کینیڈا کے صوبے البرٹا میں ایک مردہ چوہا ملنا بھی معمولی واقعہ نہیں۔
Bowden نامی قصبے میں چوہا ملنے کے بعد صوبائی Rat Control Program متحرک ہوگیا۔
البرٹا 1950 سے چوہوں کی مستقل افزائش کرنے والی آبادی کو روکنے کے لیے سخت نگرانی، سرحدی کنٹرول اور عوامی رپورٹنگ کا نظام چلا رہا ہے۔
دنیا کے بیشتر شہروں میں چوہا دکھائی دینا کوئی بڑی بات نہیں، لیکن کینیڈا کے صوبے البرٹا میں صورت حال بالکل مختلف ہے۔
یہاں اگر ایک چوہا بھی نظر آجائے تو معاملہ سرکاری سطح تک پہنچ جاتا ہے۔
یہی ہوا جب البرٹا کے وسطی قصبے Bowden میں ایک مردہ چوہا پایا گیا تو صوبے کی خصوصی Rat Patrol کو تحقیقات کے لیے طلب کرلیا گیا۔
Bowden کی مقامی انتظامیہ نے شہریوں سے کہا ہے کہ وہ چوکس رہیں اور اگر انہیں چوہے، ان کی مینگنیاں یا کترنے کے نشانات نظر آئیں تو فوری طور پر حکام کو اطلاع دیں۔
تاہم یہ واضح نہیں کیا گیا کہ مردہ چوہا قصبے میں کس مقام پر ملا تھا۔
مزید پڑھیں
آخر ایک چوہا اتنی بڑی خبر کیوں؟
اس کی وجہ البرٹا کی منفرد شناخت ہے۔
صوبہ گزشتہ 70 برس سے زیادہ عرصے سے چوہوں کی مستقل افزائش کرنے والی آبادی سے پاک ہے۔
البرٹا حکومت کے مطابق 1950 میں Rat Control Program شروع کیا گیا تھا اور تب سے کوشش یہ رہی ہے کہ چوہوں کو صوبے میں مستقل
آبادی قائم نہ کرنے دی جائے۔
البرٹا حکومت یہ وضاحت بھی کرتی ہے کہ rat-free کا مطلب یہ نہیں کہ صوبے میں کبھی کوئی چوہا داخل ہی نہیں ہوتا۔
کبھی کبھار ٹرکوں، سامان یا دوسری نقل و حمل کے ذرائع کے ذریعے چند چوہے صوبے میں پہنچ سکتے ہیں، لیکن حکام انہیں جلد شناخت کرکے ختم کرنے کی کوشش کرتے ہیں تاکہ وہ افزائش نہ کرسکیں۔
اسی لیے Bowden میں ایک مردہ چوہے کا ملنا بھی حکام کے لیے معمولی واقعہ نہیں۔
1950 سے جاری ’چوہا جنگ‘
البرٹا میں چوہوں کے خلاف باقاعدہ مہم کی تاریخ 1950 سے شروع ہوتی ہے۔
سرکاری ریکارڈ کے مطابق Norway rat بیسویں صدی کے دوران شمالی امریکا میں مغرب کی طرف پھیلتے ہوئے Saskatchewan تک پہنچا اور پھر البرٹا کی مشرقی سرحد کے قریب نمودار ہوا۔
اگر اس وقت اقدامات نہ کئے جاتے تو امکان تھا کہ یہ پورے صوبے میں پھیل جاتا۔
حکومت نے سرحدی علاقوں میں نگرانی، کھیتوں اور عمارتوں کی جانچ اور مشتبہ مقامات پر فوری کارروائی شروع کی۔
اس مہم میں سرکاری اہلکاروں کے ساتھ کسان، زمین کے مالکان اور بلدیاتی ادارے بھی شامل رہے۔
نتیجہ یہ نکلا کہ چوہوں کو مستقل آبادی قائم کرنے سے روک دیا گیا۔
ہر اطلاع کی تحقیقات
البرٹا کا نظام اتنا حساس ہے کہ ہر سال شہری سینکڑوں مرتبہ مشتبہ چوہوں کی اطلاع دیتے ہیں۔ دلچسپ بات یہ ہے کہ ان میں سے بڑی تعداد حقیقت میں چوہے نہیں نکلتے بلکہ muskrat، ground squirrel، pocket gopher یا دوسرے مقامی جانور ہوتے ہیں۔
اس کے باوجود ہر مشتبہ اطلاع کی جانچ کی جاتی ہے۔
سرکاری اعدادوشمار کے مطابق 2023 میں 458 مشتبہ واقعات رپورٹ ہوئے جن میں صرف 23 کی چوہوں کے طور پر تصدیق ہوئی۔
اس سے اندازہ ہوتا ہے کہ صوبے میں نگرانی کس قدر سخت ہے۔
پالتو چوہا رکھنا بھی منع
البرٹا میں معاملہ صرف جنگلی چوہوں تک محدود نہیں۔
صوبائی قوانین کے تحت بعض اقسام کے پالتو چوہے رکھنا بھی غیر قانونی ہے۔
Norway rat سمیت Rattus نسل کے چوہوں کو باقاعدہ زرعی نقصان دہ جانور قرار دیا گیا ہے۔
حکام کے مطابق چوہے خوراک اور فصلیں خراب کرسکتے ہیں، عمارتوں اور بجلی کی تاروں کو نقصان پہنچاتے ہیں اور مختلف بیماریوں کے پھیلاؤ کا سبب بن سکتے ہیں۔
چوہا نظر آئے تو تصویر بنائیں
حکومت شہریوں سے کہتی ہے کہ اگر انہیں چوہا نظر آئے تو محفوظ فاصلے سے اس کی تصویر لیں، مقام نوٹ کریں اور Rat Control Program کو اطلاع دیں۔
یہی عوامی تعاون اس نظام کی کامیابی کی ایک بڑی وجہ سمجھا جاتا ہے۔
Bowden میں ملنے والے مردہ چوہے نے فی الحال یہ ثابت نہیں کیا کہ علاقے میں چوہوں کی کوئی مستقل آبادی قائم ہوگئی ہے، لیکن البرٹا کے لیے ایک چوہا بھی اتنا اہم ہے کہ پورا نگرانی کا نظام حرکت میں آجاتا ہے۔
دنیا کے کئی بڑے شہر جہاں بڑھتی ہوئی چوہوں کی تعداد سے پریشان ہیں، وہیں البرٹا کی کہانی ایک مختلف مثال پیش کرتی ہے:
اگر نگرانی مسلسل ہو تو ایک پورے صوبے میں چوہوں کی مستقل آبادی کو 7 دہائیوں تک روکا جاسکتا ہے۔