فیفا ورلڈ کپ 2026 کے راؤنڈ آف 32 میں آج 3 ہائی پروفائل مقابلے کھیلے جائیں گے۔
برازیل کا مقابلہ جاپان، جرمنی کا پیراگوئے جبکہ ہالینڈ کا سامنا مراکش سے ہوگا۔
ناک آؤٹ مرحلے میں شکست کا مطلب ٹورنامنٹ سے فوری اخراج ہوگا۔
فیفا ورلڈ کپ 2026 کے راؤنڈ آف 32 میں آج 3 بڑی فٹبال طاقتیں برازیل، جرمنی اور ہالینڈ اپنے اپنے سخت امتحان سے گزریں گی۔
ناک آؤٹ مرحلے کی ان سنسنی خیز مقابلوں میں کسی بھی ٹیم کے پاس غلطی کی کوئی گنجائش نہیں، کیونکہ شکست کے ساتھ ہی عالمی ٹائٹل کا خواب بھی ٹوٹ جائے گا۔
برازیل بمقابلہ جاپان
پہلا بڑا مقابلہ آج پیر 29 جون کو ہیوسٹن کے این آر جی اسٹیڈیم میں برازیل اور جاپان کے درمیان کھیلا جائے گا، جس کا آغاز ریاض وقت کے مطابق رات 8 بجے ہوگا۔
مزید پڑھیں
برازیل گروپ C میں 7 پوائنٹس کے ساتھ ناقابلِ شکست رہتے ہوئے سرفہرست رہا۔
اس نے 3 میچوں میں 7 گول اسکور کیے جبکہ صرف ایک گول کھایا، جس سے اس کی متوازن دفاعی اور جارحانہ طاقت کا اندازہ ہوتا ہے۔
دوسری جانب جاپان بھی گروپ مرحلے میں ناقابلِ شکست رہا اور 5 پوائنٹس کے ساتھ گروپ F میں دوسرے نمبر پر رہا۔ جاپانی ٹیم نے بھی
7 گول کیے، تاہم اس کے خلاف 3 گول ہوئے، جو دفاعی کمزوری کی نشاندہی کرتے ہیں۔
جاپان
دلچسپ بات یہ ہے کہ دونوں ٹیموں کی آخری باہمی ملاقات 2025 میں ہوئی تھی، جس میں جاپان نے برازیل کو 3-2 سے شکست دے کر بڑا اپ سیٹ کیا تھا۔
اگرچہ مجموعی ریکارڈ اب بھی برازیل کے حق میں ہے، لیکن جاپان ایک بار پھر حیران کرنے کی صلاحیت رکھتا ہے۔
جرمنی بمقابلہ پیراگوئے
دوسرے مقابلے میں جرمنی کا سامنا پیراگوئے سے بوسٹن کے جیلیٹ اسٹیڈیم میں ہوگا۔
یہ میچ ریاض وقت کے مطابق رات 11:30 بجے شروع ہوگا۔
جرمنی نے گروپ E میں 6 پوائنٹس کے ساتھ پہلی پوزیشن حاصل کی اور گروپ مرحلے میں 10 گول اسکور کیے، جبکہ اس کے خلاف 4 گول ہوئے۔
ادھر پیراگوئے بہترین تیسرے نمبر کی ٹیموں میں شامل ہو کر ناک آؤٹ مرحلے تک پہنچی۔ اگرچہ اس نے صرف 2 گول کیے، لیکن دفاعی نظم و ضبط اور بھرپور مقابلہ کرنے کی صلاحیت اسے خطرناک حریف بناتی ہے۔
پیراگوئے
یہ دونوں ٹیمیں تاریخ میں پہلی بار ایک دوسرے کے مدمقابل ہوں گی، جس سے مقابلہ مزید دلچسپ ہو گیا ہے۔
ہالینڈ بمقابلہ مراکش
تیسرا اور شاید سب سے زیادہ دلچسپ مقابلہ منگل 30 جون کو مونٹیری کے بی بی وی اے اسٹیڈیم میں ہالینڈ اور مراکش کے درمیان ہوگا، جو ریاض وقت کے مطابق صبح 4 بجے شروع ہوگا۔
ہالینڈ نے گروپ مرحلے میں 10 گول اسکور کرتے ہوئے 7 پوائنٹس کے ساتھ پہلی پوزیشن حاصل کی، جبکہ مراکش نے بھی 7 پوائنٹس حاصل کیے اور صرف 3 گول کھا کر اپنی دفاعی مضبوطی کا ثبوت دیا۔
مراکش
اگرچہ آخری باہمی مقابلے میں 2017 کے دوران ہالینڈ نے مراکش کو 2-1 سے شکست دی تھی، تاہم مراکش گزشتہ برسوں میں عالمی سطح پر اپنی غیرمعمولی کارکردگی سے ثابت کر چکا ہے کہ وہ کسی بھی مضبوط حریف کو حیران کر سکتا ہے۔