ایلون مسک کی اسپیس ایکس دنیا کے سب سے بڑے آئی پی او کی تیاری کر رہی ہے۔
کمپنی اپنی مارکیٹ ویلیو کم از کم 1.8 ٹریلین ڈالر تک لے جانے اور 75 ارب ڈالر اکٹھا کرنے کی منصوبہ بندی کر رہی ہے، جبکہ مصنوعی ذہانت اور خلائی ڈیٹا سینٹرز اس کی نئی ترقیاتی حکمت عملی کا مرکز ہیں۔
تاریخی آئی پی او سے قبل خلائی اور مصنوعی ذہانت کی ٹیکنالوجی کی عالمی کمپنی اسپیس ایکس SpaceX اپنی مارکیٹ ویلیو کم از کم 1.8 ٹریلین ڈالر تک بڑھانے کی تیاری کر رہی ہے۔
یہ فیصلہ سرمایہ کاروں اور مالیاتی مشیروں کے ساتھ مشاورت کے بعد سامنے آیا ہے۔
کمپنی نے اس سے قبل 2 ٹریلین ڈالر سے زیادہ ویلیوایشن کا ہدف رکھا تھا، تاہم اب اس میں ردوبدل کرتے ہوئے 1.8 ٹریلین ڈالر یا اس سے زائد کی مالیت حاصل کرنے پر توجہ مرکوز کی جا رہی ہے۔
اسپیس ایکس اس متوقع آئی پی او کے ذریعے 75 ارب ڈالر تک سرمایہ اکٹھا کرنا چاہتی ہے، جو کامیاب ہونے کی صورت میں عالمی مالیاتی تاریخ کا سب سے بڑا ابتدائی عوامی شیئر اجرا IPO بن سکتا ہے۔
مزید پڑھیں
20 مئی کو ریگولیٹری اداروں کے پاس جمع کرائی گئی دستاویزات کے مطابق اسپیس ایکس کے کاروباری ماڈل میں نمایاں تبدیلی آ چکی ہے۔
کمپنی اب صرف دوبارہ استعمال ہونے والے راکٹوں کی تیاری یا سیٹلائٹ انٹرنیٹ سروسز تک محدود نہیں رہی بلکہ جدید انفراسٹرکچر اور ذہین ٹیکنالوجی خدمات کی عالمی طاقت بننے کی جانب بڑھ رہی ہے۔
کمپنی کے مستقبل کے منصوبوں میں خلا میں ڈیٹا سینٹرز کا قیام بھی
شامل ہے، جس کے ذریعے تقریباً 28.5 ٹریلین ڈالر مالیت کی عالمی مارکیٹ کو ہدف بنایا جائے گا۔
متوقع شیڈول کے مطابق آئی پی او کی باضابطہ تشہیری مہم 4 جون سے شروع ہوگی، جبکہ حصص کی قیمت کا تعین 11 جون کے اوائل میں متوقع ہے، اگرچہ سرمایہ کاروں کے ردعمل کی بنیاد پر شیڈول میں معمولی تبدیلی ممکن ہے۔
مالی اعداد و شمار کے مطابق اسپیس ایکس کی آمدنی 2025 کے دوران بڑھ کر 18.7 ارب ڈالر تک پہنچ گئی، جبکہ ایک سال قبل یہ 14 ارب ڈالر تھی۔
تاہم کمپنی کو گزشتہ سال 4.94 ارب ڈالر خسارے کا سامنا کرنا پڑا، جبکہ 2024 میں اسے 791 ملین ڈالر منافع حاصل ہوا تھا۔
75 ارب ڈالر کا
طوفان، اسپیس ایکس مارکیٹ میں
اترنے کو تیار
یاد رہے کہ فروری میں اسپیس ایکس نے ایلون مسک کی مصنوعی ذہانت کی کمپنی ایکس اے آئی (xAI) کو اپنے ساتھ ضم کر لیا تھا، جس میں گروک (Grok) چیٹ بوٹ اور ایکس (X) پلیٹ فارم بھی شامل ہیں۔
اس انضمام کے بعد اسپیس ایکس کی مالیت تقریباً ایک ٹریلین ڈالر جبکہ xAI کی مالیت 250 ارب ڈالر تک پہنچ گئی تھی۔
اس تاریخی آئی پی او کی قیادت دنیا کے بڑے مالیاتی اداروں پر مشتمل ایک کنسورشیم کر رہا ہے، جن میں گولڈمین ساکس اور مورگن اسٹینلے نمایاں ہیں۔
کمپنی کے حصص SPCX کے علامتی نام سے ناسڈاک اور ناسڈاک ٹیکساس میں ٹریڈ کیے جانے کی توقع ہے۔