جدہ کورنیش سرکٹ میں اے بی بی فارمولا ای ورلڈ چیمپئن شپ 2026 کے چوتھے اور پانچویں راؤنڈ کے لیے 430 مارشلز مکمل تیاری کے ساتھ موجود ہیں۔
مزید پڑھیں
سبق ویب سائٹ کے مطابق یہ ایونٹ چیمپئن شپ کے 12ویں ایڈیشن کا حصہ ہے اور اس کی کامیابی و حفاظت کو یقینی بنانے کے لیے ایک مربوط آپریشنل نظام تشکیل دیا گیا ہے۔
مارشلز کسی بھی بین الاقوامی ریس کی بنیاد سمجھے جاتے ہیں، کیونکہ وہ انتظامی امور، حفاظتی اقدامات اور فنی نگرانی کی ذمہ داری سنبھالتے ہیں۔ اس سال ٹیم میں سب سے کم عمر رکن 18 سال کا ہے
جبکہ سب سے بڑی عمر 54 سال ہے، جو مختلف تجربات اور مہارتوں کے امتزاج کی عکاسی کرتا ہے۔
ریس کنٹرول اور آپریشن روم کی ٹیم پورے ایونٹ کی نگرانی جدید مانیٹرنگ سسٹمز اور براہِ راست رابطے کے ذریعے کرتی ہے اور ضرورت پڑنے پر فوری فیصلے لیتی ہے تاکہ مقابلہ قواعد کے مطابق جاری رہے۔
اسی طرح ٹریک کے مختلف حصوں پر تعینات مارشلز گاڑیوں کی نقل و حرکت پر نظر رکھتے ہیں اور کسی حادثے یا اچانک رُک جانے کی صورت میں فوری کارروائی کرتے ہیں۔
فائر مارشلز ممکنہ آگ یا تکنیکی خرابی سے نمٹنے کے لیے خصوصی آلات اور تربیت کے ساتھ تیار رہتے ہیں۔ اسی طرح ایویکیوشن ٹیم ڈرائیورز یا گاڑیوں کی محفوظ منتقلی کو یقینی بناتی ہے اور یہ عمل میڈیکل ٹیم کے ساتھ مکمل رابطے میں انجام دیا جاتا ہے، جو ہنگامی طبی صورتحال کے لیے ہر وقت تیار رہتی ہے۔
لاجسٹک مارشلز سازوسامان اور عملے کی آمدورفت کو منظم کرتے ہیں جبکہ پٹ لین اور اسٹارٹ لائن پر موجود ٹیمیں گاڑیوں اور ٹیموں کی نقل و حرکت کو قواعد کے مطابق رکھتی ہیں۔
اسی طرح فنی جانچ کی ٹیم ریس سے پہلے اور بعد میں گاڑیوں کا تفصیلی معائنہ کرتی ہے تاکہ تمام کاریں منظور شدہ تکنیکی ضوابط پر پوری اتریں اور مقابلہ منصفانہ رہے۔
430 مارشلز کی یہ منظم موجودگی موٹر اسپورٹس میں قومی صلاحیتوں پر کی گئی سرمایہ کاری کی عکاسی کرتی ہے۔ اس سے یہ بھی واضح ہوتا ہے کہ مملکت میں عالمی مقابلوں کی میزبانی صرف جدید انفرا اسٹرکچر تک محدود نہیں بلکہ تربیت یافتہ انسانی وسائل بھی اس کامیابی کا اہم حصہ ہیں۔
یاد رکھیں کہ جب شائقین کی نظریں اسٹارٹ لائن پر موجود گاڑیوں پر ہوتی ہیں تو پسِ پردہ یہی مارشلز ایونٹ کی رفتار اور حفاظت کو یقینی بنا رہے ہوتے ہیں۔
