سید مسرت خلیل
جدہ
جدہ میں ویسٹرن پروونس کرکٹ ایسوسی ایشن کے زیرِ اہتمام کنزا کلر کٹ ٹرافی 2026 کی رونمائی ہوئی۔
تقریب میں 39 ٹیموں کے کپتانوں، اسپانسرز، میڈیا نمائندوں اور اسکول کوچز نے شرکت کی۔
ٹورنامنٹ میں باقاعدہ لیگ میچز کے ساتھ انڈر 19 بوائز اور گرلز کے مقابلے بھی شامل ہیں۔
ویسٹرن پروونس کرکٹ ایسوسی ایشن (WPCA) کے زیرِ اہتمام کنزا ویسٹرن پروونس کلر کٹ ٹرافی 2026 کی تقریبِ رونمائی جدہ کے ایک مقامی ریسٹورنٹ میں منعقد ہوئی، جس میں اسپانسرز، میڈیا کے نمائندوں، ٹیم کپتانوں، اسکولوں کے کوچز اور کھیلوں سے وابستہ ممتاز شخصیات نے شرکت کی۔
تقریب کے ناظم ڈاکٹر سید ضیاء الدین کے مطابق ٹورنامنٹ میں 39 ٹیمیں شریک ہیں، جبکہ مقابلوں کو دو الگ زمروں میں تقسیم کیا گیا ہے۔
ڈبلیو پی سی اے کے معمول کے لیگ میچز جمعہ کے روز صبح اور دوپہر کے سیشنز میں کھیلے جائیں گے، جبکہ انڈر 19 اسکول بوائز اور گرلز ٹیموں کے مقابلے ہفتے کی دوپہر منعقد ہوں گے۔
ٹورنامنٹ کے آغاز کے لیے 16 اکتوبر 2026 کی تاریخ متوقع بتائی گئی تھی۔
مزید پڑھیں
ٹورنامنٹ کے اسپانسرز
اس اہم ایونٹ کے ٹائٹل اسپانسر کنزا بیوریجز ہیں، جبکہ زم زم ٹونائٹ ریسٹورنٹ گولڈ اسپانسر اور فلائی ایڈیل سلور اسپانسر کی حیثیت سے تعاون کر رہے ہیں۔
اس کے علاوہ اورینٹل کمرشل اینڈ شپنگ کمپنی لمیٹڈ (OCSCL) اور گولڈن انٹرنیشنل کنٹریکٹنگ کمپنی (GITC) بطور شریک اسپانسرز
ٹورنامنٹ کی سرپرستی کر رہی ہیں۔
ڈبلیو پی سی اے کے دیرینہ اسپانسر سعودی کنکریٹ پروڈکٹس انڈسٹریز (SCPI) بھی کرکٹ کے فروغ اور ایسوسی ایشن کی سرگرمیوں میں اپنا تعاون جاری رکھے ہوئے ہیں۔
اہم شخصیات کی شرکت
تقریب میں کنزا بیوریجز (ALJ) کے فرنچائز کوالٹی اینڈ سسٹین ایبلٹی ڈائریکٹر راجو بھگت نے بطور مہمانِ خصوصی شرکت کی۔
دیگر اہم شرکا میں فلائی ایڈیل کی ہیڈ آف مارکیٹنگ اینڈ کسٹمر ایکسپیرینس ہزر حفیظ، زم زم ٹونائٹ اینڈ گورمیٹ کے مالک ارشاد علی، او سی ایس سی ایل کے چیئرمین ڈاکٹر محمد عبدالحمید بخاری اور جنرل منیجر عبداللہ بغدادی شامل تھے۔
جی آئی ٹی سی کے مالک احسن سمرن، ایس سی پی آئی کے نمائندوں دجانی اور الیاس مصطفیٰ نے بھی تقریب میں شرکت کی۔
ڈبلیو پی سی اے کے چیئرمین اور کمیٹی کے ارکان نے ان تمام شخصیات اور اداروں کا کرکٹ کے فروغ میں تعاون پر شکریہ ادا کیا۔
ایسوسی ایشن نے مملکت میں کرکٹ کو فروغ دینے اور کھیل کی سرگرمیوں کو منظم انداز میں جاری رکھنے کے لیے سعودی عربین کرکٹ فیڈریشن (SACF) کی مسلسل حمایت اور تعاون کو بھی سراہا۔
تقریب کا باقاعدہ آغاز
تقریب کا آغاز کاشف بیگ کی تلاوتِ کلامِ پاک سے ہوا، جس کے بعد ڈاکٹر سید ضیاء الدین نے استقبالیہ خطاب کیا اور مہمانوں کو خوش آمدید کہا۔
ڈبلیو پی سی اے کے سینئر رکن سہیل شاہ اور کمیٹی ممبر جاوید احمد نے اپنے خطاب میں کنزا بیوریجز اور دیگر اسپانسرز کے فراخدلانہ تعاون کو سراہتے ہوئے امید ظاہر کی کہ مستقبل میں بھی یہ شراکت داری برقرار رہے گی۔
انہوں نے مہمانانِ خصوصی، میڈیا کے نمائندوں، ٹیم کپتانوں اور دیگر معزز شخصیات کی تقریب میں شرکت پر اظہارِ تشکر کیا۔
کھلاڑیوں کی کٹس کی رونمائی
تقریب کے دوران کنزا کلر کٹ ٹورنامنٹ کے لیے تیار کردہ خصوصی کٹس کی رونمائی بھی کی گئی۔
مہمانِ خصوصی راجو بھگت نے ٹورنامنٹ کی مرکزی کٹس کی رونمائی کی، جبکہ انڈر 19 بوائز ٹورنامنٹ کی کٹس کی رونمائی ڈبلیو پی سی اے کی جانب سے سہیل شاہ، جاوید احمد، کاشف مرزا اور رفیع اللہ نے کی۔
اسکول گرلز ٹیموں کی کٹس کی رونمائی متعلقہ اسکولوں کی خواتین کوچز نے انجام دی۔
کنزا ٹرافی کی رونمائی
تقریب کا سب سے نمایاں مرحلہ کنزا ویسٹرن پروونس کلر کٹ ٹرافی 2026 کی باضابطہ رونمائی تھا۔
مہمانِ خصوصی راجو بھگت نے ڈبلیو پی سی اے کی کمیٹی کے ارکان اور جدہ کے مختلف اسکولوں کے کوچز کے ہمراہ ٹرافی کی رونمائی کی۔
اس موقع پر حاضرین نے پُرجوش تالیوں سے مہمانوں اور منتظمین کا خیرمقدم کیا۔
تقریب میں موجود 39 شریک ٹیموں کے کپتانوں، اسکولوں کے مرد و خواتین کھلاڑیوں، میڈیا کے نمائندوں اور کھیلوں سے وابستہ شخصیات نے اس تقریب کو جدہ میں کرکٹ کے فروغ کے لیے ایک مثبت پیش رفت قرار دیا۔
ہر میچ میں کھلاڑیوں کے لیے انعامات
منتظمین کے مطابق ٹورنامنٹ کے لیگ میچز جدہ کے علاقے الویزیریہ میں واقع ڈبلیو پی سی اے گراؤنڈز میں کھیلے جائیں گے۔
توقع ظاہر کی گئی کہ جمعے کے روز صبح اور دوپہر کے سیشنز میں ہونے والے مقابلوں کو دیکھنے کے لیے کرکٹ کے شائقین بڑی تعداد میں گراؤنڈز کا رخ کریں گے۔
ٹورنامنٹ کے دوران ہر میچ میں نمایاں کارکردگی دکھانے والے کھلاڑیوں کی حوصلہ افزائی کے لیے انعامات اور تحائف بھی پیش کیے جائیں گے، جن کا اہتمام فلائی ایڈیل کی جانب سے کیا گیا ہے۔
اسپانسرز اور شرکا کا شکریہ
تقریب کی نظامت ڈاکٹر سید ضیاء الدین نے انجام دی، جبکہ پروگرام کا اختتام پُرتکلف عشائیے پر ہوا۔
ویسٹرن پروونس کرکٹ ایسوسی ایشن نے ٹورنامنٹ کے تمام اسپانسرز، مہمانوں، شریک ٹیموں، اسکولوں، میڈیا کے نمائندوں اور تعاون کرنے والے اداروں کا شکریہ ادا کیا۔
ایسوسی ایشن کے مطابق اس نوعیت کے مقابلے جدہ میں کرکٹ کے فروغ کے ساتھ ساتھ نوجوان کھلاڑیوں، خصوصاً اسکولوں کے طلبہ و طالبات کو اپنی صلاحیتیں منوانے کے بہتر مواقع فراہم کریں گے۔