امریکی صدر ڈونلڈ ٹرمپ نے آج جمعہ کے روز ایران کو ’معاہدہ یا تباہی‘ میں سے ایک انتخاب کرنے کی وارننگ دی اور دونوں ممالک کے درمیان جنگ کے خاتمے کے لیے جاری مذاکرات میں ایران کی جانب سے پیش کیے گئے تازہ ترین منصوبے پر عدم اطمینان کا اظہار کیا ہے۔
صدر ٹرمپ نے وائٹ ہاؤس میں صحافیوں سے گفتگو کرتے ہوئے کہا وہ معاہدہ کرنا چاہتے ہیں، لیکن میں اس سے مطمئن نہیں ہوں، اس لیے دیکھتے ہیں کیا ہوتا ہے۔
تاہم انہوں نے نئی تجویز میں موجود خامیوں کی تفصیل بیان نہیں کی۔
مزید پڑھیں
العربیہ کے مطابق انہوں نے مزید کہا کہ ہم اس وقت ایران کے ساتھ ٹیلی فون کے ذریعے مذاکرات کر رہے ہیں، اور بات چیت میں کچھ پیش رفت ہوئی ہے، لیکن ساتھ ہی یہ بھی واضح کیا کہ وہ اس بات کے بارے میں پُریقین نہیں کہ دونوں ممالک کسی حتمی معاہدے تک پہنچ سکیں گے۔
ٹرمپ نے ایرانی قیادت کو ’انتشار کا شکار‘ قرار دیتے ہوئے کہا کہ ایرانی رہنما
آپس میں منقسم ہیں اور ان کے درمیان اتفاق نہیں پایا جاتا، اور یہ کہ تہران کے اندر مختلف دھڑے موجود ہیں، جہاں کچھ مذاکرات کے حامی ہیں مگر الجھن کا شکار ہیں۔
دوسری جانب، ایران نے پاکستان کے ذریعے امریکہ کو نئی تجویز پیش کی ہے، جس کا مقصد مشرقِ وسطیٰ میں جاری جنگ کا مستقل خاتمہ ہے۔
ایرانی سرکاری خبر رساں ایجنسی ایرنا کے مطابق یہ تجویز جمعرات کی شب پاکستان کے توسط سے امریکہ کو بھیجی گئی تاہم اس کی مزید تفصیلات فراہم نہیں کی گئیں۔
اسی دوران، امریکی میڈیا پلیٹ فارم ایکسیوس کے ایک ذریعے نے بتایا کہ امریکی نمائندہ اسٹیو وٹکوف نے ایرانی تجویز میں ترامیم بھیجی ہیں، جن میں جوہری پروگرام کو بھی معاہدے کا حصہ بنانے کی بات شامل ہے۔
امریکہ اور ایران کے درمیان ٹیلی فون پر مذاکرات جاری
ذرائع کے مطابق امریکہ نے ایران سے مطالبہ کیا ہے کہ مذاکرات مکمل ہونے تک کوئی نیا جوہری سرگرمی شروع نہ کی جائے اور نہ ہی افزودہ یورینیم کی منتقلی کی جائے۔
اس سے قبل بھی ایکسیوس نے رپورٹ کیا تھا کہ ایران نے پاکستان میں موجود ثالثوں کو ایک نئی تجویز دی ہے تاکہ اسے واشنگٹن تک پہنچایا جا سکے، جبکہ سی این این کے مطابق ایران ایک ترمیم شدہ امن منصوبہ پیش کرنے کی تیاری کر رہا ہے، اور ثالثوں کو امریکی ردعمل کا انتظار ہے۔
ذرائع کا یہ بھی کہنا ہے کہ اگرچہ صورتحال تاحال غیر واضح ہے لیکن مذاکرات میں پیش رفت کے اشارے ضرور موجود ہیں۔