لندن، ریاض، ممبئی سمیت اہم شہروں کے لیے پروازیں
کویتی ایئرویز نے اعلان کیا ہے کہ وہ آئندہ اتوار سے کویت انٹرنیشنل ایئرپورٹ کے ٹرمینل ’ٹی 4‘ سے اپنی پروازوں کی بحالی کر رہی ہے، جہاں سے 17 بین الاقوامی اسٹیشنوں کے لیے آپریشن دوبارہ شروع کیا جائے گا۔
کویتی خبر رساں ایجنسی ’کونا‘ کے مطابق یہ فیصلہ اس وقت سامنے آیا جب شہری ہوا بازی کے ادارے نے جمعرات سے فضائی حدود دوبارہ کھولنے کا اعلان کیا، جو 28 فروری سے خطے کی کشیدہ صورتحال اور ایران کی جانب سے کویت پر حملوں کے باعث عارضی اور احتیاطی طور پر بند کی گئی تھیں۔
کمپنی کے قائم مقام چیف ایگزیکٹو افسر عبد الوہاب الشطی نے بتایا کہ پروازیں لندن، استنبول، لاہور، ڈھاکہ، ممبئی، ترواننتہاپورم، چنئی، کوچین، دہلی، منیلا، قاہرہ، ریاض، جدہ، کولمبو، گوانگژو، بیروت اور دمشق سمیت مختلف شہروں کے لیے بحال کی جا رہی ہیں۔
اسی طرح جدہ اور ڈھاکہ کے لیے ہفتہ وار 4 پروازیں ہوں گی، جبکہ بیروت، دمشق اور لاہور کے لیے ہفتہ وار دو پروازیں چلائی جائیں گی۔
مزید یہ کہ استنبول، گوانگژو اور کولمبو کے لیے ہفتے میں ایک پرواز مختص کی گئی ہے۔
مزید پڑھیں
واضح رہے کہ کویتی ایئرویز کی پروازیں بنیادی طور پر سکیورٹی خدشات کے باعث عارضی طور پر بند کی گئی تھیں۔
خطے میں کشیدگی اور ایران کی جانب سے حملوں کے بعد احتیاطی اقدام کے طور پر کویت انٹرنیشنل ایئرپورٹ کی فضائی حدود 28 فروری سے بند کر دی گئی تھی، جس کے نتیجے میں فلائٹ آپریشن معطل ہو گئے۔
اب تک دستیاب سرکاری معلومات میں منسوخ شدہ پروازوں کی درست تعداد جاری نہیں کی گئی تاہم چونکہ بندش کئی ہفتوں تک جاری رہی، اس لیے سینکڑوں پروازیں متاثر یا منسوخ ہونے کا امکان ہے۔
مالی نقصان کے حوالے سے بھی کوئی باضابطہ اعداد و شمار سامنے نہیں آئے لیکن ایوی ایشن انڈسٹری کے عمومی اندازوں کے مطابق، اس نوعیت کی طویل بندش کے دوران ایئرلائنز کو لاکھوں سے کروڑوں ڈالر تک کا نقصان ہو سکتا ہے، جس میں ٹکٹ ریفنڈز، آپریشنل اخراجات اور آمدنی کا نقصان شامل ہوتا ہے۔
خیال رہے کہ کویت کی دوسری ایئرلائن الجزیرہ ایئر ویز نے بندش کے دوران سعودی عرب کے قیصومہ کو متبادل ایئرپورٹس کے طور پر استعمال کرتے ہوئے آپریشن جاری رکھا تاکہ مسافروں کو سہولت فراہم کی جا سکے۔