سید مسرت خلیل
جدہ
پاکستان انٹرنیشنل اسکول ریاض کے جونیئر اسکول بوائز ونگ میں سالانہ مقابلۂ قرأت منعقد ہوا، جس میں طلباء نے قرآنِ مجید کی خوبصورت تلاوت پیش کی۔
تقریب کا مقصد بچوں میں قرآنِ کریم سے محبت، قرأت کی مہارت اور اسلامی اقدار کو فروغ دینا تھا۔
پاکستان انٹرنیشنل اسکول ریاض کے جونیئر اسکول بوائز ونگ میں 16 ستمبر 2026 کو سالانہ مقابلۂ قرأت کا روح پرور اور بامقصد پروگرام منعقد کیا گیا۔
تقریب سیکشن ہیڈ محترمہ صدف عزیز کی زیرِ نگرانی اور پرنسپل جناب انوار الحق کی قیادت میں منعقد ہوئی، جبکہ محترمہ طاہرہ مسعود نے بطور مہمانِ خصوصی شرکت کی۔
اعجاز احمد طاہر اعوان نے تقریب کی تفصیلات سے آگاہ کرتے ہوئے بتایا کہ مقابلے میں گریڈ دوم سے گریڈ چہارم تک کے طلباء نے بھرپور جوش و خروش کے ساتھ حصہ لیا۔
طلبہ نے قرآنِ مجید کی خوبصورت اور پُرسوز تلاوت پیش کرکے حاضرین سے داد وصول کی اور تقریب کے روحانی ماحول کو مزید پُراثر بنا دیا۔
مقابلۂ قرأت کے انعقاد کا بنیادی مقصد طلباء میں قرآنِ کریم سے محبت پیدا کرنا، درست اور خوبصورت قرأت کی مہارت کو فروغ دینا اور انہیں اسلامی اقدار سے مزید قریب کرنا تھا۔
مزید پڑھیں
تقریب کی کامیابی میں منتظمین، معزز جج صاحبان اور تدریسی عملے نے اہم کردار ادا کیا۔
ان کی محنت، تعاون اور بھرپور لگن کے باعث مقابلہ خوش اسلوبی کے ساتھ پایۂ تکمیل تک پہنچا۔
تقریب کے اختتام پر پرنسپل جناب انوار الحق نے مقابلے میں شریک طلباء کی محنت، صلاحیت اور قرأت کی مہارت کو سراہتے ہوئے انہیں
خراجِ تحسین پیش کیا۔
انہوں نے طلباء کی حوصلہ افزائی کے لیے انعامات اور سرٹیفیکیٹس بھی تقسیم کئے۔
اس موقع پر ان تمام منتظمین، اساتذہ، جج صاحبان اور معاونین کا شکریہ ادا کیا گیا جنہوں نے اس بامقصد اور روح پرور تقریب کو کامیاب بنانے میں اپنا کردار ادا کیا۔