی منتقلی کے لیے خصوصی سپورٹ ٹیمیں بھی تعینات کی گئی ہیں۔
استقبالی گنجائش بڑھانے کے لیے انتظامیہ نے آمد و روانگی کے ہالز کو 1300 سے زائد مسافروں کے لیے تیار کیا ہے، جبکہ پاسپورٹ کارروائی کے لیے 100 کاؤنٹرز، 13 سیکیورٹی و کسٹمز اسکینرز، 600 جدید سامان بردار ٹرالیاں، اور 50 وہیل چیئرز مہیا کی گئی ہیں، تاکہ بزرگوں، مریضوں اور خصوصی افراد کو سہولت فراہم کی جا سکے۔
یہ مکمل نظام جامع آپریشنل منصوبوں اور ہنگامی حکمت عملیوں کے تحت کام کر رہا ہے، تاکہ حجاج اور مسجد نبوی کے زائرین کو بہترین خدمات فراہم کی جا سکیں۔
بندرگاہ پر جدید بحری اور سیکیورٹی سہولیات بھی فراہم کی گئی ہیں، جن میں 10 ٹگ بوٹس ’آگ بجھانے اور آلودگی کنٹرول نظام سے لیس‘ 6 معاون بحری جہاز، 6 کچرا اٹھانے والی کشتیاں، 2 آلودگی کنٹرول جہاز، 10 فائر بریگیڈ گاڑیاں، 3 ایمبولینسز، 12 سیکیورٹی گشت گاڑیاں اور 19 سیفٹی و سپورٹ یونٹس شامل ہیں، تاکہ مختلف آپریشنل حالات سے مؤثر انداز میں نمٹا جا سکے۔