فٹبال ورلڈکپ 2026 میں آسٹریلیا کی نمائندگی کرنے والے نوجوان اسٹار کرسٹیان وولپاٹو عالمی ایونٹ کے بعد ایک سنگین تنازع کی زد میں آگئے۔
مزید پڑھیں
آسٹریلوی میڈیا کے مطابق سڈنی میں تیز رفتاری سے گاڑی چلانے پر پولیس نے انہیں روکا، جس کے بعد کیے گئے ایک منشیات کے ٹیسٹ میں مبینہ طور پر کوکین کی موجودگی سامنے آئی ہے۔
یہ معاملہ اس لیے بھی توجہ حاصل کر رہا ہے کہ 22 سالہ وولپاٹو نے حالیہ ورلڈکپ میں آسٹریلیا کی جانب سے 3 میچز کھیلے تھے، جبکہ وہ ملک کے ابھرتے ہوئے فٹبالرز میں شمار ہوتے ہیں۔
پولیس نے ایک ہی رات میں 2 بار روکا
نیو ساؤتھ ویلز پولیس کے مطابق ایک 22 سالہ شخص کو رات کے دوران 2 مرتبہ مقررہ حد سے زیادہ رفتار سے گاڑی چلاتے ہوئے روکا گیا۔
اہم بات یہ ہے کہ پولیس نے اس حوالے سے اپنے بیان میں نام ظاہر نہیں کیا، تاہم مقامی میڈیا نے اس شخص کی شناخت وولپاٹو کے طور پر کی ہے۔
پولیس کے مطابق پہلی مرتبہ روکے جانے پر اُن کا سڑک کنارے الکوحل ٹیسٹ کیا گیا، جسے انہوں نے کلیئر کرلیا اور پولیس نے تیز رفتاری پر ٹریفک جرمانہ کرنے کے بعد انہیں جانے دیا۔
لیکن تقریباً 2 گھنٹے بعد انہیں ایک بار پھر تیز رفتاری کے باعث روک لیا گیا۔ اس مرتبہ پولیس نے منشیات کا ٹیسٹ کیا، جس میں کوکین کے استعمال کا ابتدائی نتیجہ مثبت آیا۔
📌 فیکٹ باکس: وولپاٹو کیس ایک نظر میں
حتمی نتیجے کے لیے دوسرا نمونہ لیبارٹری روانہ
پولیس نے مزید تصدیق کے لیے دوسرا نمونہ تجزیے کی غرض سے لیبارٹری بھیج دیا ہے۔ اس لیے ابتدائی ٹیسٹ کو فی الحال حتمی نتیجہ قرار نہیں دیا جاسکتا۔
پولیس کے مطابق متعلقہ شخص کا بین الاقوامی ڈرائیونگ لائسنس 6 ماہ کے لیے معطل کردیا گیا ہے، جس کے بعد وہ نیو ساؤتھ ویلز میں بھی گاڑی چلانے کا اختیار کھو چکے ہیں۔
اٹلی چھوڑ کر آسٹریلیا کا انتخاب
وولپاٹو کی فٹبال کہانی بھی خاصی دلچسپ رہی ہے۔ سڈنی میں پیدا اور پروان چڑھنے والے مڈفیلڈر نوجوانی میں اٹلی منتقل ہوگئے تھے اور عمر کی مختلف سطحوں پر اطالوی قومی ٹیموں کی نمائندگی بھی کرچکے ہیں۔
اطالوی لیگ میں ساسوولو کے لیے کھیلنے والے وولپاٹو نے ورلڈکپ 2026 سے کچھ ہی عرصہ قبل بین الاقوامی سطح پر اٹلی کے بجائے آسٹریلیا کی نمائندگی کا فیصلہ کیا۔
انہیں عالمی کپ میں 3 مرتبہ آسٹریلوی جرسی پہننے کا موقع ملا۔
کھیلوں میں منشیات ٹیسٹ کی کیا اہمیت ہے؟
وولپاٹو نے الزام مسترد کردیا
دوسری جانب وولپاٹو نے کوکین یا کسی دوسری ممنوع چیز کے استعمال کی تردید کی ہے۔ ان کے سابق کوچ اور موجودہ رہنما ٹونی باشا نے ’سڈنی مارننگ ہیرالڈ‘ کو بتایا کہ نوجوان فٹبالر اس معاملے پر شدید حیران ہیں۔
باشا کے مطابق وولپاٹو کا مؤقف واضح ہے کہ انہوں نے منشیات استعمال نہیں کیں۔ ان کا کہنا تھا کہ وہ خود بھی اس خبر سے حیران ہیں کیونکہ معاملہ اور الزام دونوں سنگین نوعیت کے ہیں۔