سعودی کابینہ نے پاکستان کے ساتھ نجی ڈرائیونگ لائسنسوں کی باہمی منظوری سے متعلق مجوزہ معاہدے پر مذاکرات پر دستخط کی ذمہ داری تفویض کردی ہے۔
اس پیش رفت سے دونوں ممالک کے شہریوں کے لیے مستقبل میں اپنے ملکی ڈرائیونگ لائسنس کی بنیاد پر دوسرے ملک میں ڈرائیونگ سے متعلق سہولتیں حاصل کرنے کی راہ ہموار ہوگی۔
ولی عہد و وزیرِ اعظم شہزادہ محمد بن سلمان بن عبد العزیز آل سعود کی زیر صدارت ہونے والے کابینہ اجلاس میں وزیرِ داخلہ یا اُن کے نامزد نمائندے کو اختیار دے دیا ہے کہ وہ پاکستانی حکومت کے ساتھ نجی ڈرائیونگ لائسنسوں کی باہمی تسلیم Mutual Recognition سے متعلق مجوزہ معاہدے پر مذاکرات کریں اور اس پر دستخط کریں۔
اس مجوزہ معاہدے کا مقصد سعودی عرب اور پاکستان کے درمیان نجی ڈرائیونگ لائسنسوں کو باہمی طور پر تسلیم کرنا ہے، تاکہ دونوں ممالک کے شہری مخصوص شرائط اور ضوابط کے تحت اپنے ملکی ڈرائیونگ لائسنس کی بنیاد پر دوسرے ملک میں ڈرائیونگ کی سہولت حاصل کر سکیں۔
مزید پڑھیں
سعودی پریس ایجنسی کے مطابق قبل ازیں سعودی کابینہ نے امریکا اور ایران کے درمیان فوجی کارروائیاں ختم کرنے اور مستقل معاہدے کے لیے تفصیلی مذاکرات شروع کرنے کے معاہدے کا خیرمقدم کیا ہے۔
کابینہ نے اس عمل میں پاکستان اور قطر کی جانب سے کی جانے والی ثالثی کوششوں کو سراہا ہے۔
کابینہ نے اس بات پر بھی زور دیا کہ آبنائے ہرمز میں بحری آمد و رفت
کی آزادی کو اسی طرح بحال کیا جائے جیسا کہ 28 فروری سے قبل تھی۔
سعودی عرب نے امید ظاہر کی کہ خطے اور دنیا میں امن و استحکام کو فروغ ملے گا اور علاقائی ممالک کے سلامتی مفادات اور داخلی معاملات کے احترام کو یقینی بنایا جائے گا۔
اجلاس کے آغاز میں کابینہ نے اللہ تعالیٰ کا شکر ادا کیا کہ سعودی عرب کو حرمین شریفین اور ان کے زائرین کی خدمت کا شرف حاصل ہے۔
کابینہ نے حج 1447 ہجری کے کامیاب انعقاد کو سراہتے ہوئے کہا کہ 17 لاکھ سے زائد حجاج نے مکمل اطمینان اور سہولت کے ساتھ مناسک ادا کیے، جو جدید منصوبہ بندی، ڈیجیٹل نظام اور مؤثر انتظامات کا نتیجہ ہے۔
اجلاس کے دوران کابینہ ملکی اور بین الاقوامی امور اور معاملات کا جائزہ لیا اور متعدد اہم فیصلے کئے ہیں۔