سعودی عرب میں ایک مرد اور خاتون کو سزائے موت دیے جانے کی خبر نے سوشل میڈیا پر ہلچل مچا رکھی ہے اور اس دوران صارفین نے کئی طرح کے سوالات کھڑے کر دیے ہیں۔
مزید پڑھیں
کہیں دعویٰ کیا جا رہا ہے کہ دونوں میاں بیوی تھے اور مسجد میں ایک دوسرے کو بوسہ دینے پر انہیں یہ سزا ملی، تو کہیں اس واقعے سے منسوب ایک ویڈیو بھی شیئر کی جا رہی ہے۔
لیکن جب اس معاملے کی تفصیلات سامنے آئیں تو جہاں سوشل میڈیا پر وائرل کہانیاں دم توڑ گئیں، وہیں گردش کرنے والی کہانیوں کی کھلی تردید بھی ہوگئی۔
سعودی حکومت نے کیا بتایا؟
سعودی وزارتِ داخلہ نے تصدیق کی ہے کہ 14 اکتوبر 2026 کو مکہ مکرمہ ریجن میں دو بنگلہ دیشی شہریوں کی سزائے موت پر عمل درآمد کیا گیا ہے۔
سرکاری بیان میں ان کی شناخت نذر الاسلام عبدالبصیر اور سیتی اختر کے ناموں سے کی گئی، جبکہ بنگلہ دیشی میڈیا نے ان کے نام نذرالاسلام اور سویٹی اختر بھی لکھے ہیں۔
The execution of two Bangladeshi nationals in Saudi Arabia, apparently without Bangladesh’s diplomatic mission being aware of their cases, has raised questions about the state’s responsibility towards millions of migrant workers who toil far from home. Link in comments https://t.co/1URmd1YnJc
— New Age (@NewAgeBDcom) October 20, 2026
سعودی حکام کے مطابق دونوں کو مکہ مکرمہ کی ایک مسجد میں غیر اخلاقی فعل کے الزام میں گرفتار کیا تھا۔
تحقیقات مکمل ہونے کے بعد مقدمہ عدالت میں پیش کیا گیا، جہاں الزامات ثابت ہونے پر انہیں تعزیری سزائے موت سنائی گئی۔
وزارتِ داخلہ کا کہنا تھا کہ متعلقہ اعلیٰ عدالتی اتھارٹی کی توثیق اور شاہی حکم جاری ہونے کے بعد سزا پر عمل درآمد کیا گیا۔ حکومت نے اس موقع پر مساجد کی حرمت، قانون کی بالادستی اور اسلامی احکام کے نفاذ کے عزم کا بھی اعادہ کیا۔
تاہم سرکاری بیان میں نہ تو مسجد کا نام بتایا گیا اور نہ ہی مبینہ فعل کی مکمل تفصیلات یا مقدمے میں پیش کیے گئے شواہد سامنے لائے گئے ہیں۔
کیا دونوں میاں بیوی تھے؟
اس واقعے کے حوالے سے سب سے زیادہ زیرِ بحث دعویٰ یہ ہے کہ سزا پانے والے مرد اور خاتون آپس میں میاں بیوی تھے، لیکن بنگلہ دیشی ذرائع ابلاغ میں سامنے آنے والی معلومات اس دعوے کی تائید نہیں کرتیں۔
بنگلہ دیشی نیوز ویب سائٹ جاگو نیوز نے 19 اکتوبر کو نذرالاسلام کے والد عبدالبصیر کا بیان شائع کیا۔ انہوں نے بتایا کہ سویٹی اختر ان کے بیٹے کی اہلیہ نہیں تھیں اور ان کا خاندان اس خاتون کو جانتا بھی نہیں تھا۔
🚨🇧🇩🇸🇦 “I LEARNED OF MY SON’S EXECUTION THROUGH THE MEDIA” — FATHER OF BANGLADESHI MAN EXECUTED IN SAUDI ARABIA The father of Nazrul Islam Abdul Basir, executed in Saudi Arabia on October 14, says his family received no advance notice and learned of his death through media reports. Bangladesh has since sought an explanation from Saudi authorities. The family says Nazrul’s paternal aunt died of a heart attack after hearing the news. His father, Abdul Basir, is now pleading for his son’s body to be returned to Bangladesh. “My son is gone, my sister is gone too. I’ve lost everything.” ⚠️ Bangladesh says questions remain about the charges, legal proceedings and lack of prior notification. https://t.co/i9364PRTia
— Nova Intel (@intel_nova) October 20, 2026
والد نے بتایا کہ نذرالاسلام نومبر 2022 میں خاندان کی معاشی مشکلات دور کرنے کے لیے سعودی عرب گیا تھا۔ وہاں تقریباً 6 ماہ کام کرنے کے بعد اسے گرفتار کر لیا گیا اور وہ 3 سال سے زیادہ عرصہ زیرِ حراست رہا۔
خاندان کا کہنا ہے کہ اسے گرفتاری اور مقدمے کی وجوہات کے بارے میں مکمل معلومات نہیں مل سکیں۔
دوسری جانب اخبار دی ڈیلی اسٹار نے سویٹی اختر کے خاندان کے حوالے سے بتایا کہ وہ روزگار کے لیے سعودی عرب گئی تھیں۔ ان کے والد کے مطابق گرفتاری کے بعد بھی ان کا گھر والوں سے ٹیلی فون پر رابطہ رہا۔
اس طرح دستیاب معلومات کی بنیاد پر دونوں کے میاں بیوی ہونے یا عمرہ ادا کرنے کے لیے سعودی عرب آنے کے دعووں کی تصدیق نہیں ہوتی۔
کیا صرف بوسہ دینے پر سزا ہوئی؟
سوشل میڈیا پر بعض پوسٹوں میں دعویٰ کیا گیا کہ مرد نے خاتون کی پیشانی پر بوسہ دیا تھا اور اسی وجہ سے دونوں کو سزائے موت دی گئی، تاہم سعودی وزارتِ داخلہ کے اعلان میں بوسہ دینے کا کوئی ذکر موجود نہیں۔
سرکاری بیان میں صرف مسجد کے اندر غیر اخلاقی فعل کا حوالہ دیا گیا ہے۔ اس کی نوعیت، حالات اور مقدمے میں پیش کیے گئے شواہد کی تفصیل عام نہیں کی گئی۔
اسی طرح بعض سوشل میڈیا پوسٹوں میں جائے وقوع کو مسجد الحرام قرار دیا جا رہا ہے، جبکہ سرکاری اعلان میں صرف مکہ مکرمہ کی ایک مسجد کا ذکر ہے۔
اس لیے نہ یہ ثابت ہے کہ دونوں کو محض بوسہ دینے پر سزائے موت دی گئی اور نہ ہی یہ تصدیق ہوئی ہے کہ واقعہ مسجد الحرام میں پیش آیا تھا۔
5162 ANALYSIS: Misleading FACT: A sensitive video depicting a woman being publicly beheaded is being circulated with the claim that it shows the execution of a Bangladeshi woman who was executed alongside her partner in Saudi Arabia (1/3) https://t.co/RjGpqeCW5z
— D-Intent Data (@dintentdata) October 20, 2026
بنگلہ دیشی حکومت نے سعودی عرب سے کیا مانگا؟
واقعے کی تفصیلات سامنے لانے کے لیے بنگلہ دیشی حکومت نے سعودی حکام سے رابطہ کیا ہے۔
بنگلہ دیشی وزیرِ مملکت برائے خارجہ شمع عبید اسلام نے 19 اکتوبر کو بتایا کہ ڈھاکہ نے سعودی عدالت کے فیصلے کی نقل طلب کی ہے تاکہ مقدمے اور سزا کی قانونی بنیادوں کا جائزہ لیا جا سکے۔
بنگلہ دیشی حکام کے مطابق انہیں سزا پر عمل درآمد سے پہلے اس بارے میں باضابطہ اطلاع نہیں ملی تھی۔
اخبار پرتھم آلو نے 20 اکتوبر کو رپورٹ کیا کہ جدہ میں بنگلہ دیشی قونصل جنرل نے سعودی وزارتِ خارجہ کے حکام سے ملاقات کے دوران عدالتی کارروائی، قانونی دفاع کے مواقع اور سزا سے متعلق پیشگی اطلاع نہ ملنے کا معاملہ اٹھایا۔
رپورٹ کے مطابق دونوں افراد کے نام قیدیوں کی ایک فہرست میں شامل تھے، لیکن اس میں ان کی سزائے موت کا ذکر نہیں تھا۔
فہرست میں مختلف نوعیت کے الزامات درج تھے، تاہم ان کا حتمی عدالتی فیصلے سے تعلق واضح نہیں تھا۔
بنگلہ دیشی حکومت کے مطابق مکمل عدالتی دستاویزات ملنے پر ہی وہ کوئی حتمی مؤقف اختیار کرے گی۔
وائرل ویڈیو کا اس واقعے سے تعلق؟
اس معاملے کے ساتھ ایک ویڈیو بھی شیئر کی جا رہی ہے جسے بنگلہ دیشی شہریوں کی سزائے موت کی کارروائی قرار دیا جا رہا ہے۔
بھارتی نیوز ادارے انڈیا ٹوڈے کی فیکٹ چیک تحقیق کے مطابق یہ ویڈیو اکتوبر 2026 کی نہیں، بلکہ جنوری 2015 کے ایک الگ واقعے کی ہے، جس میں میانمار کی ایک خاتون کی سزا دکھائی گئی تھی۔
The family of Nazrul Islam, one of the two Bangladeshis executed in Saudi Arabia on October 14, yesterday alleged that Saudi authorities had executed him without notifying them beforehand or giving him an opportunity to defend himself. Read more here: https://t.co/TRuOdMRPNS #bangladeshi #saudiarabia #execution
— The Daily Star (@dailystarnews) October 20, 2026
ماہرین کا کہنا ہے کہ اس طرح سے پرانی ویڈیو کو حالیہ واقعے سے جوڑ کر پیش کرنا گمراہ کن ہے۔
حقیقت کیسے پتا چلے گی؟
اب تک دستیاب معلومات سے یہ تصدیق ہوتی ہے کہ سعودی عرب میں 14 اکتوبر کو دو بنگلہ دیشی شہریوں کی سزائے موت پر عمل درآمد کیا گیا اور سعودی وزارتِ داخلہ نے مقدمے کو مسجد میں غیر اخلاقی فعل سے متعلق قرار دیا۔
لیکن دونوں کے میاں بیوی ہونے، محض بوسہ دینے پر سزا ملنے، مسجد الحرام میں واقعہ پیش آنے اور وائرل ویڈیو کا اسی مقدمے سے تعلق ہونے کے دعوے ثابت نہیں ہوئے۔
اس پورے معاملے کا سب سے اہم سوال یہ ہے کہ عدالت نے کن مخصوص الزامات اور شواہد کی بنیاد پر سزائے موت سنائی؟ اس کا مستند جواب مکمل عدالتی فیصلے اور قانونی دستاویزات سامنے آنے کے بعد ہی مل سکتا ہے۔
فی الحال بنگلہ دیشی حکومت بھی انہی تفصیلات کی منتظر ہے۔
اس لیے سوشل میڈیا پر گردش کرنے والی سنسنی خیز کہانیوں کو حتمی حقیقت سمجھنے کے بجائے سرکاری دستاویزات اور قابلِ اعتماد صحافتی تحقیقات کی روشنی میں اس معاملے کو دیکھنا زیادہ مناسب ہے۔