کینیڈا میں 16 سال تک جاری رہنے والی ایک تحقیق سے معلوم ہوا ہے کہ بچپن میں بار بار جھوٹ بولنا لازمی طور پر مستقبل میں جرم یا سماج دشمن رویوں کی علامت نہیں۔
محققین کے مطابق زیادہ تر بچوں میں عمر کے ساتھ جھوٹ بولنے کا رجحان کم ہو جاتا ہے، جبکہ اصل تشویش اس وقت پیدا ہوتی ہے جب جھوٹ کے ساتھ جارحیت اور جلد بازی کے رویے بھی موجود ہوں۔
کینیڈا میں کی گئی ایک طویل المدتی تحقیق نے بچوں میں جھوٹ بولنے کے حوالے سے حیران کن نتائج سامنے لاتے ہوئے واضح کیا ہے کہ بچپن میں بار بار جھوٹ بولنا لازمی طور پر اس بات کی علامت نہیں کہ وہ بچے مستقبل میں مجرم یا معاشرتی طور پر نقصان دہ افراد بن جائیں گے۔
ویب سائٹ Earth.com کی رپورٹ کے مطابق محققین نے اس تحقیق کے نتائج کو بچوں کے جھوٹ بولنے سے متعلق عام تصورات کے مقابلے میں زیادہ پیچیدہ قرار دیا ہے۔
مزید پڑھیں
یہ تحقیق میک گل یونیورسٹی کی محققہ وکٹوریہ ٹالور کی سربراہی میں کی گئی، جس میں کینیڈا کے صوبے کیوبیک کے 3 ہزار سے زائد بچوں کا تقریباً 16 برس تک، یعنی کنڈرگارٹن سے لے کر 20 سال کی عمر کے آغاز تک، جائزہ لیا گیا۔
محققین نے والدین اور اساتذہ کی آراء کی بنیاد پر بچوں میں جھوٹ بولنے کے رویوں کا اندازہ لگایا اور انہیں 3 زمروں میں تقسیم کیا: جھوٹ
نہ بولنے والے، کبھی کبھار جھوٹ بولنے والے، اور بار بار جھوٹ بولنے والے۔
Development and Psychopathology جریدے میں شائع ہونے والی تحقیق کے مطابق تقریباً تین چوتھائی بچے ’کم جھوٹ بولنے‘ والے گروپ میں شامل تھے، اور عمر بڑھنے کے ساتھ ان میں جھوٹ بولنے کا رجحان مزید کم ہوتا گیا۔
تحقیق سے یہ بھی معلوم ہوا کہ نوعمری کے دوران جھوٹ بولنے میں جس اضافے کی توقع کی جاتی تھی، وہ واضح طور پر سامنے نہیں آیا، حالانکہ سابقہ مطالعات میں اس کا امکان ظاہر کیا گیا تھا۔
وکٹوریہ ٹالور نے کہا کہ ہماری تحقیق میں زیادہ تر بچوں نے وقت گزرنے کے ساتھ جھوٹ بولنے کی کم یا مسلسل کم ہوتی ہوئی سطح کا مظاہرہ کیا۔
محققین کا خیال ہے کہ ممکن ہے نوعمر بچے اپنے جھوٹ کو والدین اور اساتذہ سے چھپانے میں زیادہ مہارت حاصل کر لیتے ہوں، جس کی وجہ سے نتائج میں ’جھوٹ بولنے کی بلند ترین سطح‘ واضح نہ ہو سکی۔
دوسری جانب تحقیق میں یہ بات سامنے آئی کہ وہ بچے جن میں جھوٹ بولنے کا رجحان برقرار رہا یا وقت کے ساتھ بڑھتا گیا، کم عمری ہی سے زیادہ جارحانہ اور جلد بازی پر مبنی رویوں کے حامل تھے۔
ان رویوں میں لڑائی جھگڑا، غنڈہ گردی (بُلنگ)، اپنے اعمال پر قابو پانے میں دشواری، اور بغیر سوچے سمجھے ایک سرگرمی سے دوسری سرگرمی کی طرف منتقل ہونا شامل تھا۔
محققین کے مطابق جھوٹ بولنے کا رویہ عموماً اکیلا نہیں ہوتا بلکہ اکثر یہ بے احتیاطی، جلد بازی اور قواعد کی خلاف ورزی جیسے دیگر رویوں کے ساتھ جڑا ہوتا ہے۔
جب جھوٹ بولنے کے مختلف انداز کا موازنہ بالغ عمر میں جرائم اور ذہنی صحت کے ریکارڈ سے کیا گیا تو معلوم ہوا کہ مسلسل زیادہ جھوٹ بولنے والے بچوں میں بعد کی زندگی میں بعض رویہ جاتی مسائل پیدا ہونے کا امکان نسبتاً زیادہ تھا۔
اس کے باوجود تحقیق نے زور دے کر کہا کہ ’زیادہ جھوٹ بولنے والے بیشتر بچوں کا کوئی مجرمانہ ریکارڈ نہیں بنا‘۔
نتائج سے یہ بھی واضح ہوا کہ کبھی کبھار جھوٹ بولنا بچوں کی سماجی نشوونما اور سیکھنے کے عمل کا ایک فطری حصہ ہے، کیونکہ بچے سزا سے بچنے یا سماجی حدود کو جانچنے کے لیے جھوٹ بول سکتے ہیں۔
تحقیق کے اختتام پر محققین نے کہا کہ اصل تشویش عارضی یا معمولی جھوٹ نہیں بلکہ وہ جھوٹ ہے جو وقت کے ساتھ مسلسل بڑھتا جائے اور اس کے ساتھ جارحیت اور جلد بازی جیسے رویے بھی موجود ہوں۔
ان کے مطابق ایسے رجحانات کی ابتدائی شناخت والدین، اساتذہ اور ماہرین کو بروقت مدد اور رہنمائی فراہم کرنے کا موقع دے سکتی ہے، بجائے اس کے کہ صرف سزا پر انحصار کیا جائے۔