فیفا ورلڈ کپ 2026 کے دوسرے مرحلے میں اسپین نے شاندار اور یکطرفہ کھیل کا مظاہرہ کرتے ہوئے سعودی عرب کو 4-0 سے شکست دے دی۔
اٹلانٹا کے مرسڈیز بینز اسٹیڈیم میں کھیلے گئے اس مقابلے میں ہسپانوی ٹیم نے آغاز ہی سے مکمل کنٹرول سنبھال لیا اور سعودی ٹیم کو سنبھلنے کا کوئی موقع نہ دیا۔
اسپین نے دسویں منٹ میں لامین یامال کے گول کے ذریعے کھاتہ کھولا، جس کی معاونت میکل اویارزابال نے کی۔
اس کے بعد 21ویں منٹ میں اویارزابال نے خود دوسرا گول اسکور کیا، جبکہ صرف 3 منٹ بعد انہوں نے اپنا دوسرا اور ٹیم کا تیسرا گول کرکے سعودی دفاع کو مزید دباؤ میں ڈال دیا۔
مزید پڑھیں
پہلے ہاف کے اختتام تک اسپین 3-0 کی مضبوط برتری حاصل کر چکا تھا، جبکہ سعودی ٹیم کھیل میں واپسی کی کوئی مؤثر کوشش نہ کر سکی۔
اس دوران 30ویں منٹ میں سالم الدوسری کو سعودی عرب کی جانب سے پہلا پیلا کارڈ بھی دکھایا گیا۔
دوسرے ہاف کے آغاز پر دونوں ٹیموں نے متعدد تبدیلیاں کیں
تاہم 49ویں منٹ میں سعودی پلیئر حسان التمبکتی نے غلطی سے گیند اپنے ہی جال میں پہنچا دی، جس کے بعد اسکور 4-0 ہوگیا اور مقابلہ عملی طور پر ختم ہوگیا۔
60ویں منٹ میں محمد کنو کو بھی پیلا کارڈ ملا، جبکہ اضافی وقت میں اسپین کا ایک اور گول آف سائیڈ قرار دے کر مسترد کردیا گیا۔
اسپین کے اسٹار فارورڈ میکیل اویارزابال کو شاندار کارکردگی پر میچ کا بہترین کھلاڑی قرار دیا گیا۔
انہوں نے دو گول اسکور کیے، ایک گول میں معاونت فراہم کی اور 9.3 کی اعلیٰ ریٹنگ حاصل کی۔