فیفا ورلڈ کپ 2026 کے دوسرے مرحلے میں ایران اور بیلجیم کے درمیان کھیلا گیا اہم مقابلہ بغیر کسی گول کے برابر ختم ہوگیا۔
لاس اینجلس کے سو فائی اسٹیڈیم میں ہونے والے اس میچ میں بیلجیم نے پورے وقت کھیل پر غلبہ برقرار رکھا، مگر ایرانی دفاع اور گول کیپر علیرضا بیرانوند کی شاندار کارکردگی کے باعث یورپی ٹیم فتح حاصل نہ کر سکی۔
میچ کے آغاز ہی میں تیسرے منٹ پر بیلجیم کے اسٹار فارورڈ رومیلو لوکاکو کو پیلا کارڈ دکھایا گیا، جس سے مقابلے کی سختی کا اندازہ ہوگیا۔
ایران نے 25ویں منٹ میں مہدی طارمی کے ذریعے گیند جال میں پہنچا دی، لیکن وی اے آر نے آف سائیڈ قرار دے کر گول مسترد کردیا۔
مزید پڑھیں
پہلے ہاف میں ایران کے سعید عزت اللہی کو بھی پیلا کارڈ ملا، جبکہ دوسرے ہاف میں مقابلہ مزید دلچسپ ہوگیا جب 66ویں منٹ میں بیلجیم کے نیکولاس نگوئے کو براہ راست ریڈ کارڈ دکھا کر میدان سے باہر بھیج دیا گیا۔
اس کے بعد بیلجیم نے آخری حصے میں 10 کھلاڑیوں کے ساتھ کھیل جاری رکھا، تاہم ایران عددی برتری کا فائدہ اٹھانے میں ناکام رہا۔
دونوں ٹیموں نے متعدد تبدیلیاں کیں مگر کوئی بھی کھلاڑی جمود نہ توڑ سکا۔
بیلجیم کے کوچ نے میچ کے دوران کئی اہم کھلاڑیوں کو میدان میں اتارا جن میں کیون ڈی بروین بھی شامل تھے، مگر ایرانی دفاعی دیوار مضبوط ثابت ہوئی۔
اعداد و شمار کے مطابق بیلجیم نے 71 فیصد بال پوزیشن اپنے پاس رکھی جبکہ ایران صرف 29 فیصد تک محدود رہا۔ بیلجیم نے 21 شاٹس لگائے جن میں سے 7 ہدف پر تھے، جبکہ ایران نے صرف 7 کوششیں کیں جن میں 3 شاٹس ہدف پر رہے۔
میچ کا سب سے نمایاں کردار ایرانی گول کیپر علیرضا بیرانوند رہے جنہوں نے 7 شاندار سیوز کرکے اپنی ٹیم کو شکست سے بچایا۔
انہیں 9.3 کی ریٹنگ کے ساتھ میچ کا بہترین کھلاڑی قرار دیا گیا۔