فیفا ورلڈ کپ 2026 کے آغاز کے باوجود امریکا کے کئی میزبان شہروں میں متوقع سیاحتی رش نظر نہیں آ رہا۔
خاص طور پر نیویارک، جہاں ٹورنامنٹ کا فائنل کھیلا جانا ہے، یورپی مسافروں کی بکنگ میں نمایاں کمی دیکھی گئی ہے، جس کے باعث بڑے ہوٹلوں نے کمروں کے نرخ نصف تک کم کر دیے ہیں۔
فیفا ورلڈ کپ 2026 کو دنیا کے سب سے بڑے کھیلوں کے ایونٹس میں شمار کیا جاتا ہے، مگر ٹورنامنٹ کے آغاز کے چند روز بعد ہی ایسے اعداد و شمار سامنے آئے ہیں جنہوں نے امریکی سیاحتی اور ہوٹلنگ صنعت کو تشویش میں مبتلا کر دیا ہے۔
سفری اور فضائی ٹریفک کی نگرانی کرنے والی کمپنی سیریوم کے مطابق جون اور جولائی کے دوران یورپ سے امریکا کے ورلڈ کپ میزبان شہروں کے لیے فضائی بکنگ گزشتہ سال کے مقابلے میں 3.8 فیصد کم رہی۔
یہ صورتحال اس کے برعکس ہے جس کی توقع سیاحتی شعبے اور مقامی کاروباری اداروں نے کی تھی۔
مزید پڑھیں
سب سے زیادہ متاثر ہونے والا شہر نیویارک ہے، جو 19 جولائی کو ورلڈ کپ فائنل کی میزبانی کرے گا۔
اس کے باوجود یورپ سے نیویارک کے لیے فضائی بکنگ میں 15.8 فیصد سالانہ کمی ریکارڈ کی گئی ہے۔
فیفا کو امید تھی کہ ٹورنامنٹ کے دوران تقریباً 12 لاکھ شائقین امریکا آئیں گے، لیکن نیویارک ہوٹل ایسوسی ایشن کے ابتدائی اندازوں کے
مطابق شہر میں آنے والے سیاحوں کی تعداد 5 لاکھ کے قریب رہ سکتی ہے، جو توقعات سے بہت کم ہے۔
ہوٹلوں کو قیمتیں کم کرنا پڑ گئیں
کمزور طلب کے باعث نیویارک کے کئی بڑے ہوٹلوں نے قیمتوں میں نمایاں کمی کر دی ہے۔ شہر کے معروف ہلٹن مڈ ٹاؤن ہوٹل نے بعض کمروں کے نرخ کم کرکے 415 ڈالر فی رات کر دیے، جو گزشتہ دسمبر میں پیش کی جانے والی قیمتوں سے تقریباً 50 فیصد کم ہیں۔
ماہرین کا کہنا ہے کہ اگر بکنگ کی رفتار یہی رہی تو مزید ہوٹل بھی رعایتوں کا اعلان کر سکتے ہیں۔
شائقین کیوں دور رہے؟
سفری ماہرین کے مطابق امریکا میں مہنگی رہائش، بڑھتے سفری اخراجات، صحت اور سفر کی انشورنس کی بلند قیمتیں اور بعض ممالک کے شہریوں کے لیے ویزا سے متعلق پیچیدگیاں اس رجحان کی بڑی وجوہ ہیں۔
بہت سے یورپی شائقین نے امریکا کے بجائے کم خرچ متبادل راستہ اختیار کیا ہے، جس کے تحت وہ میکسیکو میں قیام کر کے میچز دیکھنے کے لیے امریکا کا سفر کر رہے ہیں۔
میکسیکو کو غیرمتوقع فائدہ
ورلڈ کپ کے مشترکہ میزبان میکسیکو کو اس صورتحال سے غیرمتوقع فائدہ پہنچ رہا ہے۔
نسبتاً کم اخراجات اور سستی رہائش کے باعث متعدد شائقین نے میکسیکو کو اپنا عارضی مرکز بنا لیا ہے، جس سے وہاں کے ہوٹلوں اور سیاحتی شعبے کو اضافی کاروبار مل رہا ہے۔