سید مسرت خلیل
جدہ
جدہ میں کنزا ویسٹرن پروونس انڈر 19 کرکٹ ٹورنامنٹ کا آغاز ہوگیا۔
پہلے ہفتے میں بوائز کے تین اور گرلز کا ایک میچ کھیلا گیا۔
آئی آئی ایس جے اے کے حسین نے 100 رنز کی شاندار اننگز کھیلی، جبکہ گرلز مقابلے میں جدہ فائٹر نے کامیابی حاصل کی۔
کنزا ویسٹرن پروونس انڈر 19 بوائز اینڈ گرلز کلر کٹ کرکٹ ٹورنامنٹ کا آغاز ہوگیا۔
ٹورنامنٹ کے پہلے ہفتے میں 4 میچ کھیلے گئے، جن میں انڈر 19 بوائز کے 3 اور انڈر 19 گرلز کا ایک میچ شامل تھا۔
ٹورنامنٹ کے افتتاحی ہفتے کی نمایاں کارکردگی آئی آئی ایس جے اے کے کھلاڑی حسین کی شاندار سنچری رہی، جنہوں نے پی آئی ایس جے وائٹ کے خلاف 100 رنز کی یادگار اننگز کھیل کر اپنی ٹیم کی کامیابی میں اہم کردار ادا کیا۔
انڈر 19 بوائز کے پہلے میچ میں آئی آئی ایس جے اے نے ٹاس جیت کر پہلے بیٹنگ کرتے ہوئے مقررہ 18 اوورز میں 4 وکٹوں کے نقصان پر 193 رنز بنائے۔
مزید پڑھیں
اوپنر حسین نے جارحانہ بیٹنگ کا مظاہرہ کرتے ہوئے 56 گیندوں پر 4 چھکوں اور 9 چوکوں کی مدد سے شاندار 100 رنز اسکور کئے۔
ان کے ساتھی اوپنر ثاقب نے 26 گیندوں پر 4 چوکوں کی مدد سے 34 رنز بنائے۔
دونوں بلے بازوں نے پہلی وکٹ کے لیے 68 گیندوں پر 120 رنز کی عمدہ شراکت قائم کی۔
پی آئی ایس جے وائٹ کی جانب سے عواب نے 36 رنز دے کر 2 وکٹیں حاصل کیں۔
194 رنز کے ہدف کے تعاقب میں پی آئی ایس جے وائٹ کی ٹیم مقررہ 18 اوورز میں 8 وکٹوں کے نقصان پر 114 رنز ہی بنا سکی۔
اذان امیر نے 22 گیندوں پر 6 چوکوں کی مدد سے 31 رنز بنائے۔
آئی آئی ایس جے اے کی جانب سے عماد نے 22 رنز دے کر 3 وکٹیں حاصل کیں، جبکہ حسین، سمیع اللہ اور ثاقب نے ایک، ایک کھلاڑی کو آؤٹ کیا۔
اس طرح آئی آئی ایس جے اے نے میچ 79 رنز سے جیت لیا۔
دوسرے میچ میں پی آئی ایس جے گرین نے ٹاس جیت کر پہلے بیٹنگ کا فیصلہ کیا اور مقررہ 18 اوورز میں 5 وکٹوں کے نقصان پر 173 رنز بنائے۔
اوپنر عمر نے 23 گیندوں پر 6 چوکوں کی مدد سے 31 رنز بنائے اور منیب کے ساتھ پہلی وکٹ کے لیے 63 رنز کی شراکت قائم کی۔
منیب نے 19 گیندوں پر 3 چوکوں کی مدد سے 26 رنز اسکور کئے۔
دیگر بلے بازوں میں توصیف نے 23 رنز بنائے، جبکہ ارباب 47 رنز کے ساتھ ناٹ آؤٹ رہے۔
174 رنز کے ہدف کے تعاقب میں آئی آئی ایس جے بی کی پوری ٹیم 131 رنز پر آؤٹ ہوگئی۔ پاشا نے 40 اور علی نے 22 رنز بنائے۔
پی آئی ایس جے گرین کی جانب سے فیضان نے 2 وکٹیں حاصل کیں۔
یوں پی آئی ایس جے گرین نے مقابلہ 42 رنز سے اپنے نام کرلیا۔
تیسرے میچ میں آئی آئی ایس جے سی نے پہلے بیٹنگ کرتے ہوئے مقررہ 18 اوورز میں 6 وکٹوں کے نقصان پر 128 رنز بنائے۔
ٹیم کی جانب سے محمد نے 27، عارض نے 24 اور شاشان نے 23 رنز اسکور کئے۔
129 رنز کے ہدف کے تعاقب میں پی آئی ایس جے انگلش نے 5 وکٹوں کے نقصان پر مطلوبہ رنز حاصل کرکے میچ جیت لیا۔
اوپنر ذیشان نے 6 چوکوں کی مدد سے 42 رنز بنائے، جبکہ عبداللہ نے 5 چوکوں کی مدد سے 47 رنز اسکور کئے۔
دونوں بلے بازوں نے پہلی وکٹ کے لیے 75 رنز کی شاندار شراکت قائم کرکے اپنی ٹیم کو مضبوط آغاز فراہم کیا۔
آئی آئی ایس جے سی کی جانب سے سفیان نے 2 وکٹیں حاصل کیں۔
اس طرح پی آئی ایس جے انگلش نے مقابلہ 5 وکٹوں سے جیت لیا۔
ٹورنامنٹ کے پہلے ہفتے میں انڈر 19 گرلز کا مقابلہ جدہ فائٹر اور جدہ ٹائٹن کے درمیان کھیلا گیا۔ میچ کے دوران سیکیورٹی کے سخت انتظامات کئے گئے تھے۔
جدہ فائٹر نے ٹاس جیت کر پہلے بیٹنگ کرنے کا فیصلہ کیا اور مقررہ 14 اوورز میں 4 وکٹوں کے نقصان پر 89 رنز بنائے۔
ٹیم کی جانب سے اوپنر نجویٰ نے 36 رنز کی عمدہ اننگز کھیلی، جبکہ اشیکا نے 25 رنز اسکور کئے۔ دونوں بلے باز ناٹ آؤٹ رہیں۔
90 رنز کے ہدف کے تعاقب میں جدہ ٹائٹن کی ٹیم مقررہ اوورز میں 4 وکٹوں کے نقصان پر 63 رنز ہی بنا سکی۔
جدہ ٹائٹن کی جانب سے فریدہ نے 14 رنز بنائے، جبکہ عریشہ 14 رنز کے ساتھ ناقابلِ شکست رہیں۔
جدہ فائٹر کی جانب سے عائشہ اکرم، حلا، طوبیٰ اور نجویٰ نے ایک، ایک وکٹ حاصل کی۔
اس طرح جدہ فائٹر نے میچ 26 رنز سے جیت کر گرلز مقابلوں میں کامیاب آغاز کیا۔
کنزا بیوریجز ٹورنامنٹ کے مرکزی اسپانسر ہیں، جبکہ فلائی ایڈیل، زم زم ٹونائٹ، او سی ایس سی ایل اور ایس پی سی آئی بطور شریک اسپانسرز تعاون کر رہے ہیں۔
ٹورنامنٹ کے افتتاحی ہفتے میں حسین کی شاندار سنچری، بوائز ٹیموں کے دلچسپ مقابلوں اور گرلز میچ میں جدہ فائٹر کی کامیابی نے ایونٹ کو یادگار بنا دیا۔
نوجوان کھلاڑیوں کی عمدہ کارکردگی نے آئندہ مقابلوں کے لیے بھی شائقین کی دلچسپی بڑھا دی ہے۔