برطانوی اخبار ’دی ٹائمز‘ نے اپنی رپورٹ میں دعویٰ کیا ہے کہ امریکی خفیہ ایجنسی سی آئی اے نے ایران میں خفیہ سائبر اور انٹیلی جنس آپریشن کے دوران اسرائیلی کمپنی کے تیار کردہ اسپائی ویئر ’پیگاسس‘ کا استعمال کرتے ہوئے ڈیجیٹل مہم چلائی ہے۔
رپورٹ کے مطابق یہ کارروائی اس وقت کی گئی جب ایک امریکی لڑاکا طیارہ ایرانی حدود میں مار گرایا گیا اور اس کے پائلٹس سے رابطہ منقطع ہو گیا۔
اس کے بعد امریکی اداروں نے پائلٹس کو بازیاب کرانے کے لیے پیچیدہ انٹیلی جنس اور فوجی آپریشن شروع کیا۔
مزید پڑھیں
رپورٹ میں کہا گیا ہے کہ پیگاسس سافٹ ویئر کے ذریعے ایرانی سیکیورٹی حکام اور پاسدارانِ انقلاب سے منسلک عناصر کو جعلی پیغامات بھیجے گئے، جن میں یہ تاثر دیا گیا کہ لاپتہ امریکی پائلٹ کو پہلے ہی بازیاب کر لیا گیا ہے۔ اس کا مقصد ایرانی سرچ آپریشن کو الجھانا اور ان کی حکمت عملی کو متاثر کرنا تھا۔
اخبار کے مطابق اس ڈیجیٹل دھوکہ دہی نے زمینی سطح پر ایرانی تلاش
کی کارروائیوں کو متاثر کیا، جس کے بعد امریکی فورسز نے مبینہ طور پر دوسرے پائلٹ کو محفوظ طریقے سے نکالنے میں کامیابی حاصل کی۔
رپورٹ میں ایک اور متنازع دعویٰ جدید ٹیکنالوجی کے استعمال سے متعلق کیا گیا ہے، جسے ایک مستقبل کی جاسوسی ٹیکنالوجی قرار دیا گیا ہے۔
اس کے بارے میں کہا گیا ہے کہ یہ نظام دل کی دھڑکن کی کمزور برقی و مقناطیسی علامات کو دور فاصلے سے شناخت کرنے کی صلاحیت رکھتا ہے اور اسے مصنوعی ذہانت کے ساتھ ملا کر استعمال کیا جاتا ہے۔
ذرائع کے مطابق یہ ٹیکنالوجی لاک ہیڈ مارٹن کی ایک ذیلی یونٹ نے تیار کی ہے اور اسے محدود پیمانے پر تجرباتی طور پر استعمال کیا گیا ہے تاہم اس کے عملی استعمال کی تفصیلات غیر واضح ہیں۔
رپورٹ میں مزید دعویٰ کیا گیا ہے کہ ایک امریکی پائلٹ کئی دن تک ایرانی علاقے کے دشوار گزار پہاڑی علاقے میں چھپا رہا، جہاں سے اسے بعد میں محفوظ نکالا گیا تاہم ان تمام معلومات کی آزاد ذرائع سے تصدیق نہیں ہو سکی۔