جنرل ٹرانسپورٹ اتھارٹی نے ریاض میں مسافروں کے لیے خودکار گاڑیوں کا نیا روٹ شروع کردیا ہے۔ اس سروس کا آغاز حیات مال اور ریاض گیلری کے درمیان کیا گیا ہے۔
مزید پڑھیں
یہ اقدام مملکت میں ٹرانسپورٹ کے اسمارٹ حل کو فروغ دینے کے منصوبے کا حصہ ہے، جس کا مقصد نقل و حمل کے شعبے میں جدید ترین تکنیکی سہولیات فراہم کرنا ہے۔
یہ گاڑیاں روزانہ کی بنیاد پر براہ راست فنی اور ریگولیٹری نگرانی میں کام کریں گی۔ اس نظام سے شہریوں کو محفوظ اور جدید سفری تجربہ ملے گا۔
جدید سینسرز اور کیمروں سے لیس یہ گاڑیاں سڑک کی صورتحال پر نظر رکھتی ہیں۔ ان کا اسمارٹ سسٹم ٹریفک کی تبدیلیوں کو خودکار طریقے سے بھانپ کر ردعمل دینے کی صلاحیت رکھتا ہے۔
اس میں کنٹرول ٹیکنالوجی کے ذریعے گاڑی چلانے کی مہارت کو مزید بہتر بنایا گیا ہے، جبکہ جدید ترین نظام انسانی غلطی کے امکانات کو ختم کرکے سفر کو محفوظ بناتا ہے۔
دارالحکومت میں اس نئے روٹ کا افتتاح قومی لاجسٹک حکمت عملی اور وژن 2030 کے اہداف کا حصہ ہے۔
اس سروس کے پچھلے مراحل میں اب تک 1700 سے زائد کامیاب سفر مکمل ہو چکے ہیں اور ان تجرباتی دوروں میں 3 ہزار سے زائد مسافروں نے سفر کیا ہے۔
خودکار گاڑیوں نے اب تک مجموعی طور پر 30 ہزار کلومیٹر سے زائد فاصلہ طے کیا ہے۔ یہ کامیابی مستقبل میں سروس کی وسیع پیمانے پر توسیع کی عکاسی کرتی ہے۔
اتھارٹی مستقبل قریب میں مزید نئے روٹس متعارف کروانے کے لیے مکمل تیار ہے۔ اس ٹیکنالوجی سے ٹرانسپورٹ کے شعبے میں بڑی تبدیلی آنے کی توقع ظاہر کی گئی ہے۔