سعودی عرب نے متحدہ عرب امارات، قطر اور کویت کی سرزمین اور علاقائی پانیوں کو نشانہ بنانے کی مذمت کرتے ہوئے زور دیا ہے کہ سعودی عرب، خلیجی برادر ممالک کے ساتھ کھڑا ہے اور ان کی سلامتی و استحکام کے تحفظ کے لیے اٹھائے گئے تمام اقدامات کی حمایت کرتا ہے۔
یہ بات جدہ میں ولی عہد و وزیر اعظم شہزادہ محمد بن سلمان بن عبد العزیز آل سعود کی زیر صدارت ہونے والے سعودی کابینہ کے اجلاس کے دوران کہی گئی ہے۔
مزید پڑھیں
سعودی پریس ایجنسی کے مطابق اجلاس میں کابینہ کو اسلامی جمہوریہ موریتانیہ کے صدر اور جاپان کی وزیر اعظم کی جانب سے موصول ہونے والے دو خطوط کے مندرجات سے آگاہ کیا گیا۔
سعودی کابینہ نے مختلف ممالک اور عالمی تنظیموں کے ساتھ تعاون کے فروغ سے متعلق پیش رفت کا بھی جائزہ لیا، اور اس تناظر میں سعودی، ترک رابطہ کونسل کے تیسرے اجلاس کے نتائج کو سراہا، جنہوں نے
دوطرفہ تعلقات کو مزید مضبوط بنانے اور مختلف شعبوں میں تعاون کو نئی وسعت دینے کے مشترکہ عزم کی عکاسی کی تاکہ دونوں ممالک اور عوام کے مفادات کو فروغ دیا جا سکے۔
کابینہ نے اقوام متحدہ کے تحت ڈیجیٹل گورنمنٹ سینٹر کے لئے ریاض کے انتخاب کو سعودی عرب کی قیادت اور عالمی و علاقائی کردار کا اعتراف قرار دیا۔
اس اقدام کو بین الاقوامی کثیرالجہتی تعاون کے فروغ، جدت کی حمایت اور مصنوعی ذہانت کی ٹیکنالوجیز کو اپنانے کے ذریعے ایک زیادہ جامع اور پائیدار ڈیجیٹل مستقبل کی تعمیر کی جانب اہم قدم قرار دیا گیا۔
اجلاس میں مالی سال 2026 کے لیے ریاستی بجٹ کی سہ ماہی کارکردگی رپورٹ کا بھی جائزہ لیا گیا، جس میں صحت، تعلیم، سماجی ترقی اور بنیادی ڈھانچے خصوصاً پانی اور توانائی کے شعبوں پر مسلسل ترجیحی بنیادوں پر اخراجات بڑھانے کے عزم کو اجاگر کیا گیا تاکہ شہریوں کو فراہم کی جانے والی خدمات کو مزید بہتر بنایا جا سکے۔
اسی دوران کابینہ نے سال 2025 میں صنعت اور کان کنی کے شعبوں میں تیز رفتار ترقی، مقامی صنعتی صلاحیتوں کے استحکام، معیاری سرمایہ کاری کے حصول اور ہدفی شعبوں میں خود کفالت کے فروغ کو سراہا، جس سے پیداواری بنیاد کو متنوع اور پائیدار بنانے کے ساتھ ساتھ قومی برآمدات کی عالمی منڈیوں میں مسابقت بڑھانے میں مدد ملے گی۔
ولی عہد شہزادہ محمد بن سلمان بن عبد العزیز آل سعود کی صدارت میں ہونے والے آج کے کابینہ اجلاس میں ریاض میں ’کنگڈم یونیورسٹی‘ کے قیام کی منظوری بھی دی گئی، اس کے علاوہ انشورنس تنازعات اور خلاف ورزیوں سے متعلق کمیٹیوں کے طریقہ کار اور ضوابط کی بھی منظوری دی گئی۔