وزارتِ حج و عمرہ نے عازمین حج کے لیے سہولتوں کو مزید بہتر بنانے کے سلسلے میں ’نسک ڈیجیٹل کارڈ‘ کے استعمال پر زور دیا ہے، جسے جدید ٹیکنالوجی کے ذریعے حجاج کے پورے سفر کو منظم، محفوظ اور آسان بنانے کے لیے متعارف کرایا گیا ہے۔
یہ کارڈ نہ صرف ذاتی معلومات دکھاتا ہے بلکہ حجاج کے قیام، نقل و حمل، اور مناسک سے متعلق اہم رہنمائی بھی فراہم کرتا ہے۔
مزید پڑھیں
وزارت کے مطابق یہ کارڈ اسمارٹ فون پر فوری دستیاب ہوتا ہے اور کسی بھی وقت دکھایا جا سکتا ہے، جس سے حجاج کو مختلف مقامات جیسے ہوٹل، ٹرانسپورٹ، اور مقدس مقامات میں داخلے کے دوران سہولت ملتی ہے۔
اس کے ذریعے حکام کو بھی حجاج کی شناخت اور ان کی رہنمائی میں آسانی ہوتی ہے، خاص طور پر ہجوم یا کسی ہنگامی صورتحال میں۔
یہ سہولت دو سرکاری ایپس کے ذریعے فراہم کی جا رہی ہے:
- نسک
- توکلنا
حجاج کو ہدایت کی گئی ہے کہ وہ ان ایپس کو پہلے سے ڈاؤن لوڈ کر کے اپنی رجسٹریشن مکمل کریں تاکہ کارڈ بروقت فعال ہو سکے۔
ہوٹل، ٹرانسپورٹ اور مقدس مقامات تک رسائی میں سہولت ہوگی
اضافی خصوصیات اور فوائد:
کارڈ میں حجاج کا نام، پاسپورٹ نمبر، ویزا معلومات اور رہائش کی تفصیلات شامل ہوتی ہیں۔
مقدس مقامات تک رسائی اور نقل و حمل کے شیڈول کی معلومات بھی دستیاب ہوتی ہیں۔ کسی گمشدگی یا ایمرجنسی کی صورت میں حجاج کی فوری شناخت میں مدد ملتی ہے۔ ڈیجیٹل کارڈ ماحول دوست حل ہے، جس سے کاغذی کارروائی کم ہوتی ہے۔
وزارت نے اس بات پر بھی زور دیا کہ اگرچہ ڈیجیٹل کارڈ انتہائی مفید ہے تاہم پرنٹ شدہ کارڈ ساتھ رکھنا لازمی ہے تاکہ کسی بھی تکنیکی مسئلے یا انٹرنیٹ کی عدم دستیابی کی صورت میں مشکلات پیش نہ آئیں۔
یہ اقدام سعودی عرب کی جانب سے حج خدمات کو ڈیجیٹلائز کرنے اور حجاج کو زیادہ محفوظ اور منظم تجربہ فراہم کرنے کی وسیع حکمت عملی کا حصہ ہے۔