جرمنی کے فرینکفرٹ ایئرپورٹ پر لفتھانزا کی بوئنگ 787-9 ڈریم لائنر طیارے کے اگلے لینڈنگ گیئر اچانک بیٹھ جانے سے غیر معمولی صورتحال پیدا ہوگئی۔
واقعے کے وقت طیارہ پرواز کی تیاری کر رہا تھا، تاہم خوش قسمتی سے کوئی مسافر سوار نہیں تھا۔
حکام نے تحقیقات کا آغاز کر دیا ہے۔
سوشل میڈیا پر گزشتہ چند گھنٹوں کے دوران غیر معمولی واقعے نے ہلچل مچا دی، جب جرمنی کے فرینکفرٹ ایئرپورٹ پر طیارے کے اگلے پہیے اچانک بیٹھ جانے کی ویڈیو وائرل ہوگئی۔
جرمن فضائی کمپنی لفتھانزا نے جمعہ کے روز تصدیق کی کہ متاثرہ بوئنگ 787-9 ڈریم لائنر طیارے کو دیکھ بھال کے لیے مینٹیننس ایریا منتقل کر دیا گیا ہے۔
کمپنی کے مطابق طیارے سے رات کے وقت ایندھن نکالا گیا اور اسے خصوصی آلات کی مدد سے اٹھایا گیا۔
Following a gear collapse at the gate in Frankfurt, Lufthansa 787-9 D-ABPQ has been significantly damaged. Today’s LH450 has been canceled. We are awaiting more information on any potential injuries. pic.twitter.com/FTBK4m2WyS
— Flightradar24 (@flightradar24) June 4, 2026
لفتھانزا نے مزید بتایا کہ طیارے کو اٹھانے کے بعد لینڈنگ گیئر دوبارہ اپنی جگہ پر نصب کیا گیا، جس کے بعد اسے مرمت کے شعبے میں منتقل کر دیا گیا۔
کمپنی نے یہ بھی واضح کیا کہ جرمنی کے وفاقی ادارے برائے فضائی حادثات کی تحقیقات نے واقعے کی تحقیقات شروع کر دی ہیں، جبکہ تحقیقات مکمل ہونے کے بعد طیارے کی مرمت کی جائے گی۔
مزید پڑھیں
لفتھانزا کے مطابق جمعرات کی دوپہر طیارہ فرینکفرٹ ایئرپورٹ کے ٹرمینل نمبر 1 کے گیٹ A15 پر لاس اینجلس روانگی کے لیے تیار کھڑا تھا کہ اچانک اس کے اگلے لینڈنگ گیئر کے پہیے بیٹھ گئے۔
اس وقت طیارے میں لفتھانزا کے 13 عملے کے ارکان اور شراکت دار کمپنیوں کے چند ملازمین موجود تھے، جبکہ مسافر ابھی طیارے میں سوار نہیں ہوئے تھے اور بورڈنگ کا انتظار کر رہے تھے۔
واقعے کے بعد فضائی عملے کے دو ارکان اور سروس فراہم کرنے والی کمپنیوں کے چند ملازمین کو طبی معائنے اور علاج کے لیے اسپتال منتقل کیا گیا۔
واضح رہے کہ لفتھانزا اس وقت بوئنگ 787-9 ڈریم لائنر کے 17 طیارے چلا رہی ہے۔
کمپنی نے اس ماڈل کا پہلا طیارہ 2022 میں حاصل کیا تھا اور آئندہ برسوں میں اپنے بیڑے میں مزید ڈریم لائنر طیارے شامل کرنے کا منصوبہ رکھتی ہے۔