بلیاں پیٹ، دم اور پنجے چھونے پر ناراض کیوں ہوتی ہیں؟
ماہرین نے ان کے دفاعی رویے اور محبت کے دلچسپ اشاروں کی وضاحت کردی۔
بلیوں کو دنیا بھر میں مقبول ترین پالتو جانوروں میں شمار کیا جاتا ہے۔
ان کی شرارتیں، معصوم حرکتیں اور انسانوں سے محبت کے منفرد انداز لوگوں کو حیران کردیتے ہیں۔
تاہم بلیاں پالنے والے افراد ایک عجیب تجربے سے ضرور گزرے ہوں گے۔
بلی خود انسان کے قریب آتی ہے، پیار کرواتی ہے اور پھر اچانک پیٹ یا دم کو چھونے پر ناراض ہوکر پنجہ مارنے لگتی ہے۔
آخر اس اچانک تبدیلی کی وجہ کیا ہے؟
کیا بلیاں واقعی پیار سے تنگ آجاتی ہیں یا ان کے جسم میں کچھ ایسے حساس حصے موجود ہیں جنہیں چھونے سے خطرے کا احساس پیدا ہوتا ہے؟
سائنسی ویب سائٹ لائیو سائنس کی ایک رپورٹ میں جانوروں کے رویوں کے ماہرین نے اس دلچسپ سوال کی وضاحت کی ہے۔
مزید پڑھیں
بلیوں کے پیٹ کو چھونا خطرے کی علامت کیوں؟
جانوروں کی فلاح و بہبود کے ادارے انٹرنیشنل کیٹ کیئر سے وابستہ ماہر سارہ ایلس کے مطابق بلیاں فطری طور پر شکاری ہونے کے ساتھ دوسرے جانوروں کا شکار بھی بن سکتی ہیں۔ یہی وجہ ہے کہ ان میں اپنی حفاظت کی جبلت انتہائی مضبوط ہوتی ہے۔
بلی کے پیٹ میں معدہ، اور جگر جیسے اہم اعضا موجود ہوتے ہیں۔
جسم کے دوسرے حصوں کے مقابلے میں یہ علاقہ ہڈیوں کی مضبوط حفاظتی ساخت سے کم محفوظ ہوتا ہے۔
جب کوئی شخص اچانک بلی کے پیٹ پر ہاتھ رکھتا ہے تو وہ اسے محبت کے بجائے ممکنہ خطرہ سمجھ سکتی ہے۔
ایسی صورت میں پنجہ مارنا یا کاٹنے کی کوشش کرنا دراصل اپنا دفاع کرنے کا فطری ردعمل ہوسکتا ہے۔
دم کو چھونے سے بلیاں پریشان کیوں ہوتی ہیں؟
ماہرین کے مطابق بلی کی دم جسم کا ایک اہم اور حساس حصہ ہے۔
دم نہ صرف توازن برقرار رکھنے میں مدد دیتی ہے بلکہ بلی اپنے جذبات کے اظہار کے لیے بھی اسے استعمال کرتی ہے۔
دوسرے جانوروں کے حملے کے دوران دم اور اس کا نچلا حصہ نشانہ بن سکتا ہے۔
اسی لیے بعض بلیاں دم کو چھونے پر فوراً دفاعی رویہ اختیار کرلیتی ہیں۔
تاہم تمام بلیوں کا ردعمل یکساں نہیں ہوتا۔
بعض بلیاں دم کی جڑ کے قریب ہلکی مالش پسند کرتی ہیں اور خوشی سے دم اوپر اٹھا لیتی ہیں۔
پنجوں کو چھونا بھی ناپسند کیوں؟
بلیوں کے پنجے ان کی حفاظت، شکار کرنے اور خطرے سے فرار ہونے میں بنیادی کردار ادا کرتے ہیں۔
جانوروں کے رویوں کی ماہر میکل ڈیلگاڈو کے مطابق بلیوں کے پنجوں میں ایسے حساس حصے ہوتے ہیں جو دباؤ اور درجہ حرارت میں تبدیلیاں محسوس کرتے ہیں۔
اس لیے پنجوں کو پکڑنا یا دبانا بعض بلیوں کے لیے ناگوار تجربہ بن سکتا ہے، خصوصاً جب انہیں محسوس ہو کہ وہ ضرورت پڑنے پر بھاگنے یا اپنا دفاع کرنے کے لیے آزاد نہیں ہیں۔
کیا پیٹ دکھانے کا مطلب محبت ہے؟
یہ ایک عام غلط فہمی ہے کہ اگر بلی انسان کے سامنے کمر کے بل لیٹ کر اپنا پیٹ ظاہر کرے تو وہ پیٹ پر ہاتھ پھروانا چاہتی ہے۔
ماہرین کے مطابق ایسا ہمیشہ نہیں ہوتا۔
بلی کا اس طرح لیٹنا اس بات کی علامت ہوسکتا ہے کہ وہ اپنے ماحول میں محفوظ اور پُرسکون محسوس کررہی ہے۔
تاہم اعتماد کا اظہار لازماً جسم کو چھونے کی دعوت نہیں ہوتا۔
بلی مکمل طور پر مطمئن ہونے کے باوجود پیٹ پر ہاتھ لگنے سے ناراض ہوسکتی ہے۔
بلیوں کو کہاں پیار کرنا پسند ہے؟
تحقیقی مشاہدات کے مطابق زیادہ تر دوستانہ بلیاں گالوں، ٹھوڑی کے نیچے، سر اور کانوں کے قریب نرمی سے ہاتھ پھروانا پسند کرتی ہیں۔
ان حصوں میں خوشبو پیدا کرنے والے مخصوص غدود موجود ہوتے ہیں۔
بلیاں دوسری مانوس بلیوں اور اپنے پسندیدہ انسانوں کے ساتھ سر اور گال رگڑ کر سماجی تعلق بھی قائم کرتی ہیں۔
ماہرین مشورہ دیتے ہیں کہ بلی کو زبردستی چھونے کے بجائے پہلے اسے خود قریب آنے دیا جائے۔
ناراضی کی ابتدائی علامات پہچانیں
بلیاں اکثر حملہ کرنے سے پہلے اپنے جسمانی انداز سے ناپسندیدگی ظاہر کرتی ہیں۔ دم تیزی سے ہلانا، کان پیچھے کرنا، سر اچانک ہاتھ کی طرف موڑنا یا دور ہٹنے کی کوشش کرنا اہم اشارے ہیں۔
اگر ان علامات کو نظرانداز کیا جائے تو بلی غرّانے، کاٹنے یا پنجہ مارنے تک جاسکتی ہے۔
بہتر طریقہ یہ ہے کہ چند سیکنڈ پیار کرنے کے بعد ہاتھ روک لیا جائے۔
اگر بلی دوبارہ خود قریب آئے تو پیار جاری رکھا جاسکتا ہے، ورنہ اسے آرام کرنے دیا جائے۔
ماہرین کے مطابق ہر بلی کی شخصیت اور پسند مختلف ہوتی ہے۔
بعض بلیاں پیٹ پر ہاتھ پھروانے سے لطف اندوز ہوتی ہیں، جبکہ دوسری اسے بالکل پسند نہیں کرتیں۔
اصل راز یہ ہے کہ بلیوں سے محبت صرف انہیں چھونے میں نہیں بلکہ ان کے اشاروں، حدود اور پسند کو سمجھنے میں بھی پوشیدہ ہے۔