مسجد الحرام کے صحنِ مطاف کا سنگِ مرمر تیز دھوپ کے باوجود دِن کے وقت بھی نسبتاً ٹھنڈا رہتا ہے، جس کے پیچھے ایک مکمل انجینئرنگ نظام اور خاص قسم کے قدرتی پتھر کا انتخاب شامل ہے۔
مزید پڑھیں
حرمین شریفین کے امور کے نگراں ادارے کی جانب سے یہ خاص انتظام طواف کرنے والوں کو زیادہ گرمی میں بھی آرام دہ اور محفوظ ماحول فراہم کرتا ہے۔
اس فرش کے لیے ہلکے رنگ کا قدرتی سنگِ مرمر استعمال کیا گیا ہے، جو ٹھنڈے پہاڑی علاقوں سے نکالا جاتا ہے۔ اس پتھر کی خاصیت یہ ہے کہ یہ سورج کی شعاعوں کو جذب کرنے کے بجائے بڑی حد تک واپس
منعکس کر دیتا ہے، جس سے اس کی سطح زیادہ گرم نہیں ہوتی۔
اس کے علاوہ ہلکا رنگ بھی گرمی کم رکھنے میں اہم کردار ادا کرتا ہے، کیونکہ گہرے رنگ کے مقابلے میں یہ کم حرارت جذب کرتا ہے۔
ایک اہم بات یہ بھی ہے کہ صرف پتھر کا انتخاب ہی نہیں بلکہ اس کی تنصیب کا طریقہ بھی اہم ہے۔ سنگِ مرمر کی موٹی سلیں خاص انسولیشن تہوں کے اوپر نصب کی گئی ہیں اور ان کے نیچے ایسی جگہ رکھی گئی ہے جہاں سے ہوا گزر سکتی ہے، جس کے نتیجے میں گرمی نیچے منتقل ہونے کے بجائے پھیل جاتی ہے اور سطح زیادہ گرم نہیں ہوتی۔
اس کے علاوہ صحن کی وسیع جگہ، طواف کرنے والوں کی مسلسل حرکت اور ہوا کا بہاؤ بھی درجہ حرارت کو کم رکھنے میں مدد دیتا ہے، جس سے گرمی کا احساس کم ہو جاتا ہے۔
یہ تمام اقدامات جدید انجینئرنگ اور قدرتی مواد کے امتزاج کی مثال ہیں، جن کا مقصد ضیوف الرحمن کو بہتر سہولت فراہم کرنا اور مسجد الحرام میں عبادت کے دوران زیادہ سے زیادہ آرام مہیا کرنا ہے۔
