مراکش کی قومی فٹ بال ٹیم کو فیفا ورلڈ کپ 2026 کے آغاز ہی پر اس وقت بڑا دھچکا لگا ہے جب اسٹار کھلاڑی عبد الصمد الزلزولی اور دفاعی سہارا نایف اکرد انجری کے باعث ٹورنامنٹ سے باہر ہو گئے ہیں۔
مزید پڑھیں
دونوں کھلاڑی اپنی فٹنس بحال کرنے میں مکمل طور پر ناکام رہے۔
مراکشی میڈیا کے مطابق ہیڈ کوچ محمد وہبی نے ان دونوں اہم کھلاڑیوں کی جگہ مروان سعدان اور امین سباعی کو فوری طور پر اسکواڈ میں شامل کر لیا ہے۔
اس فیصلے کا مقصد عالمی میلے کے آغاز سے قبل ٹیم کے توازن کو برقرار رکھنا اور تمام تکنیکی آپشنز کو یقینی بنانا ہے۔
یاد رہے کہ عبد الصمد الزلزولی ناروے کے خلاف کھیلے گئے حالیہ دوستانہ میچ کے دوران گھٹنے کی انجری کا شکار ہوئے تھے۔
دوسری جانب نایف اکرد پہلے ہی سے انجری کا شکار تھے اور انہوں نے ورلڈ کپ میں شرکت کی اُمید پر سرجری بھی کروائی تھی مگر وہ بروقت صحت یاب نہ ہوسکے۔
مراکشی ٹیم ان دنوں برازیل کے خلاف اپنے پہلے بڑے مقابلے کے لیے بھرپور تیاریوں میں مصروف ہے۔
کوچ محمد وہبی نئے شامل ہونے والے کھلاڑیوں کو جلد از جلد ٹیم کے ساتھ ہم آہنگ کرنے کی کوشش کر رہے ہیں تاکہ وہ اتوار کو ہونے والے میچ کے لیے تیار رہیں۔
مراکش کے شائقین کو اپنی ٹیم سے بڑی توقعات وابستہ ہیں کیونکہ اس نے قطر میں منعقدہ 2022 کے ورلڈ کپ میں سیمی فائنل تک رسائی حاصل کر کے تاریخ رقم کی تھی۔
عرب دنیا اور مراکش کے عوام ایک بار پھر اسی طرح کی شاندار کارکردگی کی امید لگائے بیٹھے ہیں۔
گروپ سی میں شامل مراکش کی ٹیم اتوار کو 5 بار کی عالمی چیمپئن برازیل کے خلاف اپنی مہم کا آغاز کرے گی۔
یہ ہائی وولٹیج مقابلہ نیو جرسی کے نیویارک اسٹیڈیم میں کھیلا جائے گا جس کے لیے شائقین فٹ بال میں غیر معمولی جوش و خروش پایا جا رہا ہے۔