سعودی ارامکو نے شرق–غرب پائپ لائن، ینبع بندرگاہ، مشرقی ساحلی ٹرمینلز اور متبادل شپنگ طریقوں کے ذریعے ایسا نظام بنایا ہے جس کا مقصد کسی ایک راستے میں خلل کے باوجود تیل کی برآمدات جاری رکھنا ہے۔
موجودہ علاقائی کشیدگی نے اس نیٹ ورک کی اہمیت کو پہلی بار بڑے پیمانے پر عملی طور پر نمایاں کیا ہے۔
عالمی تیل منڈی ایک ایسے دور سے گزر رہی ہے جہاں جغرافیائی کشیدگی، سمندری راستوں میں رکاوٹ اور توانائی کی ترسیل میں اچانک خلل چند گھنٹوں میں قیمتوں کو اوپر یا نیچے لے جا سکتا ہے۔
ایسے وقت میں سعودی ارامکو کی جانب سے یہ پیغام کہ کمپنی کسی بھی بڑے خلل کو مختصر مدت میں سنبھال سکتی ہے، صرف ایک انتظامی دعویٰ نہیں بلکہ عالمی توانائی منڈی کے لیے ایک اہم اشارہ ہے۔
ارامکو کے صدر اور چیف ایگزیکٹو امین الناصر کے مطابق کمپنی کے پاس اس قدر لچکدار انفراسٹرکچر موجود ہے کہ کسی مقام پر نقصان یا رکاوٹ پیدا ہونے کی صورت میں تیل کی ترسیل کو متبادل راستوں سے جاری رکھا جا سکتا ہے۔
اس صلاحیت کی اصل اہمیت اس وقت سامنے آئی جب مشرقی سعودی عرب سے بحیرہ احمر کے ساحل تک جانے والے اہم شرق–غرب آئل پائپ لائن کو دباؤ اور عارضی رکاوٹوں کا سامنا کرنا پڑا۔
مزید پڑھیں
1200 کلومیٹر کا راستہ
سعودی عرب کی شرق–غرب پائپ لائن، جسے پٹرولاين بھی کہا جاتا ہے، تقریباً 1200 کلومیٹر طویل ہے۔
یہ مشرقی علاقوں کے تیل کو ملک کے مغربی ساحل پر واقع ینبع تک پہنچاتی ہے۔
اس لائن کی سب سے بڑی اہمیت یہ ہے کہ سعودی تیل کو آبنائے ہرمز
سے گزرنے کی ضرورت نہیں رہتی۔
یہ راستہ روزانہ تقریباً 70 لاکھ بیرل تک تیل منتقل کرنے کی صلاحیت رکھتا ہے، جس کی وجہ سے یہ دنیا کے اہم ترین متبادل توانائی راستوں میں شمار ہوتا ہے۔
حالیہ علاقائی کشیدگی اور ہرمز میں جہاز رانی کے خطرات کے دوران اس پائپ لائن کی اہمیت کئی گنا بڑھ گئی۔
رپورٹس کے مطابق ایک مرحلے پر تقریباً 40 لاکھ بیرل یومیہ اس کے ذریعے مغربی ساحل کی طرف منتقل کئے جا رہے تھے۔
یہ مقدار عالمی تیل سپلائی کے ایک نمایاں حصے کے برابر ہے۔
اسی لئے اس لائن کے کسی بھی تعطل کی خبر فوری طور پر عالمی منڈی کو متاثر کرتی ہے۔
نقصان ہوا، مگر تیل رکا نہیں
ستمبر میں شرق–غرب پائپ لائن کے بعض حصوں کو نقصان پہنچنے کے بعد عارضی طور پر اس کے ذریعے تیل کی ترسیل اور ینبع سے لوڈنگ متاثر ہوئی۔
تاہم ارامکو نے کم سطح پر آپریشن دوبارہ شروع کیا اور مرمت کے ساتھ ساتھ بہاؤ میں بتدریج اضافہ کیا گیا۔
کمپنی کی کوشش رہی کہ تیل کی ترسیل کو دوبارہ تقریباً 40 لاکھ بیرل یومیہ کی سطح تک پہنچایا جائے۔
یہاں اصل کہانی صرف پائپ لائن کی مرمت نہیں، بلکہ اس نظام کی لچک ہے جس کے ذریعے ارامکو کسی متاثرہ حصے کو بائی پاس کرکے یا دوسرے راستے استعمال کرکے برآمدات جاری رکھ سکتی ہے۔
یہی وجہ ہے کہ امین الناصر کا یہ بیان اہم ہے کہ کمپنی کسی بھی خلل کو مختصر مدت میں سنبھال سکتی ہے۔
ایک راستہ بند ہوا تو دوسرا کھول دیا گیا
شرق–غرب لائن میں رکاوٹ کے دوران سعودی عرب نے مشرقی بندرگاہوں سے تیل کی لوڈنگ میں اضافہ کردیا۔
ٹینکر ٹریکنگ کے اعداد و شمار کے مطابق ایک مرحلے پر ایک ہی دن میں 7 بڑے ٹینکروں پر تقریباً 14 ملین بیرل تیل لوڈ کیا گیا۔
یہ اس بات کی مثال ہے کہ سعودی عرب صرف ایک بندرگاہ یا ایک پائپ لائن پر انحصار نہیں کرتا۔
اگر مغربی راستے میں مسئلہ ہو تو مشرقی ساحل سے برآمدات بڑھائی جا سکتی ہیں، جبکہ ضرورت پڑنے پر ایک جہاز سے دوسرے جہاز میں خام تیل منتقل کرکے اسے مزید محفوظ راستوں پر بھی روانہ کیا جا سکتا ہے۔
یوں سعودی تیل کا نظام ایک واحد لائن کے بجائے ایک متعدد راستوں پر مشتمل نیٹ ورک بن چکا ہے۔
عالمی منڈی اتنی حساس کیوں ہے؟
سعودی عرب دنیا کے سب سے بڑے تیل برآمد کنندگان میں شامل ہے، اس لئے اس کی برآمدی صلاحیت میں چند لاکھ بیرل کا فرق بھی عالمی قیمتوں پر اثر ڈال سکتا ہے۔
جب شرق–غرب پائپ لائن کی بحالی کی خبریں سامنے آئیں تو عالمی منڈی میں تیل کی قیمتوں پر دباؤ بڑھا کیونکہ تاجروں نے اندازہ لگایا کہ سعودی خام تیل کی زیادہ مقدار دوبارہ مارکیٹ میں پہنچ سکتی ہے۔
ایک موقع پر برینٹ خام تیل کی قیمت میں دو ڈالر فی بیرل سے زیادہ کمی بھی دیکھی گئی۔
اس سے اندازہ ہوتا ہے کہ سعودی عرب کی ایک پائپ لائن کی مرمت بھی عالمی مہنگائی، ایندھن کی قیمتوں، شپنگ لاگت اور حتیٰ کہ بڑے مرکزی بینکوں کی شرح سود سے متعلق توقعات کو متاثر کر سکتی ہے۔
کیا خطرہ ختم ہوگیا؟
ابھی نہیں۔
شرق–غرب پائپ لائن سعودی تیل کو آبنائے ہرمز سے بچا دیتی ہے، لیکن ینبع سے نکلنے والے جہازوں کو بحیرہ احمر اور پھر باب المندب سے گزرنا پڑ سکتا ہے، جہاں سلامتی کے خطرات اپنی جگہ موجود ہیں۔
اسی لئے سعودی عرب کے لئے صرف ایک متبادل راستہ کافی نہیں۔
کچھ کھیپوں کو مصر کے انفراسٹرکچر کے ذریعے بحیرہ روم تک پہنچانے، مختلف بندرگاہوں کے استعمال اور جہاز سے جہاز تیل منتقلی جیسے طریقوں کی اہمیت بھی بڑھ گئی ہے۔
یہ تمام اقدامات ایک بڑے اصول کی طرف اشارہ کرتے ہیں: توانائی کے تحفظ کا مطلب صرف تیل پیدا کرنا نہیں بلکہ اسے ہر حالت میں خریدار تک پہنچانا بھی ہے۔
سعودی عرب کی نئی طاقت
ماضی میں سعودی عرب کی تیل طاقت کا ذکر اس کے بڑے ذخائر اور پیداواری صلاحیت کے حوالے سے کیا جاتا تھا، لیکن موجودہ بحران نے ایک تیسرے عنصر کو نمایاں کردیا ہے: ترسیل کی لچک۔
خلیج اور بحیرہ احمر دونوں جانب بندرگاہیں، شرق–غرب پائپ لائن، بڑے ذخیرہ مراکز اور شپنگ نیٹ ورک سعودی عرب کو وہ سہولت دیتے ہیں جو بہت کم تیل پیدا کرنے والے ممالک کے پاس موجود ہے۔
یہ صلاحیت خاص طور پر اس وقت اہم ہوجاتی ہے جب آبنائے ہرمز، بحیرہ احمر یا کسی ایک اہم تنصیب کو اچانک مسئلے کا سامنا ہو۔
اسی لئے ارامکو کی موجودہ حکمت عملی صرف سعودی عرب کے لئے نہیں بلکہ عالمی توانائی منڈی کے لئے بھی اہم ہے۔
اصل امتحان اس وقت نہیں ہوتا جب سب راستے کھلے ہوں، بلکہ اس وقت ہوتا ہے جب ایک راستہ بند ہوجائے۔
اور موجودہ بحران میں سعودی عرب کا پیغام واضح دکھائی دیتا ہے:
راستہ متاثر ہوسکتا ہے، مگر سعودی تیل کا بہاؤ ضروری نہیں کہ رک جائے۔