فرانس نے فیفا ورلڈ کپ 2026 کے اپنے پہلے میچ میں سینیگال کو 1-3 سے شکست دے کر کامیاب آغاز کیا۔
نیویارک کے میٹ لائف اسٹیڈیم میں کھیلے گئے اس مقابلے میں سابق عالمی چیمپئن نے 3 اہم پوائنٹس حاصل کرتے ہوئے اپنی مہم کا آغاز اعتماد کے ساتھ کیا۔
میچ کے بیشتر حصے میں فرانس کا کنٹرول واضح رہا، تاہم سینیگال کے مضبوط دفاع نے طویل عرصے تک مزاحمت جاری رکھی۔
بالآخر فیصلہ کن لمحات دوسرے ہاف میں آئے، جب آخری 25 منٹ میں مقابلہ تیزی سے فرانس کے حق میں مڑ گیا۔
مزید پڑھیں
فرانس کو پہلا گول کرنے کے لیے 66 ویں منٹ تک انتظار کرنا پڑا، جب سپر اسٹار کیلیان مباپے نے مائیکل اولیسے کی عمدہ پاس پر گیند جال میں پہنچا کر سینیگال کی مزاحمت توڑ دی۔
گول کے بعد سینیگال نے کئی جارحانہ تبدیلیاں کیں، لیکن فرانس نے دباؤ برقرار رکھا۔
82ویں منٹ میں بریڈلی بارکولا نے ایڈرین رابیو کی شاندار پاس پر
دوسرا گول کرکے فرانس کی برتری دوگنی کر دی۔
اضافی وقت میں سینیگال نے 90+5 ویں منٹ میں ای۔ مبائے کے ذریعے ایک گول کرکے اسکور 2-1 کر دیا، تاہم خوشی زیادہ دیر برقرار نہ رہ سکی۔
صرف ایک منٹ بعد مباپے نے اپنا دوسرا اور فرانس کا تیسرا گول اسکور کرکے میچ کا فیصلہ سنا دیا۔
میچ کے اعداد و شمار بھی فرانس کی برتری کی عکاسی کرتے ہیں۔ فرانس نے 11 شاٹس لگائے جن میں سے 8 ہدف پر تھے، جبکہ سینیگال صرف 6 شاٹس اور 2 آن ٹارگٹ کوششوں تک محدود رہا۔
گیند پر فرانس کا قبضہ 54 فیصد رہا جبکہ سینیگال کے پاس 46 فیصد پوزیشن رہی۔ فرانسیسی ٹیم نے 569 پاسز 88 فیصد درستگی کے ساتھ مکمل کیے، جبکہ سینیگال نے 496 پاسز 86 فیصد درستگی کے ساتھ کیے۔
کارنرز میں بھی فرانس کو 6 کے مقابلے میں 4 کی برتری حاصل رہی، جبکہ سینیگال تین مرتبہ آف سائیڈ پکڑا گیا۔